Ralrin tulmi (sim tu Rev. Fr. David Mangte) February 24, 2022

Ralrin tulmi

Thuthangtha sim tu Rev. Fr. David Kap Cin Mang

February 24, 2022

            Kan Bawipa Jesu Khrih ih zangfahnak, Pa Pathian ih duhdawtnak le Thiang Thlarau ih pawlkomnak cu RVA ihsin thuthangtha a rak ngaitu nan zate hnenah uh hram seh ti’n a hmaisa bikah cibai ka run lo buk hrih hai a si.

            Tuini hrangih Gospel Cathianghlim kan siar dingmi cu  Marka 9:41-50 sungta a si.

            A hmaisa bikah, v. 41 sungih kan Bawipai tongkam a simi, “Ka minung nan si ruangih tidai khuat khat a lo petu cu thatman a ngah tengteng ding” timi kan vun ruat tlang hnik pei uh. “Ka minung” a timi hi zo pawl so an si ding? Tirhthlah pawl hnenih direct a simmi a si ruangah a hna tuan dingih a hrilmi pawl a ti duhsan nak khal a si thei. Curuangah Pathian hnatuan pawl kha an minung sinak ruangah le kan duhdawt hleice men ruangah silo in, Pathian ih a hnatuan dingih a hrilmi an sinak ruangih an parah thatnak kan tuah tin te’n anmah hmangin Pathian ih in pek duhmi thluasuah cu kan ngah tengteng ding tinak a si.

            Himi thu thawn pehpar in Mt 10:41-42 sung ahcun hiti’n a ti: Pathian thusimtu tlun inn a ontu cu Pathian thuphurtu tlun inn a on ruangah a thusimmi thatman a tawm ve ding. Mitha pakhat kha mitha a si ruangih tlun inn a ontu cu cuih mithapa ih thatman a tawm ve ding. Fiang tein ka lo sim: Ka dungthluntu pawl lakih nauta bik kha ka dungthluntu a si ruangih tidai khuat khat a petu cu thatman a ngah tengteng ding,” tiah a ti.

            A tawi zawngih kan sim a si ahcun, midang parih thatnak kan tuahmi poh hi a lak a si dahlo tinak a si mai. Curuangah thatlonak hnakin thatnak sawn midang parah a va tuah theitu si kan zuam cio pei. 

            Cun a pahnihnak ah, v. 42 sungih “Zokhal sisehla hibangtuk nauhakte pawl pakhatkhat keimah i rinsannak ihsin a pialtertu cu a hngawng ah fangcang rialnak lungtum thlaih tahrat in tifinriat sungih thlak a hrangah a tha sawn a si” tiih kan Bawipa ih a timi tongkam kan vun ruah that tikah, kan Bawipa in midang pawl, ahleicein, mi nauta pawl sualnak lamzin ih hruaisualnak a huat zia a langfiang tuk. 

            Himi te cu, mah le innsungsang cio ihsin kan ralril tul zet mi khal a si. Ziangah tile, fale pawl hrangih zirhtu saya hmaisabik cu nu le pa an si. Kan fale pawl tlawng an kai thei hlan ihsin an nunzirnak cu nu le pa, ule pawl le kiangkap ih upa pawl hnen ihsin a si. Curuangah kan kiangkap ah nauhak tete an um a si ahcun, kan tongka le kan cangvaihnak tinkim ah, an hrangih cawn ding saya tha kan si ding a thupi tuk.

            Cuihsin, society dinhmun ih kan vun sim ding a sile, miih upatmi le zohsuanmi upa a si tu pawl hin, in zohthimtu pawl hrangah lamzin diklo zawngih hruaisual lo ding a mamawh nasa. Cuti vekih minung tampi lamzin a pial tertu kan theih khal a sile, an hngawng ah fangcang rialnak lungtum thlaih tahrat ih tifinriat sungih thlak vek rori’n mipi lakih cangvai thei lo dingin tuanvo neitu a phuaihsii pawl in tan kan lak a tul tinak khal a si.

            Cule a pathumnak le a netnak ah, vs. 43-47 sungih “na kut le na ke in sualnak ah a lo thlenpi a si ahcun tan mai aw; na mit in sualnak ah a lo hruai a si ahcun phorh mai aw; taksa kim thawn a mit thei dahlomi meisa sungih thlen hnakin taksa kim lo ih nunnak sungih luh a tha sawn” timi kan Bawipai tongkam pawl kan vun ruat bet hnik pei. Kan Bawipa in kut ke tan ding le mit phorh ding a ti tikah tan ngaingai ding le phorh ngaingai ding a ti duhsan mi siloin, kan ralrin ding a thupit zia in zirh duh sawnmi a si.

            Kan kut hi ziangti vekih kan hman caan ah sualnak sungah in thlenpi timi kan ralrin thiam a tul zet. A pakhatnak ih kan ruahawk zo vekin, kan kut hi midang parih thatnak tuah ding lawngih kan hman thei a si ahcun kan kut ruangah thluasuah tampi dong thei kan si. Cuti silo ih, a tullonak le thatlonak ih kan hman pang ahcun thihnak ih in thlenpi theitu khal a si thotho. Cuih thatlonak tuahlo dingih kan kut kan sup thei a sile, kan tan thawn a bangawk ko lo maw?

            Kan ke khal cu thotho. Ziangtivekih kan hman caan le khui tawk hmun fehnak ih kan hman tikah sualnak ah in thlenpi timi kan cekawk theu a tul. Cumi kan vun fiang tikah, cuvek hmun le caan pawl kan hrial thei a si ahcun kan ke kan tan thawn a bangawk ko lo maw?

Kan mit khal le cuti thotho a si ko. Tulai tla san tla cu, maih um hmun te’n mobile phone thawn thil thalo zoh ding tampi a um vekin thil thatha khal zoh ding tampi a um. Ca kan siar khal ah, cuti thotho: ca thatha tampi a um vekin ca thalo khal tampi a um ve. Cumi lakah kan mit ziangti’n kan hmang le sualnak ah in hruai timi kan thiahia thiam a tul ih, sualnak ih in hruaitu pawl zoh lo dingih kan hrial tikah kan mit kan phorh thawn a bangrep ko lo maw?

             Himi pawl hi khat lei lam zawngih kan sim ding a sile, occasion of sin timi sualnak ih in thlenpi theutu thil pawl kan ralrin ding le kan hrial thiam ding a thupi tinak a si. Cuih kan hrial tulmi occasion of sin lakah minung siseh, thilri siseh, hmun pakhatkhat siseh an tel thluh.

            Nunnak sungih kan luh taktak theinak dingah kan hrial tulmi pawl hrial kan tum cio pei. Kan tulsammi thluasuah pawl khal Bawipa’n in pe cio hram seh. Amen.