Bawipai Zirhmi Thluasuak (sim tu - Rev. Fr. Peter Zin) February 15, 2022

“Bawipai Zirhmi Mi Thluasuak”

Thuthangtha sim tu - Rev. Fr. Peter Zin

2022 Feb 15 (Tlawngkai nihnih) 

“Maw Bawipa, nangmah ih nun na zirhmi le, na daan na zirhmi pawl cu mi thluasuak an si.”

            RVA Falam service in thuthangṭha a ngaitu Bawi Khrih ah duhdawtmi nu le pa, u le nau pawl, Bawipa pek mi hnangam daihnak cu nan hnen ah um hram seh. Tuni kan siar dingmi Bible pawl hmangin “Bawipai zirhmi pawl hi mi thluasuak” kan sinak thu ruat tlang in thlarau thazang kan lak tlang ding in ka lo sawm duh. Kan siar dingmi Bible catlang pawl cu veikhat siarnak ah Jeim 1: 12-18 tiang, Saam kan siar dingmi ah Saam 94: 12-15, 18-19 a si ih a sawnnak ah “Maw Bawipa, nangmah ih nun na zirhmi le, na daan na zirhmi pawl cu mi thluasuak an si,” tiin a si ih tuni kan ruat tlang dingmi hi himi Saam asawnnak ta ka rak lak mi asi. Kan siar dingmi Gospel cu Marka 8: 14-21 a si. A tu ah Gospel siarnak kan nei ta hrih pei ih ngai tlang ta hrih uh si.

Marka 8: 14-21 

            Dungthluntu pawl in sang ken an hngilh ih lawng sungah sanghlom khat lawng a um. Jesuh in an hnenah, “Farasi mi le Herod ih thilnu kha ralring uh,” tiah a sim. Annih in, “Sang kan neih lo ruangah a si, hitiih in ti,” tiah pakhat le pakhat an ti aw. Cumi cu Jesuh in a thei ih an hnenah, “Sang nan neih lo thu cu ziangahso nan rel rero? Nan thei thei hrih lo maw? Cutluk in maw nan ruah ban lo? Mit nan neih si, nan hmu thei lo maw? Hna nan neih si, nan thei thei lo maw? Mi thawngnga hrangih, Sanghlom nga ka phel kha nan cing nawn lo maw? An hlahmi sang bawm ziangzatso nan sar kha?” a ti. Annih in, “Bawm hleihnih,” tiah an ti. Jesuh in, “Cun minung thawngli hrangah sanghlom sarih ka phel tikah an hlahmi bawm ziangzatso nan sar kha?” tiah a sut. Annih in, “Bawm sarih,” tiah an ti. Jesuh in, “Cuih hnu khalah nan thei thei hrih lo maw?” tiah a ti hai.

(Bawipa ih thuthangtha a si.)

            Leitlun kan nun sung ah kan ṭulmi fimnak thiamnak pawl a phunphun in kan zir ṭheu. Fimthiamnak kan zir tikah a hmaisabik ih zirhtu pawl cu nu le pa an si ṭheu. Nu le pa pawl in ṭong in zirh, rawl ei daan, ni puan fen daan tivek in a phunphun an ti thei tawk in zirh ih cu hnu ah tlawnginn lam ah fimthiamnak zir kan peh bet. Tlawnginn siseh, boarder tlawng siseh kan feh kan kai tik ah hril theinak a-khuinh-a-yi kan nei a si le cu a ṭha an ti mi deuhdeuh hril kan duh, zirhtu saya/sayama a ṭha deuh an tinak ah feh kan duh zir kan duh. Tlawng ca lam lawng siloin a Dangdang thimnak pawl kan zir tik khal ah zirhtu ṭha hi kan hawl ṭheu ih a ṭha bik tiin kan hmu mi kha kan pan duh ṭheu. Ziangruangah tile zirhtu hi a thupi tuk. Zirhtu a thiam lo le a zirtu khal thiam a har asilole thiam a theih lo. Zirhtu a sual a sile a hnen ih a zirtu pawl khal an theimi a sual ṭheh ve. Mifim ṭongkam kan thei ṭheu mi pakhat cu ziang a si tisile ‘siibawi pakhat in mina tuam hlawmnak ah a sual pang a si le minung pakhat lawng a thi; asinan zirhtu saya pakhat a sual a si le tlawngta zaten a siatsuah ṭheh a si’ an ti. Curuangah zirhtu ṭha hi a thupi zetnak a si.

            Tuni kan siarmi Saam sungah “Maw Bawipa, nangmah ih nun na zirhmi le, na daan na zirhmi pawl cu mi thluasuak an si,” a ti. Kan Bawipa kan Pathian cu zirhtu saya lak ih saya ṭhabik a si. A zirhmi thu khal a hman mi lawng a zirh ih a zirh daan khal a thiambik. Leitlun ah cun tlawngṭha dueh, saya ṭha dueh hmin ṭha nei deuh kan duh a si le a man a tam a sang ve vivo ṭheu. Asinan zirhtu lakih zirhtu thiambik a simi kan Bawipa cun man lo in in zirh, man lo in fimthiamnak in pek. A lak duh ding le a lak thiam ding lawng kan sam a si. Bawi Jesuh leitlun ih a tlan len lai san ah Farasi pawl hi zirh tu pawl an si. Asinan an thil ti daan, an hna ṭuan daan a hman lo ruangah Bawi Jesuh in a dungthluntu pawl hnen ah, “Farasi mi le Herod ih thilnu kha ralring uh,” tiah a sim hai.

            Tuni ah zirhnak thu thawn pehpar in kan ruat tlang ruangah hi thilnu kha zirhnak thawn tahṭhim in sim ka duh. Thilnu hi sangvut thawn kan rawi tik ah sang kha a ṭhang ter, a puah ter. Sangvut sungah thilnu ṭha lo kan rawi a si ah cun thilnu ṭha lo in a ṭhang ter ding ih sang ṭha lo ah a suak ding. Cuvek thotho in kan sungah zirhnak ṭha lo a lut a si le cumi cu kan sungah a ṭhang ciamco ding ih miṭha lo ah in cang ter ding a si. Bawi Jesuh in vancung uknak khal cu thilnu thawn a rak tahṭhim ve a si. A ṭhami thilnu a ṭhami zirhnak kan sungah a lut a sile kan sungah a ṭhang dingih mi ṭha ah in cang ter ve ding a si.

            Zumtu nang le kei hi mi vanṭha taktak, mi thluasuak mi lungawi taktak kan si. Ziangruangah tile zirhtu ṭha Jesuh Khrih kan nei a si. Leitlun ah zirhtu tampi an um lak sungih sin a mah Bawi Jesuh ih zirhmi kan si. A mah cu zirhtu ṭha a sivek in kan nih khal zirtu ṭha kan si ve ding cu a thupi zet a si. Zirhtu ziangtluk in a ṭha ih a thiam hman seh la a zirtu in ṭha tein a ngai duh lo a thlun duh lo a si le cu fimthiamnak a ngah har zet ding asi. Zirhtu ṭha kan nei mi thluasuak kan si ti thei in le kanmah khal zirtu ṭha si thei dingin zuam tlang cio uh si. Kan kiangkap minung pawl ih ruahnak le kan Bawipa ih zirhmi a kaih aw lo a siah cun kan Bawipa ih zirhmi sawn kha a thlun ngamtu si ding in khal zuam cio u si tiah ka lo sawm ka lo forh duh a si. A ngaitu nan zate parah ka lung a awi. A zate ih athiam tu Pathain Pa le, Fapa le, Thiangtlarau in lo thluasuah hram seh.

Fr. Peter Lal Zin Thang (Hakha Diocese)