Thuthang thlaici (sim tu - Rev. Fr. Lucas Tha Ling Sum) July 21, 2021

Thuthang thlaici

Thuthangtha sim tu - Rev. Fr. Lucas Tha Ling Sum

July 21, 2021

Siarding: Ex 16: 1-5. 9-15/ Ps 78: 18-19. 23-28(24)/ Mt 13: 1-9

            Zumtu u le nau, RVA in kan lo hmuak. Pathian in thlawsuah lo peh hram seh. Thuthangttha Thaici timi thu ka ron lo hlawm ding a si Tui tlawngkai ni 3, July 21, 2021ih kan siar dingimi cu Mathai 13:1-9.  Baibal siarnak; 

Cui sun thotho ah Jesuh cu inn ihsin a suak ih tili kapah a va feh ih a to hnuah thu a zirh. A kiangkap ih a ra khawm mi misenpi pawl an tamtuk ruangah long sungah a lutih a to. Misenpi pawl cu tili kapah cun an ding. Thutthimnak hmangin thu tampi a zirh ih hitin a sim. 

Veikhat ah mi pakhat cu thlaici vorh dingin a feh. Thlaici cu lo sungih a vorh tikah tthenkhat cu: 

• Lamzin parah an tla ih cu pawl cu vate in an ei ttheh. 

• A tthenkhat cu leilung malnak lungsedaap lakah an tla ih leilung a sah lo ruangah thlaici cu hma khatte ah an tto. Asinan ni a sat tikah a tto pekte pawl cu an thi sal; an hram in leilung thukpi a dawt thei lo ruangah an caar cing thluh. 

• Thlaici a tthenkhat cu hlingbur lakah an tla ih an kho nain hlingbur cun a zap ruangah an tthang thei lo.

• Sikhalsehla thaici tthenkhat cu leilung tthat nakah an tla ih tthenkhat cu a let zakhat, tthenkhat cu a let sawm ruk, tthenkhat cu a let sawmthum in rawl a suak, tiah a sim.

Jesuh cun hna a nei mi hmuahhmuah in thei hai seh, tiah a ti. 

Himi cu Pathian ih ttongkam a si. Khrih Bawipa, nangmaih hnenah thangtthatnak um seh law.

            Zumtu u le nau, tui kan siarmi Baibal hi, kan thei ttheu mi Bawi Jesuh ih tahtthimnak thawi mipi hnenih a zirh mi a si. Mipakhat in a lo ah thlaici a vorh e a ti. A hrek thlaici cu lamzin ah an tlah ih vate an ei ttheh, a hrek cu leilung malnak ah an tlah ih, an tto ko nan, a thicing sal thluh, a ti. Cun a hrekkhat len hling lak ah an tla ih hling in a zap ttheh ruangah an tthang thei lo e, a ti. Asinan, a ti, leiram tthatnak ih a tla thlaici pawl cu a let zakhat, a let sawmruk, a let sawmthum in rawl an suak a si, a ti. Cun hitin a sim bet hrih: hna a nei mi hmuahhmuah in hi thu hi thei hai seh, a ti. 

            Hi tatthiamnak ih ti can a tawi zawngih kan sim ahcun, thlaici cu Jesuh ih thuthangttha a si; thlaici vorh tu cu thuthangttha phuangtu an si; thlaici a cohlang tu pawl cu kanmah milai pawl kan si. I, tuittum ih kan ruah dingmi cu kan thinlung sungah thuthangttha simtu pawl ih an vorh mi thuthangttha cu ziang vek din hmun in a um? Vate in an ei ttheh maw? An caar ttheh maw? Hling in a zap ttheh maw? Lolen ziangtin an rah? timi te hi a si.

            Zumtu u le nau,  nan thinlung sungih rundamnak thuthangttha thlaici an rak vorh dah mi cu, vate in an ei ttheh men lo; a caar ttheh men lo; hling in a zap ttheh men lo a si, timi fiangten ka lo sim duh. Ttongdang ih kan sim asilen Jesuh ih thuthangttha nan thinglung sungih an rak phuan dah mi cu a lak a si hrimhrim lo. A hlo ral men lo a si, khuavang in a siat suah hrimhrim lo a si, timi ka lo sim duh. 

            Ziangruangah cuih thuthangttha cu nan sungah a nung a si, tin ka sim thei? Tetti, pakhat in ka ron lo sim ding. Cumi tetti cu ziang a si tilen tuvek ih RVA ihsin thuthangttha ngai ih Pathian na hawl rero mi hi, a fiangbik mi tetti pakhat a si. Nan thinlung sungih an rak vorh dah mi Pathian thuthangttha tlaici cu nung lo sehla tuvek in thuthangttha ngai in, Pathian nan hawl lo ding a si. Sihmansehla, nan sungih thuthangttha tlaici a nun ruangah tuvek ih Pathian nan duhnak le nan hawnnak a si. Lungawi a um tuk. Pathian hnenah lungawi thu sim in thangtthat cio uh si. 

            Zumtu u le nau, thuthangttha thlaici cu kan sungih a nun zo a si ruangah rahttha tampi ih a rah thei nak dingin zuam cio uhsi. Jesuh ih thuthangttha thlaici nan sungah nung ringring hram seh. A let sawmthum, a let sawmruk, a let zakhat ih rah thei dingin Pathian in thlausuah lo pe hram seh. Amen.