Pathian hnen ih lungawi thusimnak

Homily for Thursday (28/11/2019)

Bawi Khrih ah duhdawt zetmi nu le pa, u le nau pawl, “kan Bawipa Jesuh Khrih ih zaangfah lainatnak, Pa Pathian ih duhdawtnak le Thlarau Thianghlim ih pawlkomnak pawl cu nanmah thawn um sehlaw” tiah cibai ka run lo buk hai. Tuihni cu 2019 kum, November thla ni 28, Tlawngkai nilini asiih America ram ih lungawi thusimnak ni asi. Calendar sungah siar dingin in thiahmi Bible pawl cu Daniel 6:12-28 tiang asi. Thuthang ttha sung ihsin cun Luka 21:20-28 tiang asi pei. Tuihni ah kan ruah khawm dingin ka hrilmi US pawlih “Thanksgiving day” asi vekin “lungawi thusimnak” ti thu asi. 

American pawlih Pathian hnen lungawi thusimnak cu kumtinten November thla zarh netabik ih Tlawngkai nilini ah an rak tuah theu. A Cumi puai cu 1789 kum ah an ram ih President a rak ttuan dahtu Mr George Washington nih rampi dinhmun in tuah dingah thu a suah dah ruangah asi. A cu hlan ah tla cun mahih khua dinhmun cio in an rak tuah dah asi. US ram ah a hmaisabik Lungawi thusimnak tuahtu pawl cu French le Spain miphun pawl ansi ih 16 kumzabi ah an tuah hmaisabik asi tiah thuanthu record ah kan hmu thei. Virginia ram ah hmaisabik a rak thleng dahtu cu Mr. Jamestown a rak siih “hi tawk ram ah Pathian in umnak hmun i pek asi tiah lungawi thusimnak cu AD 1607 kumah a tuah asi. 1619 kum ah tla English miphun minung 38 pawlin, Virginia ram Berkely Hundred ah khua an to ih cungnungbik Pathian hnenah lungawithu simin “Virginia ram cu thianghlim tein kilkhawi ringring dingah kumtintein Pathian hnenah lungawithusim dingin” thu an kam asi. Hlan lai ahcun himi lungawi thusimnak puai cu November thla ih Zarh netabik Tlawngkai nilini ah an tuah ttheulo nain 1942 ihsin thokin cun American Thanksgiving ni cu Noverber thla ih Zarh neitabik Tlawngkai nilini ah tuah dingin a ni an thiah lawlaw asi. An tuah sannak ih a sullam cu a tir ahcun Thlai thar petu Pathian hnenah lungawi thusimnak a rak si dah nain 1939 ah US president Franklin nih cun “Vancung ih a ummi kan Pa hnenah lungawi thusim dingah le amah thangtthat cio dingah November thla ih Zarh netabik tlawngkai nilini cu rampi ih holiday siseh” tiah thu a than asi. Cunah ihsin thokin US Thanksgiving Day kha a cang tata asi.

Bawi Khrih ah duhdawtmi nu le pa, u le nau pawl, tuihni kan siarmi Prophet Daniel 6:12-28 sungah Daniel cu kiosa rawl ah an paih nain kiosa pawlin an deh thatlo ih Cungungbik Pathian in humhim peknak asi tiah ram uktu Siangpahrang Darius in Pathian a thangtthat asi. Siangpahrang Darius in “ka ram sung mi hmuahhmuah in Daniel ih Pathian cu upat ding le ttihzah dingah thu ka pek zo. Amah cu a nungmi Pathian, kumkhua in a hmunmi Pathian asi. A uknak cu siatsuah asilo dingih a huham cu a cem ni a nei dah lo ding. Miruntu le mihumtu asiih lei le van khuazakip ah mangbangza le khuaruahhar a tuah zo. Kiosa kaa sung ihsin Daniel cu a hum asi” tiah Daniel 6:26-27 ah Pathian a thangtthatnak thu kha fiang zetin kan hmu thei asi. Daniel parih Pathian ih tthatnak a hmutu khawvel ram uktu siangpahrang Darius nih Pathian parah lungawi thu sim in Pathian a thangtthat thei asi. A ram sungih milai pawl tla in Pathian an zumlo hmanah a cahnak le a huham cu an hmu thei asi. 

Lungawi thusimnak timi cu Greek ttongin Eucharistia anti ih Mirang ttong in cun “Eucharist” tiah asi. Asullam cu “Thanksgiving” tiah asi. Missa raithawinak cu Greek ttong in “Eucharistia” asiih Mirang ttong in cun “Mass asilole Eucharist” tiah asiih Bawipa ih mi a rundam ruangah Bawipa hnenah lungawi thusimnak” tiah kawh theih asi. Ziangahtile siangpahrang David in Ps 116:12-13 “Ka parih A tthatnak ruangah hin Bawipa cu ziangso ka pek ve ding? Bawipa in i run ruangah A hnenah in ding thawinak ka pek dingih a hmin ka ko ding” tiah kan siar thei. Mirang Bible ahcun “How can I thank the Lord for his goodness to me? I will raise the cup of salvation and call upon the name of the Lord” tiah fiang zetin kan hmu thei. Kan Falam Bible ahcun a famkim deuh lo in ka hmu asi. A bikbik ah caang 13 ah “Bawipa in i run ruangah A hnenah in ding thawinak ka pe dingih A hmin ka ko ding” timi cu a ngaingai ahcun “Bawipa in i run ruangah A hnenah rundamnak khuat-haai kengin A hmin ka ko ding” tiah let sehla ka duh deuh ngaingai asi. Bawipa cu siangpahrang David parah a tthat tuk ruangah ral nehnak huham cahnak a pekih a nunnak cu a humhim ringring ruangah Pathian hnenah lungawi thu simnak thawinak a pek asi. Cutin lungawithu a sim tikah siangpahrang David in Pathian hnenah rundamnak khuat-haai keng in, rundamnak khuat-hai khai in, rundamnak khuat-hai thlir in Bawipa hmin a ko asi. A hmin ko timi (kawl ttong in cun “naamah daw koe patthanaa pyuh myi” tiah asiih “patthanaa” timi a sullam cu “lungawi thusimnak, thangtthatnak le thlacamnak’’ hmuahhmuah a tel asi.

Kan nunnak sungah kan parah Bawipa ih tthatnak cu zonihso kan siar cawk ding? Bawipa nih in serhsiam, in kilveng, rawl le tidai le nunnak in pek, kan thlacamnak in run ngai ih kan ttulsammi pawl in pek, ttihphannak le harsatnak ihsin humhimnak in pek, camibuai kan aung, kan tuahmi sipuazi a kai, kan hnattuan in hlawhtlinter, ramthum ram lamah kan thlen thei, khual kan tlawngih kan lam a tluang,,,,a dang siar cawklo in Bawipa nih thluasuah in run toih lai asi. Kha tin thluasuah kan co tikah Bawipa hnenah lungawi thusim thiamtu paziat kan um? Inn lamah puai tuah in maw Bawipa hnenah lungawi thu na sim? U le nau pawl ruat uhsi. Inn lamah puai tuahin lungawi thusim cu ka kankuatlo nain Biakinn ih Missa thawinak ah thluasuah dil talo in lungawi thu na simmi cu 100 sung ah 100 ka lo kan kuat. Fr. kah dawh “NO” par asiko. Mass na dil tik khalah tirh fak emem in um hlah aw. Tirh siang zetin lungawi thusimnak Mass dil aw. Lungawi thusimnak ah Mass thawn lungawi thusimnak a ttul zia malte ka run lo sim bet duh. Luka 17:11-19 kan siar tikah miphar 10 cu Bawipa Jesuh in damnak a pek tikah Samaria timi pakhat pa lawng nih Bawipa Jesuh hnenah lunagwi thusim dingin a ra kir sal. Bawipa Jesuh in “Damnak a ngahtu cu minung 10 ansilo maw? a dang 9 pawl teh khui ahso an si thluh” tiah a ti asi. Bawipa Jesuh cu Missa thawinak ah a um ih a umnak ah feh tahratin lungawi thusim cu ziang tluk inso a thupi tinak asi. 

Bawipa hnenah lungawi thusim thiamtu pawl parah Bawipa nih thluasuah lo toih sinsin hram seh. Lunagwi thusim thiam deuh hrihlo tu pawl tla lungawi thusim thiam sinsin theinak dingah Bawipa nih thinlung khaw tleunak thluasuah lo pe hram seh. Inn lam ah puai tuahih lungawi thusim hnakin Mass thawinak ah khawmin lungawi thusim thiamtu rak si hram uhsi.