Huham khuiah a um?

“Huham khuiah a um?”

Advent 1st Monday Homily (December 2, 2019)            

Readings: Is 4:2-6; Ps 112:1-9; Mt 8:5-11

            Tuini kan Cathianghlim sungin ruah khawm dingah 'Huham khuiah a um?' tin thu tlangpi ron tar ka duh. Hi thutlangpi thawn pehpar aw in veikhat ih ka hmuh tonmi ngaingai cu si deuh lo nan tetti khannak thu ron lo sim hrih keng. Methodist pastor pakhat in 'Pathian thu, Zumnak thu le Pawlpi fehdaan pawl rel tlang ka duh ih ka lo sut le a ngah pei maw' i ti tikah ngah tuk e, a ngah law law; mahlawngte nangmah lam sawn thudik ka lo sim ngah le na thin heng ding ka phang ziangahtile a si daan rori le ka theih vek cekci in ka lo sim ding ho khaw ka ti ve ih a ngah tuk ko tin i sawn ve. Cucun Naute Baptism thu tivek pawl kan rel, kan rel ih Bawipai Zanriah thu kan thlen tikah keimah sawn mangbang in ka um riangri. Ziangruangah tile, annih pom daan ahcun amah hngilhlonak ih an tuahmi a si ih a THI le SA tin cun an pom lo; kannih cun amah hngilhlonak ih kan tuahmi kha a THI le SA rori ah a cang tin kan zum. Asinan i sim bet mi cu Bawipai Zanriah ih huham neih zia kha a si. Ziangtin i ti tile amah hngilhlonak ih kan tuah tikah a thawm huham in ama'n in umpi taktak ih a cahnak a lang rori; Bawipai Zanriah an einak ruangah kut zeng, ke zeng, natnak phunphun in an dam ih tetti an khan lai ka mit rorin ka hmu i ti. A va mak ngai ve aw! Catholic zumtu pawl in a THI le SA ti rorin kan zum si khaw kei ka hrangah ziangtin huham a nei ti ka ruah sal tikah keimah le keimah mawhthluk awk ding lam, ka sambaunak, ka zumnak malzia ka thei awk tikah ningzak mangbang in ka um riangri. Sinan tha nau sawn lo in thazang laknak lam sawn ah hmangin tuini tiang khalah Bawipai THI-SA thu relnak a um tinten hi thu rel lo in ka um thei lo ta.

            Tuini kan Cathianghlim le Bawipai THISA a pehpar aw lo tin tla kan ruat men ding nan Bawipai THISA thawm-huham ruah tlang ka duh ruangah a si. Ziangahtile himi hi Pawlpi/Kohhran nunnak Thihri, kan zumnak ah siseh, zumtui nunah siseh, a thupi bik, a tumbik, a sangbik, a thukbik, a bikbik ih kan ret mi a si kan ti rero nan kan nundaan ah a lang fiang thei hrih lo in ka hmu. Bawipai THISA ih thawm-huham, mangbangza tampi a um ko nan cumi pawl kha ka rel duh sawn mi si lo'n cuih mangbangza pawl hi kan zumnak ruangah a cangmi a si ti sawn kha rel ka duh. Ahrekkhat cu kan zumnak a mal tuk ruangah kan rinhlelnak hngetkhoh ter dingih langnak khal a um thei ko. Asinan kanmaih nunnak taktak ih a thawm-huham/ cahnak lang dingah cun kan zumnak rori hi a thupi bik a si. Tuini kan Thuthangtha sunngih Rom ralbawi ih hnen um damnak a ngah daan kan zoh tikah a bawipai zumnak ruangah a si ti fiang ze tin kan hmu thei. Zesuh in "inn ah va tlung awla na zumnak vekin tuah sak na si ding" a ti. Cuih a zumnak cu ziangvek a si? A hnenum dam ter dingih Bawipai hnen a dil laiah Bawipa in 'ka ra kei ka dam ter kei cu' a ti tikah anih in "Bawipa, nangmah rori ka inn sungih luh ding cu kei tlak hlah'ng khaw. Damnak thu pe awla ka hnenum cu a dam vurvi mai ding a si ning ..." ti rori kha si. Tuisun tuini tiang hi Rom ralbawi ih zumnak tongkam te hi Missa Raithawinak thlacamnak sungah Bawipai THISA kan san hlante ah kan hmang theu, kan cam theu a si. Hi thlacamnak hi thinlung muril ngaingai in kan cam thei maw ti hi mah le mah sut aw sal ka duh. 

            Ka sim theu mi cu ziang a si tile Bawipai THISA hi zo khal a sang tlak kan um lo. Athianghlim bik mi Bawipa kan thinlung, kan taksa sungih luh ter ding zo vek minung so ka tlak a ti ngam ding. Asinan a um lo mi um tertu, a thiang lo mi thiang tertu Bawipai tongkam pa khat te lawng si lo maw kan sam.  Sualsirnak taktak thawn hi thlacamnak hi kan cam ah cun Bawipa hmuak ngam ding kan si lo maw.  Zumtu tampi, ahleice in, laitlang khawte lam siangbawi umlo nak hmunih ka ton theumi cu sualthlahnak sacramentu sang hmaisak lo in Bawipai THISA sang lo ding timi kan zum, kan sang luan tuk deuh a bang ka ti theu.  Zarhpi karkhat/hnih kaan ih siangbawi ih in tlawn khal le sualthlahnak ngah hmasak lo cun Bawipai THISA sang ngam lo kan tam theu.  Sualpi ngaingai kan neih lo tlaih cun sualsirnak taktak thawn Bawipai THISA sangih thianhlimnak ngah ding sawn kan si. Asinan a cang thei ah cun thla hnih/thum ah vei khat tal cu sualthlahnak ngah tum ding cu a tul hrimhrim ko. Sualthlahnak ka tul ti lam ih kan ruah awk ah cun mah le mah thei aw lo, mibum, mi-aa kan si pang ding. Khatlam ih zoh tikah a daan fangih kan fehnak tla a tam phah ding tin ka ruat. Theihfiangnak le zumnak ngaingai tel lo ih Bawipai THISA a sang thei dinhmun ih kan um ruangih sang menmen kan tam phah zum a um. Curuangah habit timi nitin kan hman kel, daan men fang cun ziang huham hman a um lo ding tin ka ruat theu. Nikum lam ih Pope Bawipai relmi thu larzet pakhat cin tlak mi a um. 'Veikhat ah zingtin Missa kai thei mi nu-pi pakhat cu a na ih Missa a kai thei nawn lo ruangah siangbawipai hnenah amah veh ih Bawipai THISA pek ding a dil ti si. A siangbawipa in ziang a ti tile kei na inn ih rat rero tul lo pi, na lei a sau tuk ko ih na inn sangka te in na lei rak suah aw la Biakinn in Bawipai THISA ka lo pe mai ding a ti' ti si. Missa a kai mi hnak in mi a rel siat nak a tam sawn ih veng thlang, veng sak deng tiang thusia thleng tertu a lei sau zia a khih hmuh si ko lo ding maw! Curuangah a daan fang men in si lo'n zumnak taktak thawn Bawipai THISA sang in Bawipa thawn kan nun tlang ding a thupi zet. Cun khat lam ah le Bawipai THISA sang thei lo dinhmun ih um tu pawl hrekkhat cu athupi bik mi Bawipai THISA sacramentu hman ka ngah thei lo cun ziang hman san a tlai lo pi tiih zumnak thlauthlak tum sawn tla kan um. Cumi khal le zumnak ngaingai, zumnak diktak neih lo ruangah a si sawn. Ziangahtile a huham cu kan san theinak le san theilonak parah si sawn lo in kan zumnak par sawnah a um a si. A sang thei lo dinhmun ih kan um ruangah mah le mah thei aw in thinniamnak le upatnak thawn sang lo ih kan um mi khal zumnak dik tak a si sawn thei a si.

            Thunetnak ah huham timi cu zumnak parih um mi a si ruangah Bawipai THISA a sang theilomi pawl khal in zumnak taktak thawn biaknak nei in kan thlacamnak hlawhtling hram seh la, a sang thei mi pawl khal in a daan fang men ih sang si lo'n zumnak taktak thawn sangin kan nunnak ah a huham cahnak, a sunlawinak lang ter thei dingin kan tulsam mi zumnak thluasuah, thlarau thluasuah cu a ngai tu kan zate par ah a thar in thleng hram seh law.