Pope Francis in pawlkom sungah  kum upa (Pitar/Putar) pawl ih thupitnak thawn pehpar in zirhnak thar thok.

Pope Francis in pawlkom sungah  kum upa (Pitar/Putar) pawl ih thupitnak thawn pehpar in zirhnak thar thok.

          Pope Francis in St. Joseph ih nunnak hmangin zirhnak a neihmi a theh hnu ah, kum upatnak ih sullam neih zia le man neih zia thawn pehpar in zirhnak thar a thok zo a si. Duh lomi cu hlon hluahhlo ding timi ruahnak ruangah kum upa pawl khal hai daihlo mi phur-rit vekin a hnong rero mi tulai san ih minung pawlkom umdaan thawn pehpar in a thin a nat zet thu, leilungpi hin san khat le san khat a komfektu thil a hmuhsuak sal ih, misenpi hrangah kum upa pawl ih man neih zia thathnem zia khal a theihpi a tul thu pawl Pope Francis cun a sim. Tubaite kum hnih sungih pulhnat a suak rero mi thawn pehpar khal in, Pope Francis cun, “A tu hi kan santhar mino pawl hin a hlan vek hnakin lamhmuhnak an tul ih, kum upa pawl hi an hmailam caan hrang lamzin sialsaktu dinhmun ih an upat thiam a tul” ti’n a sim bet. Hi zirhnak thar ih a simmi pawl a tawi zawngin kan run tarlang ding:

Duhdawtmi u le nau pawl,

           Tuini in zarh tin kan tuahmi thuzirhnak ah Pathian ih tongkam ih in zirhmi sirhsan in, kum upatnak ih sullam le manmual neih zia thawn pehpar in zirhnak thar kan thok thlang a si. Sansaunak a thang sinsin vekin kan pawlkom sungah kum upa an tam deuhdeuh ve. Curuangah san khak le san khat ih pehtlaihawknak hi tha te’n kan ruah that sal a tul. A tul lomi cu hlon hluahhlo mai ding timi ruahnak ruahnak ruangah kan pawlkom hin nonawn thalai cahnak lawng a cawisang ih kum upa pawl tla cu hai daih lomi phur-rit vekin a hnong. Curuangah kan hringnun ih kan hmanmi caan hin kum upa pawl hnenah thlarau lam thathnemnak ziang tluk a suahpi thei timi le kum upa pawl in kan pawlkom hrangah ziang vek thiltha in somdawl thei timi tha te’n kan ruah khawm ding a thupi. 

          Himi ruahnak thawn, kan tesinfa pawl hrang ruat phah in, san khat le san khat ih pehtlaihnak a kaifektu le a nemhngettu thil hi ziang a si timi kan hawlsuak a cu. Profet Joel khal in tikcu caan thawn pehpar in hiti’n a rak ti dah: “Kum upa pawl in mang an man dingih mino pawl in langnak an hmu ding”. Tui pulhnat a tlun tum vek caan ahhin, hmailam hrang ruat in mino pawl ih cangvaihnak ah fimnak thawn lamhmuhnak, ruahsannak le phurnak thawn bomnak pek ding a thupit zia kan hmu thei. Himi thu kan ruahkhawmnak ah, kum upa pawl in dingnak le unau duhdawtnak thawn a khatmi pawlkom dinsuahnak ah ziang tlukin thathnemnak an nei timi theithiam le upat thiam dingin Thiang Thlarau hnenah bomnak kan dil cio pei. Tuini tonkhawmnak ah a teltu, Mirang tong a hmangtu mikhual pawl, a hleicein, England, Ireland le US ihsin a rami pawl cibai ka lo buk hai. Nanmah le nan innsang cio parah kan Bawipa Jesuh Khrih ih lungawinak le daihnak thleng hram seh. Bawipa in lo thluasuah cio hram seh!

https://bit.ly/3tgLbfY