Zumnak le Tangdornak lo cun Bawipa ton a theih lo (sim tu - Rev. Fr. Dave Mangte) November 29, 2021

Zumnak le Tangdornak lo cun Bawipa ton a theih lo

Thuthangtha sim tu - Rev. Fr. David Kap Cin Mang 

November 29, 2021

            Kan Bawipa Jesuh Khrih ih zangfahnak, Pa Pathian ih duhdawtnak le Thiang Thlarau ih pawlkomnak cu RVA ihsin thuthangtha a rak ngaitu nan zate hnenah a thar in thleng hram seh ti’n hmaisabikah cibai ka run lo buk hrih a si.

            Tuini cu Adventu zarh hmaisabik ih tlawngkai nikhat ni a si. Tuini hrangih Cathianghlim siar dingmi pawl cu: Is 2:1-5; Ps 122:1-2, 4-5, 6-9; Mt 8:5-11

Gospel siarnak ka run nei ta ding:

Jesuh cu Kapernaum khua a thlen tikah Rom ralbawipa pakhat in a ra tong ih bomnak a ra dil. “Bawipa, ka hnenumpa cu besia zet in a na ih cang thei lo in inn ah a it ringring a si,” tiah a ti. “Ka ra pei ih ka damter pei,” tiah Jesuh in a ti. Ralbawipa in, “Bawipa, cuticun si hlah seh; nang ka inn tiangih ratter dingah kei ka tlak lo. Damnak thu pe awla ka hnenumpa cu a dam ko ding. Keimah khal ka tlunlam bawi pawl ih ukmi ka si ih ka kuthnuai khalah ralkap an um. Ka kuthnuai ralkap pakhatkhat cu, ‘Feh aw,’ ka tile a feh; ‘Ra aw,’ ka tile a ra. Ka hnenum khal, ‘Himi tuah aw,’ ka tile a tuah a si,” tiah a ti. Cumi cu Jesuh in a theih tikah a mang a bang ngaingai ih amah a thluntu mizapi pawl hnenah, “Thungai in ka lo sim: Israel mi lak hmanah hi pa ih zumnak bangtuk ka hmu hrih lo. Fiang tein ka lo sim: Nisuahnak le nitlaknak ihsin mi tampi an ra dingih vancung Uknak rawl einak puai ah Abraham le Isaak le Jakob thawn an to tlang ding. (Matthai 8:5-11)

            Duhdawtmi u le nau pawl, Adventu tikcu caan kan thleng thlang vekin kan theih ciami cu a si ko nan, Adventu thawn pehpar in malte rel bet ka duh. Adventu timi ih sullam cu ‘a ratnak/ a ra thlennak’ ti a si ih, kan Bawipai’ ratnak khi a sawhkhihmi a si. Cule kan Bawipai’ ratnak kan ti tikah, a tlangpi thu cun, phun hnih a um. Milai cannak lak in a veikhatnak a ratnak le thianglawr dingih a veihnihnak a ratnak ti’n kan sim thei. Hmansehla, a taktak ahcun, cumi ratnak pahnih karlak ih a ratnak khal a um kan tile a sual lo ding. Ziangahtile, Thlarau Thianghlim thawngin, Sacramentu sungin siseh, kan hmuhtonmi thil hmangin siseh, nitin kan nunnak ah kan Bawipa cu kan hnenah a ra ringring a si.

            Cutiin, nitin kan nunnak ih in ra pantu kan Bawipa hi ziangtin kan tong ngah ve ding timi lamzin le tawhfung hi tuini Gospel kan siarmi hin in simfiang ti’n ka hmu. Cuih lamzin le tawhfung cu zumnak le tangdornak a si. Gospel kan siarmi sungih ralbawipa ih nun in, ‘zumnak le tangdornak ih pehtlaih awknak’ khal fiang zetin in khihhmuh sak a si.

            Leilung parah Runtupa dinhmun in kan Bawipai’ ratnak ding a rak hngakhlap biktu cu Judah mi/ Israel mi pawl an si. Sihmansehla, a rat ngaingai tikah Israel mi tampi in an rak hnongih an rak zum duh lo; culai ah, miphun dang le Pathian thei lo pawl tiih an nautat mi pawl in lungawi te’n an rak cohlang sawn a si. Tuini Gospel kan siarmi sungih ralbawipa khal cuih miphun dang pawl lakih rinsan tlak pakhat a si vekin anmah aiawhtu a si kan ti khalle a sual lo ding.

            Hi ralbawipa hi kan Bawipai’ thuhla a theih tikah, a hnenah ra in, “Bawipa, ka hnenumpa cu besia zet in a na ih cang thei lo in inn ah a it ringring a si” tiah amaih harsatnak hman silo mi, a hnenumpa ih tuarnak pawl a ra simsak a si hi. Hitawk zawn ih a tongkam te kan zoh tikah, ziang tlukin tangdornak thinlung a nei timi a lang ter. Ralbawi pakhat a si vekin, ‘ka hnenumpa a dam lo ruangah i ra damter sak hnik hen’ ti’n thuneihnak hmangin tong thlah thei dinhmun a si. Hmansehla, ‘ra dam ter hram aw’ timi tongkam hman a sal lo; a hnenumpa ih tuarnak te lawng a rak simsak. Cuih a tangdornak thinlung te cun kan Bawipaih thinlung a khoih ve ih, ‘ka ra pei ih ka damter pei’ ti’n a rak ti top ve a si. Cule “Bawipa, cuticun si hlah seh; nang ka inn tiangih ratter dingah kei ka tlak lo. Damnak thu pe awla ka hnenumpa cu a dam ko ding” a timi tongkam te hin a zumnak maksak zia a langter.

            Zumnak kan neih taktak tikah, cuih zumnak in tangdornak ah in hruai theu. Cule cuih tangdornak in nitin kan hnenih in ra bentu kan Bawipa tong ngah dingin in bawm ve theu. Zumnak kan neih ngaingai ahcun tangdornak khal kan nei hrimhrim dingih ‘cumi khami in pe aw/ cumi khami in tuahsak aw’ tiin Bawipa hi tirh kan fial men lo ding. Ziangkim ti theitu a si ih, kan hrangih a tha bikmi a theitu khal a si timi rinnak thawn kan tuarnak le kan thinharnak pawl a hnenih thum top ding kha zumtu pawl ih kan dinhmun diktak a si.

            Himi zumnak le tangdornak ih thupit zia a hmuhfiang tuk ruangah Kohhranpi khal in kan Bawipa ih Pumsa rori a si tiih kan zummi Bawipai’ Thisa kan san hlan te ah tuini ih kan theihmi ralbawipa ih tongkam te cawngin “Aw Bawipa, Nangmah ka inn sungih lut dingah ka tlak lo a si; asinan, kaa khat lawngin tong awla ka thlarau cu a dam ding a si” timi thlacamnak in cam ter nak a si.

            Cun, a netnak ah, tuini ih kan thu tlangpi thawn pehparin Kohhran ih in tuahsakmi daan ih kham ruangah Bawipa Thisa a tak ih a sang theilo mi unau pawl thazang pek ka duh a si. Kohhran sungih daan hrekkhat ih hrennak ruangah Sualthlahnak Sacrament le Bawipa Thisa sang thei lo ruangih Missa sumnak ah a tel paih nawn lo mi tla kanmah Kohhran sungah kan rak um phah theu. Cuvek pawl ih an sim theumi cu ‘Bawipa Thisa hman sang thei lo cun Missa sumnak ih tel le Pathian biak teh ziangso a thathnem?’ ti hi a si.

            A ngaingai ih kan ti a sile, zumnak kan neih taktak a si ahcun, Kohhran daan in Bawipa Thisa a tak ih sang thei lo dingin in kham hman sehla, tangdornak thinlung thawn Missa sumnak ah tel in, “Aw Bawipa, Nangmah ka inn sungih lut dingah ka tlak lo a si; asinan, kaa khat lawngin tong awla ka thlarau cu a dam ding a si” tiih kan thinlung te’n kan sang a si ahcun, ziangvek timtuahnak khal nei mumal lo le zumnak taktak khal nei cuanglo ih pawnleng men ih a sangtu pawl hnakin kan nun ah Pathian ih zangfahnak thluasuah pawl a thleng sawn ti hi kan hngilh lo cio pei uh. Kohhranpi in Bawipa Thisa a tak ih sang lo dingah in kham thei hman sehla, zumnak le tangdornak taktak thawn kan thinlung te’n kan sang a si ahcun, Bawipa Thisa sungin Pathian ih in pek duhmi thluasuah cu in kham sak thei hrimhrim lo timi khal kan cing ringring hram pei uh.

            Zumnak le tangdornak lo cun Bawipa ton a theih lo!