Na Biakinn Thianghlim Ter Aw

"Na Biakinn Thianghlim Ter Aw"

Feast of Saint Cecilia  (November 22, 2019 - Friday)

Readings: 1 Maccabees 4:36-37, 52-59 / Lk 19:45-48 

    Thuthangṭha a ngai tu Bawi Khri ah duhdawt mi u le nau pawl, Pathian ih thluasuah: thinlung deihnak le taksa-thlarau damcahnak pawl nan hnen ah um ringring hram seh tiah thlacamnak thawn ka lo cibai hai a si. Tu ni November ni 22 (tlawngkai ninga) ni hi St. Cecilia ih puai ni a si vekin St. Cecilia hmin a la tu pawl hrang ah a cuangce in thla kan sak cio pei ti ah ka lo sawm duh.

    Tu ni kan siar ding mi Gospel thuthangṭha cu Luke 19:45-48 tiang a si ih ka lo siar sak ta hrih pei ih Pathian ṭongkam ngai tlang ding in ka lo sawm. 

Lk 19:45-48

⁴⁵Cun Jesuh cu Biakinn sungah a feh ih thil zuartu pawl kha a dawi ṭheh.

⁴⁶ “Ca Thianghlim sungah Pathian in ka Biakinn cu thlacamnak inn tiah kawh a si ding ati. Asinain nannih cun fifir pawl relhnak kua ah nan canter!” tiah a kawk hai.

⁴⁷Nitinte in Jesuh cun Biakinn sungah thu a zirh. Puithiam upa pawl, Daanthiam pawl le hotu pawl in Jesuh cu thah an duh.

⁴⁸Asinain an thah theinak ding lamzin an hawl thai lo, ziangahtile mi hmuahhmuah in a thu simmi cu ṭongfang pakhat hman hrelh lo in ngai an duh.

(Jesuh Khrih ih thuthangṭha asi.)

            Tuni kan siar mi Gospel: Jesuh in Biakinn a thian fainak thu kan siar tin in -  a pakhatnak ah kut ih sak mi kan biakinn pawl hi Pathian biaknak, thlacamnak inn a si vek in upat le thianghlim te ih ret a ṭul zia le a pa hnihnak ah Thiang Thlarau ih biakinn a si mi kan ruangpum, kan taksa khal thianfai kan ṭul zia pawl a thar in kan mang sal ṭheu.

Biakinn hi Pathian biaknak ding hrangih a cuangce ih sak mi a si vek in Biakinn kan pan tik ah Pathian biak le thangṭhat ding ngaingai tum tah nak nei in kan pan a ṭul. A caan caan ah kan dai thlang ih khawm lai ah thil va ei men, thunuam rel men, Pathian biaknak thawn a penzom aw lo mi thil dangdang tuah men ti vek in khal kan um ngah pang ṭheu. Cu tin kan daithlang pang a si le tu in Gospel kan siar mi sung ih sin Jesuh ih ṭongkam kan mang sal pei. Lk 19: 46 “Ca thianhlim sungah Pathian in ka Biakinn cu thlacamnak inn tiah kawh a si ding ati. Asinan nannih cun fifir pawl relhnak kua ah nan canter!” tiah a kawk hai – a ti. Biakinn ah kan feh tik ah upat nak thawn ṭha te ih thla a cam thei tu Pathian a piak thei ringring tu kan si nak ding in zuam cio uh si.

              Cun Biakinn kan ti tikah St. Paul ih in sim mi vek in kan ruang pumpi khal cu biakinn a si. 1 Korin 6:19 ah ‘nan ruangpum cu Thlarau Thianghlim biakinn a si ti nan thei lo maw? Cuih Thlarau cu nan sungah a um ih Pathian ih pekmi a si. Nannih cu nanmah ih ta nan si lo, Pathian ta nan si. Man pek ih leimi nan si. Curuangah nan taksa cu Pathian sunlawinak ah hmang uh.’ a ti. Kan ruang pumpi hi Thiang Thlarau ih biakinn a si. Kannih cu kanmah ih ta kan si lo ih Pathian ta kan si. Kan nih in in nei te kan nei ih curuangah kan mah duhduh in kan nung thei lo, in nei tu ih duh vek in kan nung a ṭul. Kan taksa hi in nei tu kan Pathain ih hmin sunlawinak ah a hmang thei tu kan si nak ding in kan zuam cio pei. Cun 2 Korin 6:16-17 khal ah Pathian ih biakinn kan sinak thu le a thiang lo mi, a ṭha lo mi pawl hrial ding in in sim bet a si. 1 Korin 3:17 ah ziang tin ralrinnak in pek a si tile – “Curuangah zokhal hih Pathian biakinn asiatsuahtu cu Pathian in a siatsuah ve ding. Ziangahtile Pathian biakinn cu a thianghlim ih a biakinn cu nanmah hi nan si” – a ti. Pathian biakinn a si mi taksa a siatsuah tu cu Pathian in a siatsuah ve ding. U le nau pawl kan mah le kam mah a siat suah aw tu kan si lo dingin kan ral ring a ṭul a si. Kan ei mi, kan in mi, thil kan tuah mi pawl in kan taksa siat cu lo mi a siat ter , thi cu lo mi kan thi a si le Pathian biakinn a siatsuah tu kan si lo maw? Ruat cio uh si. Kan ei mi kan in mi kan tuah mi pawl in kan taksa Pathian biakinn a siatsuah maw a dam ter ti hi thuk zet in ruat sal cio ding ah ka lo forh duh asi. 

               Bawi Khrih ah duhdawtmi u le nau pawl, tu in thuthangṭha kan kan ngai, kan ruat tlang nak thawng in tun hnu lam ah a tu hnak in kut ih sak mi Biakinn pawl upat thiam tu le Biakinn sung ah ṭha ten Pathian a biak thei tu, thla a cam thei tu kan si ding in le Thlarau Thainghlim ih biakinn a si mi kan taksa khal Pathian duh nak vek in a hmang thei tu si ding in zuam cio uh si. A ngai tu nan zate par ah lungawi nak tampi ka nei. Pathian in a thar in lo thluasuah hai hram seh. 

Fr. Peter Lal Zin Thang

Hakha Diocese

November 22, 2019