Pope Francis cu a thuailam ih 5 thawn Greece ram a feh. (December 1, 2021)

Pope Francis cu a thuailam ih 5 thawn Greece ram a feh.

December 1, 2021

         Pope Francis cu December 2 ah a timtuah cia vekin Cyprus tikulh ram ah a feh zo. Pope cu Cyprus ram ah nihnih rei mi a Tuukhaal khual a tlawngih Greece ram ah a Tuukhaal khual a tlawng bet ding. Greece ram a tlawng tu ding Pope cu nihnih a rei ding mi cui a Tuukhaal khualtlawnnak ah hi thu then 5 pawl an rel tlang ding tiah theih a si. Cu mi pawl cu-

1. Mivai le miharsa pawl ih harsatnak thu

Pope cu a liam zo mi kumnga ah khal hi tikulh ramah veikhat a Tuukhaal khual a tlawn hnu ah tui tum veikhat a tlawn betnak a si. A ngaingai ahcun Greece ram ah Catholic Khristian zateek cu ram mipum ih zateek pakhat hman a um lo.

Asinan, Greece ram dinhmun in mivai le mi harsa pawl ih buainak le ramih sumdawnnak, nunphung lam harsatnak tampi khal an ton rero ruangah Pope dinhmun in leilungpi ih a cang rero mi pawl mah thawn sai lo vekih um lo dingah thangphawktu a si vekin tu-ah khal thinlung takih bawm dingah a tlawnnak a si.

Pope Francis ih tui tum veikhat a tlawnnak cu Pope dinhmun in rian a tuan hnuah ramleng a tlawnnak vei 35 nak a si thlang. Hi vek ih a tlawnnak thawn kan dung Zarh ah tifinriat ah tidai pil ruangih a rak thi tu, harsatnak a rak tongtu mivai le mi harsa pawl ih nunram leilungpi ih thei dingah a si.

Cyprus ah Pope cu Orthodox Christian pawl thawn mi harsa pawl hrangah tumtah in thlacam tlangnakah a tel ding. Cui hmun ih a um tu mi harsa hrekkhat pawl thawn an tong aw dingih cu mi pawl sungin hrekkhat cu Italy ah a hruai hai ding.

2. Thlacam tlangnak caanserh

Cyprus vekin Greece ramah khal Pope cu cu tawkih Christian pawlkom pawl hotu Chrysostom II le Hieronymus II pawl thawn an tong aw ding. Pope Francis cu Cyprus ram ih a um tu a pahnihnak Pope dinhmun in Cyprus ram ih thuanthu sungah a rak tel zo.

A mah hlan kum 11 hrawngah a cawl zo tu Pope Benedict XVI a rak tlawng zo. St. John Paul Ii cu 1054 ihsin thokin Biaknak lam zumnak, thuzirh mi pawl nasa zetin a palhawkih net lam ah zo vek Pope hman an rak thleng lo ih Pope St. John Paul II in a rak thok sal.

Pope St. Paul II in cui san lai ah Orthodox Christian pawl hnenah Catholic Pawlpi ih a palh mi thu bohcatnak pawl hrangah ngaithiam a rak dil.

Hi vekin ngaithiam a rak dil ko nan Athens ih Orthodox Christian pawl hotu Bishop Theodore Kontidis cu Rome le Greek Christian pawl lakih remawk lo nak pawl a rak sim. Curuangah cui khualtlawnnakah thlacam tlangnak an rak tul dah. Cyprus ih um Orthodox Christian pawl khal cu nelawknak le thureltlangnak a rak langhngan ter.

3. Cyprus ram ih ramkhel dinhmun

Cyprus ram ih rampi harsatnak cu ramkhel party pawl lak ah a tlaitluang ih, rin umnak a um ahcun an rem aw sal men thei. Ramkhel Party pawl dinhmun in tikulh ramih thatnak zoh ih tuah a tul tiin Vatican ih Secretary, Cardinal Pietro Parolin in Pope a feh hlan zaankhat a duh ah a rak sim.

1974 ihsin thokin Orthodox Christian pawl tambik umnak thlanglam Cyprus le Muslim tambim an um nak Turkey thawn kom aw mi saklam Cyprus tiin pahnih in an thenawk. Saklam Cyprus cu Turkey lawng ih nemhnget mi a si.

2004 ah tongaw thei sal dingah a rak zuam nan thlanglam Cyprus ram mi pawl in an rak rel ih an rak hlawhtling lo. Asinan, an pahnih ih thlun tul mi nemhnget mi cu an rak suah tiin ram palai pawlakom in theih a si.

Vatican dinhmun in a kum kum ih rem awk thei sal nak hrangah a ti thei tawkih a bawm vivo ding thu, komawknak cu remdaihnak hrangah pakhat lawng a si mi tidaan a si thu Vatican thuthang lamhmuhtu, Matteo Bruni in a rak sim.

Pope dinhmun in hi thuhla thawn pehpar ih naihniamawknak ah ramkhel phun in a naihniam lo ding. Mipi pawl thawn hmunkhat ih a dinpi ding thu Cyprus ih Maronites Christian pawl ih Archbishop Maronites in a rak sim.

4. Europe continent ah ziang ih siar lo mi tinfinriat

‘Europe continent in tifinriat ziang siar lo ih um a ngah lo’ tiin Pope Francis in a mai a Tuukhaal khual a tlawn hlan Zarhkhat a duh ah a rak sim. A ralai ding mi 2022, February thla ah Pope cu Mare Nostrum Bishop pawl thawn Italy ram, Florence khuapi ah an tongaw ding.

    Pope Francis in tifinriat cu thil thlengawknak hmunah ruat in, tui mivai pawl hrang el awknak a cang rero. Kan dung November 28 ni ah Pope in tihnungza rapthlak zet mi tifinriat tan in hmun nuam cu thansonak hrangah tumtah mi a si ko nan netabik ah thihnak lawng an rak ton thu a rak sim.

    Mivai pawl hrang cu thlacam tlangnak caanserh thawn a den awk thu, thenhnih a si mi Christian pawl hnenah pumkhat ih can ter a duh thu France Orthodox Carol Saba in a rak sim.

5. Pope ih damternak

Pope Francis in Athens ih a tlun hnu ni 11 a rei ah a kum 85 kim suahcem cu December 17 ah a tuah ding. Pope cu 2021 a thok lam ah a pumpi natnak a rak tuar ih a thupi zet mi caanserh hrekkhat ni an rak thawn.

September thlaah khal Pope cu a harhdamnak lam ruangah a cawl thlang ding tiin thuthang sual a rak um dah. Cui caan ihsin Pope ih caanserh pawl a tam deuhdeuh. Asinan, Pope a Tuukhaal khual a tlawn hlan zaankhat a duhah bang tukih tuan lo dingah tongkam a rak suak.

Pope a khualtlawnnak ih a thlen hnu nithum a rei hnu, December 9 ah France ram ah Catholic Biaknak lam hotu pawl ih thil sual rak tuah mi nunau, mipa zuk tha lo thawn pehpar in tonawknak ah ni an thawn thu tongkam a rak suak. Hi thuhla tampi thawn Pope cu tui ni a Tuukhaal khualtlawn a rak pok zo.

Pope ih khualtlawnnak lamtluan ah him ten a um thei nak dingah, thureltlang ding mi pawl hlawhtling dingah, kum reipi dam in Pawlpi cu Tuukhaal tha dinhmun in hruaikai thei ringring ding hrangah thlaza cam sak uh si.

Hi thuthang cu Aleteia thuthang ih kan ngah mi a si.

https://bit.ly/3xOGGva