Pathian thawn Titi-kaka

Pathian thawn Titi-kaka

33th Monday Homily (November 18, 2019)

Readings: 1Maccabees 1:10-15, 41-43, 54-57, 62-62  

Ps 119:53,61,134,150,155,158

Alleluia: Jn 8:12 

Lk 18:35-43

Tuini ruahkhawm ding thu tlangpi ah Pathian thawn titi-kaka ti a si ding.  Titi-kaka timi hi khawpi sungah tla cu kan hmang tuk lo tla a si thei ih a thei thiam lo tla kan tam men thei. Hrekkhat tla cu Pathian thawn titi haha tin tla kan rak thei ngah pang ding ka phang tuk ih a sullam silole ka ti duhsan mi kha ka ron lo simfiang hmai sa ding.  Titi-kaka ka timi hi 'thunuam rel tlang' timi sullam thawn ka hman duh mi a si. 

Tuini siarmi Thuthangtha sungah mitcaw pakhat in Bawipai hnen zaangfah a dilnak thu kan thei a si. Zaangfah dil timi cu khatlam ih kan zoh tikah thlacam ti thawn a bangaw a si.  Bawipa Zesuh hi leitlun ah minung milai sinak thawn a rak tlanleen ve ruangah a hnen ah thla an cam tin kan hmang lemlo. Minung le minung karlak ahcun dil awk/ ngen awk ti lawngin kan hmangih thla ka cam tin kan ti dah lo. Asinan Zesuh ih Pathian a sinak kan zoh tikah mitcaw pa kha thla a cam kan ti thei. Curuangah thlacamnak, thlacam daan thu ron rel tam deuh ka duh. Thlacamnak ti tikah a phunphun in a um thei ko: biaknak, thangthat sunloihnak, sualsirnak, dilnak, lungawithu simnak tivek in kan hmang nan an zaten dilnak phunkhat an si thluh kan ti le a sual lo ding.  Lungawi thusim thlacamnak kan ti khal le kan lungawi thawinak Bawipan in sang hramseh tin kan dil thotho. Sualsir thlacam ti khal le ngaithiam dil hi a rak si thotho. Cutikah mihrek cu dil timi kha nau lam, neihlo lam langter tu ah ruat tahrat in dil paihlo ih farah puarthau kan um thei. Kawl tong cun 'sinyeta manah' an ti maw si kha. 

Kan brother silai ah veikhat ka rak ton dah mi cu: khua pakhat ah Christmas puai le thawhhlawm/ahlu tampi an tuah theu ih kumthar ni ah farah nunhar deuh pawl laksawng an pe theu ti si. Cui an thawhhlawm khawl mi fangfai cu Biakinn sungah hmin cazin ko ih zem a si. Papi pakhat a hmin an kawh ve ten a dingih kannih cu kan tul lo, kanmah kan nei ko tiah a ti. Cucu midang hnen ka sut sal tikah cuih papi cu amah te fangfai thabik pawl a lei ih a dang ten rawl a ei theu, nan a nufa pawl cu cencerh an ei men theu ti a si. Curuangah Kohhran unaupi pawlin an innsang nunhar an zaangfak ih an pekmi sinan papi ih nau duhlo man ah an sang ngah lo ta. Thlacamnak hi dilnak phunkhat men ih kan ruah pang le kan dil paih lo caan, kan tul lo tiih kan ruah caan, kan hmaisong caan le kan ningzah caan tivek in caan tampi kan pelh ngah pang theu ding hi phaan a um zet. Cun hrekkhat hrangah cun aning in kan ning, kan khop ti tla si men thei. Veikhat cu saya pawl le Kohhran upa pawl zirhawknak kan neih caan ah nan duhduh thu in sut thei, kan rel khawm ding ka ti tikah in suh mi cu 'kannih Kohhran Siangbawi pawl hi innsang thlacam kan lo kawh tivek caanah cabu zoh tahrat in a cabu sungta cekci lawng nan siar ih thlah in cam sak mi cu lung kim a har deuh, di a riam thei deuh lo si. Innsang ih tulmi dil ngah lo vek a bangih insungsang pawl lungkimnak dingah mahte bet a theih lo maw' tiah ning um zet phunin in ti. Ka lung a kim tuk. Ka duh tuk. Himi thuhla ah siangbawi pawl lak khal ah pomdaan bangaw lo hnuaihni vekin kan buai phah a bangih Kohhran/Pawlpi ih duhdaan le zirhdaan ka theih tawkin ka ron rel ding. Kohhran hminih thla kan camnak a tumbik le a sangbik, hmuar a nei bik mi cu Missa raithawinak a si ih cumi sungah (Prayer of the faithful) ziangzongza thlacamnak timi in ret sak a si.  Cun Siangbawi pawlih kutkaih thluasuah peknak cabu sung khalah acuih ziangzongza thlacamnak cu hmun tampi ah in telhsak thotho a si. Curuangah cabu sungih nganvek cekci lawngin thlacam ding tinak si loin amah a caan le hmun ah thlacam daan ding sawn in zirh in ka hmu. Ziangzongza thlacam timi hi bulpak thlacam kan ti mi thawn a bang aw kan ti le a sual lo ding. Cuti si le bulpak thlacamnak timi hi Catholic Pawlpi/ Kohhran in tha a pe lo kan ti thei kem?

Tuini kan siarmi sungah mitcaw pa in 'i zaangfah aw, i zaangfah aw' a timi tawk loin 'ziang lo tuah sak ningla na duh' tin Bawipa in a sut tikah 'khua hmuhsal ka duh' tiah a sim bet. Kan tulmi, kan duhmi sim thiam ding, dil thiam ding a tul ko lo maw? Samaria nupi pakhat in a fa ih hrang Bawipai hnen zaangfah a dil lai ah 'fale pawlih rawl uico pek tivek a cang thei lo' ti tiangin Bawipan a rak sawn nan 'cabuai hnuai ih fale pawlih rawl tilfuan cu an ei thei ko lo maw' tiih a dil bet thiamnak parah Bawipan a zumnak a rak hmu si lo sawm.  Sinan, khatlam ah kanmaih lungsuak thlacamnak lawng kan thupit ter lala ahcun Bawipai thlacam zirhmi alak ah kan cang ter dingih a dungthluntu pawl thawn pehzomnak nei timi a Kohhran sungtel kan si thei lo lala ding. 

Ka ti theu mi cu— thla kan cam timi hi kanmaih lung diriam ding, kanmaih lung kim ding maw, Bawipai lung kim ding so thupi sawn tihi ruah a tul.  Bawipa le a Kohhran/Pawlpi ih zirhmi, tuahsak mi thlacamnak kan thupit ter vekin kan thinlung taktak thawn kan cam ding khal a tul tuk mi a si. Kan senlai ih ka pai rak rel dahmi ka hngilh theilo.  Khua ih kan Biakinn hi mi zapi fehnak lamzin ri ah a um ih veikhat cu kan khawm lai fangah ramvak ding papi pakhat in kan thlacam mi a rak ngai ngah ngelcel ih a mang bang tuk ti si. A rel sal mi cu 'RC pawlih thlacam cu - caw lakah naa a si, naa lakah caw a si an ti rero men' ti si. Cu ngelcel cu ziang thlacamnak saw a si ke aw tiih ka ruah sal ve tikah Angelu thlacamnak ih 'Pathian Fapa in minung a cang a si; kanmah lakah a um zo a si' ti hrawng thawn a bangaw ciah ngai cu teh! Sala a! A kei le pheiphei cu 'kanmah lakah uico a si' tin si cu ka rak cam theu. Zo hman rem sak tu khal ka nei cuang lo. In theih sak ngah lo ruangah khal si ko ding. Nehhnu pi, keimah te ka ruah thiam hnu lawngah ka rem leh sal.

Tulai mipi hrekkhat in Latin hla kan thiam nawn lo ih, mai theih lo mi tong hman rero tivek tla'n ka ti theu. Kanmai tappi tong, tual sung tong rori ih thla kan cam mi le hla kan sak mi pawl le a sullam ruat cuang ta lo. Mi laklawh men kan tam tuk! Curuangah Pathian thawn kan dawr awk nak, kan pawlkomawk nak ah hin kan thinlung hi a thupi bik. Kan thinlung muril thawn thin nem, thin niam zet le thinlung tlaitluang zetih Bawipa thawn titi-kaka thei ding hi kan hmabak cio ko ding. Thlacamnak timi hi Bawipa thawn thunuam rel tlang nak tiih kan hman thei tikcu caan ah cun zo si thlacam pelh siang ding. Awkam thiam lo, tong mal zet pawl hman in thu nuam rel cu kan khop thiam cuang lo theu. Kawl zatcian minta YeMinPaing le ih zatlan pakhat ka von mang sal. YeMinPaing cu mi tong mal tuk a si bangin mintami thawn thunuam rel le duhthu sim awk ti khal um cuang lo in an um tlangih nau an nei ta. Tong hman thiam hrihlo naute a cawi ve tikah naute cu a biak, a lom zawngah mintami a ra thlengih ka lo duh tin duhthu a rak sim ngah rualri. Cuihnu cun thunuam rel tlang in an innsang a hlunghlai ta a si.

Duhdawtmi zumtu u le nau, Pathian innsang sungtel kan si vekin amah thawn thunuam kan rel tlang thei lawngah kan innsang a hlunghlai ding a si. 'The family that prays together stays together' tiah mirang in an ti. Thla a cam tlangmi innsang cu a um tlangmi innsang a si. A um tlang theilo mi, a hlunghlai lo mi innsang kan si pang maw? Kan innsang cio hi Pathian thawn titi-kaka, thunuam reltlangnak hmun a si thei nak dingah ziangtin thla kan cam ding ti kan thei lo caan khalih ai le hrum in in bawm tu a Thiang Thlarau in thazang thar thawn lam in hruai hram seh law. Amen.