Pope can ding a ol lo ruangah a mai hrangih thlacam sak dingah Sr. pawl hnenah Pope Francis in forhfial (Pope asks religious sisters to pray for him: ‘It ih not easy to be the Pope’) October 23, 2021

Pope can ding a ol lo ruangah a mai hrangih thlacam sak dingah Sr. pawl hnenah Pope Francis in forhfial

(Pope asks religious sisters to pray for him: ‘It ih not easy to be the Pope’)

October 23, 2021

          Pope Francis in tlawngkai ninga ni (22.10.12021) ah Khristian pawl humhual tu Siangpahrang Bawinu ih fanu pawl a tin kaing (congregation) a si mi Salesian Sister pawl a rak lengih a mai hrangih thlacam sak dingah a rak dil.Nan tuah mi zate hrangah ka lungawi. Thlacamnak thawn in nan mah le leitlun ih um mi nan unau Sister pawl zaten thluasuah ka pe ding’ tiah Pope Francis in Salesian Sr. pawl hnenah October 22 ah a rak sim. Cu vekin ‘Pope can ding a ol lo ruangah ka hrangah thla in cam sak uh’ tiah zaangfah a rak dil. Salesian sister pawl hnenah ‘Bawi Jesuh thei fiang dingah cat bang lo in lam in hruai ringring tu Bawinu zoh thim dingah a rak forhfial.

          “Thiang Thlarau parih tlaitluannak neihnak cu nan tuah mi thukamnak pawl le mino pawl, mifarah zonzai pawl hrangah a ap aw mi nan sungkhat pawl hngetkhoh dingah a bawm” tiin Pope Francis in a rak sim. Salesian Sister pawl a tin kaing (congregation) cu 1872 ah St. John Bosco le Mithianghlim Mary Dominica Mazzarello pawl ih rak din mi kaing a si ih ram 97 ah Sr. zaten 11,000 hrawng a um mi leitlunhuap ih a tum bik riantuan tu a tinkaing ( Congregation) ah a rak cang. Pope Francis in Sr. pawl hnenah kum upa pawl thawn thleidannak um lo dingin tuah dingah a rak forhfial. “Kum upa pawl tla veikhat vei hnih ah mal te an thin a tawi thei theu ruangah kan mah khal kan upat tikah sualnak pawl kan hmu fiang nan an mah ah nunram ih hmuhton mi le ruahnak pawl a tam deuhdeuh. Kum upat vivo vekin theihthiamnak a tel” tiah Pope Francis in a rak sim.

          ‘Mi menmen pawl ih nunram vekin a tuah thei nawn lo tu kum u pa pawl hrangah inn pawl a um a tul ding. Ihkhun ah an zau ding nan an mah va leng dingah le tikcu caan pek a tul. A ngaingai ah tla kum upa pawl cu man a nei zet mi thuanthu sungtel lungmankhung pawl an si tiah a rak sim bet. Pope Francis in a mai ngan mi thuanthu ‘The Story of a Soul’ ti mi ca uk ih a rak ngan mi St. Theresa of Lisieux ih thuanthu a rak hlawm. A sim mi cu ‘a feh thei lo mi Sr. kum upa pakhat kilkhawitu naute Jesuh ih St. Teresa ih nunram hmuhton mi pawl ih thuanthu a rak hlawm.

          ‘Ruahnak tha a mal mi pitar cu thil ziang tinkim a diriam lo nan St. Theresa in a mah cu duhdawtnak thawn a rak kilkhawi’ tiah a rak sim. ‘Veikhat ah a mah cu Bawipai Thi le Sa retnak in a inn ih a feh phah ah a leng ah thawmvang pawl a thei. Cui kiangkap ah party pakhat a um. Theresa khal in ‘cui thil hrangah ziang tik hmanah thlengawknak ka tuah lo ding’ tiah a rak sim. A mai kawhnak nunram ih a tum zia a thei. Salesian Sr. pawl cu September 11 in October 24 tiang Rome khuapi ah an mai vei 24 nak conference an rak tuah. ‘Leilungpi ih thinlung ah nunram nunnak a suak ter tu pawlkom pawl’ ti mi motto thupit in an rak ruat.

          Pope Francis in Thiang Thlarau ih theihthiamnak, khuatleunak pek mi vekin leitlun ih tul sam mi pawl ralring thei dingah Fala Thianghlim Bawinu thawn thinlung tha khoh zetin hmainor dingah a rak forhfial. Sister pawl hnenah “Pathian ih thluasuah thangphawknak pawl cohlang dingah nan thinlung ong uh. Pathian duhdawtnak nei dingah’khal a rak dil.

          Hi thuthang cu CNA thuthang ih kan ngah mi a si.

https://bit.ly/2Zoo8Fa