Bawi Jesuh ih a rung ttumnak phun thum

ADVENTUS ZARHPINI 1 NAK (KUM 1)

Isaiah 2:1-5

Ps 122:1-2, 4-5, 6-7, 8-9

Saam asawn/ “Pathian ih inn ah feh uhsi” in ti tikah ka lung a awi.

Roman 13:11-14

Mt 24:37-44

Bawi Khrih ah duhdawt zetmi nu le pa, u le nau pawl, tuihni cu 2019, December tla ni khatni asiih nan zatein “Sweet December” tiah cibai ka run lo buk hai. Nan zaten biakinn lamah panin Amah Pathian kan biak tlang thei cio nak dingah thla za ka run lo cam sak hai. Tuihni ih kan ruah khawm dingmi cu “Bawi Jesuh ih a rung ttumnak phun thum” asi pei.

Tuhni cu kan thei cia vekin “Liturgical year” timi Pathian biaknak caan kum thar ah kan thleng sal zo. Adventu kan ti tikah Zarhpi voili kan nei asi. Zarhpi a voikhatnak ahcun Bawipa a ratsalnak thu, Zarhpi a voihnihnak ahcun sualsirnak thu, Zarhpi a voithumnak ahcun lungawi aipuannak thu, Zarhpi a voilinat ahcun Emmanuel Bawipa cu kan hnenah a ra rero zo asi ti thu pawl kan siar ding asi.

• Kan Bawipa Jesuh a rat ding kan hngak rero lai fangah Bawi Jesuh cu hi leitlun ah phun thum in a rung ttum asi ti kha ruat cio ding kan si. 

(1). Bawipa Jesuh a voikhatnak in a rung ttum lai ah mi zapi in thin sau zetin an hngak-hlap asi; A voihnihnak in a rung ttum tikah cun an hngak-hlap zetmi Pathian ih uknak ram laksawng cu an co ding asi.

(2). A voikhatnak in a rung ttum lai ah thawhnak le cemnak neilo, a kum khua Pathian hnen ihsin a rung ttum ih zo hmanin thei banlo in dai zirziar tein a rung ttum asi; Avoihnihnak in a rung ttum tik ahcun minung hmuahhmuah in an hmu ding asi; a rung ttum asi ti an theih theinak dingah vancungmi pawl in tawtawrawt an phawt ding asi.

(3). A voikhatnak in a rung ttum lai ah caw rawl einak kuang sungah thinniamnak thawn thlimnak tuarin puan paa te thawn an tuam asi; a veihnihnak in a ratsal tik ahcun a sunglawi mi le tleunak thawn a khahmi thuam thawn a ra ding asi.

(4). A veikhatnak in hi leitlun ah a rung ttum lai ah Bawi Jesuh cu nautatnak puan senpi an hruk terih “Judah miphun pawlih siangpahrang nasi” tiah funghreu thawn vuak tuar phahin mipi nih an zawmtai asi; a veihnihnak in Bawipa Jesuh a rat tik ahcun nautatnak puansenpi cu a sunglawimi nehnak puan ah a cang ding, an vuaknak funghreu cu uknak thirfung ah a cang ding, “Judah miphun pawlih siangpahrang na si” an timi cu lei le van uktu, hrin le hnam tinkip, nung-hring hmuahhmuah ih Siangpahrang ah a cang ding asi ih a uknak ram cu a cem dah lo ding asi.

(5). A voikhatnak in a rat lai ah thinglamtah phurin a cuih thinglamtah parah ningzahnak phunkim a tongih thahnak a tuar dah asi; a voihnihnak in a rat sal tik ahcun vancungmi hmuahhmuah in Bawipa Jesuh cu an hruai ding, an rungttum pi ve dingih sunlawinak le thu neihnak huham thawn miphun hmuahhmuah cu a hnenah a ko khawm ttheh ding asi.

(6). A voikhatnak in hi leitlun ah a rungttum lai ah zaangfahnak neilo in thinglamtah parah thi dingah mipi in a thu an tthen; a voihnihnak in a rungttum tik ahcun Amah Bawipa Jesuh rori in zaangfahnak nei ve thunglo in mipi kha thu a tthen ding. Bawi Jesuh cu a sunlawinak le huham cahnak thawn a rat sal tikah mi ttha (mi zaangfah thiamtu pawl) pawl cu a vorh lamah misual pawl (mi zaangfahnak neilo pawl) cu a kehlam ah a ret ding. Mi zangfahnak neilo tu pawl cu kumkhua hell ah a thlak thluh ding asi tiah (Mt 25:31-46) ah kan hmu thei. Curuangah “Zaangfahnak a neilo mi pawl parah Pathian in an thu a tthen tikah zaangfahnak a nei ve lo ding” tiah (James 2:13) ah Bible nih in zirh fiang.

• Bawipa Jesuh a voikhatnak a rungtumnak le a voihnihnak in a rung ttumnak kar lakah kanmah hnenah a veithumnak in a rung ttum asi. A cumi a voi thumnak in a rung ttumnak cu:- Missa rai thawinak thawn siseh, a puithiam pawlin Sacrament an tuah tikah siseh, a Thlarau Thianghlim thawn siseh, Bible kan siarnak ah siseh, Amah hmin thawn mi pathum pali komin thla kan cam tikah siseh, Duhdawtnak kan nei tikah siseh, zaangfahnak thawn mi harsa kan va bawm caanah siseh Bawipa Jesuh cu kan hnenah a rung ttum ttheu asi.
• Tuihni kan siarmi Bible a voihnihnak cu ruat khawm tlang ding ka run lo sawm bet duh. Rome 13:11-14 ahhin “Himi cu nan tuah hrimhrim a ttul, ziangahtile nan ihnak ihsin nan tthang caan a thleng zo, ti nan thei. Rundam kan sinak ding caan cu hmaisa kan rak zum pek lai hnakin a tu ah a nai sinsin thlang. Zaan a cem zik thlang. Khaw thim sungih hnattuannak pawl cu bansan thlang uhla khawtleunak sungih raldonak hriamnaam lak uhsi. Sun khawvang ih a ummi kan si bangtukin kan nun ziaza cu mawiter thlang uhsi: awn-au celcel le zuri sabah in um nawn hlah uhsi; nupa sual tuah le zo mawilo in um nawn hlah uhsi; sual awnak le nahsik aw khalin um nawn hlah uhsi. Kan Bawipa Jesuh Khrih kha ralthuam vekin hruk uh; tisa duhnak le hiarnak pawl cu bansan thlang uh” tiah Paul in Adventu caan hmaisabik Zarhpini ah in sawm, in forh asi. Asi a dik asi. Kan rundamnak ni sunglawi cu a nai taktak zo asiih sualnak a phunphun tlansan in Bawipa kha hmuak uhsi; thinlung thianhlimnak thawn le tangdornak thawn hmuak uhsi. Kan thinlung puar thaunak pawl cu tlang vekin a saang asi ahcun tangdornak thawn tthum uhsi; horkuam vekin a khuarmi pawl cu duhdawtnak thawn silh uhsi; kan thinlung kel kawimi pawl cu dingnak le felnak thawn dingter uhsi. Khawm lamah daithlang lo tein zuam uhsi. Tuihni ih Psalm a sawnnak sung vekin “Pathian ih inn ah feh uhsi” tiah midang pawlin in sawm tikah lungawi zetin Biakinn ah va pan uhsi. 

+Bawipa in a tharin in run thluasuah hram seh.