“Pathian ih duhdawtnak ihsin milai duhdawtnak”

Pathian nih in duhdawt tuk ruangah Amai hmuihmel vekin in serhsiam

Bawi Khrih ah duhdawt zetmi RVA a ngaitu nu le pa, u le nau pawl “Kan Bawipa Jesuh Khrih zaangfahnak veel, Pa Pathian ih duhdawtnak le Thlarau Thianghlim ih pawlkomnak pawl cu nan zate hnenah um hram seh” tiah cibai ka run lo buk hai. Tuihni cu 2019 kum, October thla ni 31 ni, Tlawngkai nilini asi. October thla cem ni asi ruangah October thla sungih kan dongmi Pathian ih thlawsuahnak pawl hrangah Pathian hnenah lungawi thu sim uhsi. Calendar sung ihsin siar dingah in thiahmi pawl cu Rome 8:31-39 tiang asiih cun Gospel sung ihsin cun Luka 13:31-35 tiang asi pei. Kan ruah khawm dingah ka hrilmi cu “Pathian ih duhdawtnak ihsin milai duhdawtnak” ah tiah asi. Tuihni kan siarmi Rome 8:32 sungah “a Fapa neihsun hman zuah lo in kan zate hrangah in pe zo! A Fapa rori hman in pek asi ahcun thil dangdang pawl khal a lakin in pe lo ding maw?” ti mi kha ruat khawm tlang uhsi.

Pathian nih in duhdawt tuk ruangah Amai hmuihmel vekin in serhsiam asi. In duhdawt tuk ruangah Pathian in milai hrangah ziangzongza a tuahih milai kut sungah a aap. Milai hrangih ttulsammi hmuahhmuah tla sersiamtu Pathian in a pek thluh. A serhsiammi milai tla cu seherhnak thawn zawn a ruat ringring asi.     Ps 8:4-6 “Bawipa, milai ziangso asiih na seherh Mihring taak kohi ziangso asiih a zawn na ruah? Asi, minung cu nangmah hnakih niam deuh fangin na tuah ih sunlawinak le upatnak cu lukhuh bangin na khumter. Na serhsiammi hmuah hmuah tlunah uktu na si terih ziangtinkim cu a ke tangah na ret asi” tiah kan hmu thei.

Sersiammi milai nih tukforhnak an neh lo ruangah sualnak kut sungah an tlak asi. Sersiami rul in sersiammi nunau Eva kha sual a forh; nunaunu Eva khalin minung Adam kha sual a forh lala. An zaten sualnak kut sungah an tla thluh asi. A sinain duhdawtnak le zaangfah lainatnak thawn a khahmi Pathian in milai cu a tansanlo ih rundam sal dingah thukamnak tumpi a run pek asi.

Pathian in misual pawl kha a zaangfah nain sualnak cu nasazetin a hua asi. Mirang hrekkhat in “there is not to say mistakes but lessons to be learned” Falam ttong in cun “palhnak ti ah sim ding silo-in zirnak asi ti sawn ding” tiah an ti ttheu vekin Pathian ih mithmuh ah Adam le Eva te ih sualnak cu a tum hnasa ko nain Pathian nih a zaangfah lainatnak thawn milai ih sualnak pawl cu rem ding le zir dingah Pathian nih a duh asi. Curuangah Pathian in kum le caan tampi a lakih milai ih nun daan, ruah daan, cangvai daan pawl kha prophet pawl hmangin a rem rero, a zirh rero hai asi. Galati 4:4 “Sikhalsehla tikcu tinmi a thlen tikah Pathian in a Fapa a run thlah. Nunau sung ihsin a suak ih Judah daan hnuai ah a nung” tiah kan hmu thei.

Pathian nih in duhdawt tukin misual kan si na cingin a Fapa hman zuah lo in kanmah in run dingah a run thlah asi. Tuihni kan siarmi Paul ih cakuat pawl kha kan ruat tlang pei uh:-

1. Pathian in kanmah hrangah a Fapa neihsun hman zuahlo in leitlun ah a run thlah asi ti nak cu Pathian nih in duhdawtnak tumbik a langternak asi. In duhdawtnak ah Jesuh Khrih in a nunnak pek tiangin asi. Kanmah ih sualnak pawlih man tla kha in kuan saknak dingah asi. Kanmah hrangah a nunnak cu thihnak tiangin a tuarnak thawngin kanmaih thihnak cu a siat-bal ttheh asi. Cutin cun a thawhsalnak thawngin nunnak thar in pek sal asi.
2. Paul in a cakuat sungih a hmanmi ttongfang pawl cu Abraham hnenih Pathian ih simmi ttongfang thawn a bang awk phah asi. Paul in tiah asi. Pathian in Abraham hnenah “Semtirnak 22:12 ah kan hmu thei. Abraham in a fapa neihsun zuahlo in Pathian hnenah a pekih Abraham le atefasin pawl thluasuah co ding hrangah asiih Pathian in a Fapa neihsun hman zuahlo in in peknak cu kanmah leitlun minung pawl rundamnak co theinak dingah asi.
3.  
4. Kan zumnak cu thihnak a tuarih a thosaltu le kumkhua in nung le uktu Khrih Jesuh ah asi. Cumi Bawipa thawn zo in so hi leitluin ah in tthen thei ding? Pathian nih mawh in puh asile zo in so thu in tthen thei ding? Pathian lawng nih “nang hi na sual, nang hi na suallo” tiah thu in tthen thei ding. Milai le milai cu thu kan tthen lo ding asi. Hi leitlun ih thutthentu pawl cu Pathian ih hnattuan pekmi asi. 
5. Rome 8:34 “Jesuh Khrih cu kan hrangah thihhnak a tuar, a thosal, Pathian ih vorhlam kamah a um ih kan hrangah Pathian hnenah in dil sak” tiah kan hmu. Dungthluntu pawlih zumnak hrampi sungah “Jesuh Khrih cu kan hrangah thihnak le vuinak a tuarih nithumnak ah mithi pawl lakin a tho sal, Pa ih vorhlam kamah a to ih mithi le minung tla thutthen dingin a kir sal ding” tiah kan hmu thei. A thihnak, a thawhsal nak le pa ih vorhlam ah a to tiang cu an bang aw. Mithi le minung pawl tla thu tthen dingin a rungttum sal ding timi le kanmah hrangah in dil sak timi kha malte a bang awlo. Kan zumnak sungah cun thutthen ding, Paul ih cakuatnak sungah cun zaangfah in dil sak dingah asi. Kan thei ttul zetmi cu Jesuh Khrih cu Pathian ih vorhlam kamah kanmah hrangah dil sak dingin a to ringring ko nain kanmah tu sawnin Pathian duhdaan in kan nunglo ahcun mithi le minung thutthen dingah a rungttum tikah cun dil sak ding si nawnlo in thutthen dingah a rungttum ding asi. Curuangah James in a cakuatnak sungah James 2:13 “Mi hnen ih zaangfahnak a neilo mi cu Pathian in a thu a tthen tikah a parah zaangfahnak a nei ve lo ding” tiah in zirh asi. Kan nun sungah duhdawtnak kan neilo, zaangfahnak kan nei lo ahcun kan thi tikah Pathian in kan parah zaangfahnak le duhdawtnak nei ve lo in thu a tthen ding asi.
6. Curuangah leitlun kan nun sungah harsatnak kan tong caan ah siseh, duhtu kan neilo caan ah siseh, in ding ei ding kan neilo caan ah siseh, midang ih mawh purhnak thawn kan khat caan ah siseh, beidong vansang lam in kan um caan siseh, phunzailo in hnangamnak nei in Pathian rinsan ding kan si asi. Amahih duhdawtnak thawn in tthen siang dahlo, thihnak hmanin in tthen siang dahlo. ah in zirh asi. Cumi cu Pathian in kanmah parih a duhdawtnak asi.
7. Bawi Khrih ah duhdawt zetmi nu le pa, u le nau pawl, Pathian nih in duhdawt vekin kanmah le kanmah tla duhdawt aw ve ding kan si asi. Cumi cu Jesuh Khrih in Pathian duhdawt dingah le milai duhdawt dingah in tanta mi thukham thar asi. 
8. Duhdawtnak cu pakhat le pakhat rian awk nak asi, bawm awknak asi, thu ngainak asi, ngaidam awknak asi, ninghang riahsiami pawl thawn riahsia dingih a lungawimi pawl thawn lungawi ding asi, misual kha thutthentu silo in a sualnak pawl kha rem sak sal ding asi.
9. Duhdawtnak kan ti tikah kanmah in duhdawttu pawl lawng silo in kanmah in huatu le kan ral pawl tiang hmanah duhdawt dingin Jesuh Khrih nih Mt 5:43 ah in zirh asi. Paul khalin tiah in zirh asi. 

• RVA a ngaitu nan zate parah Pa Pathian in lo thluasuah hram seh. AMEN.