Pope Francis in Ukraine ram thawn pehpar in Russia Orthodox Biaknak lam hotu thawn tongaw (March 16, 2022)

Pope Francis in Ukraine ram thawn pehpar in Russia Orthodox Biaknak lam hotu thawn tongaw

(March 16, 2022)

         Pope in kan dung March 16, tlawngkai nithum ni ah Ukraine thuhla thawn pehpar in Moscow ih Orthodox Biaknak lam hotu Kirill thawn video ihsin thureltlangnak an rak nei. Cui thureltlangnak cu Rome tikcu caan, sun hrawngah an rak tuah. Hi vekih thureltlangnak thuhla cu Moscow ih Russia Orthodox in hmaisa ah a sim hmai ih neta lam ah Vatican in khal a nemhnget vivo.

         Ukraine thuhla thawn pehpar in ralbuainak zamrang ten reh in remdaihnak ngah dingih tuahnak ah Christian pawl le an Tuukhaal pawl ih tuanvo thuhla thupit ih an rak reltlang thu, Pope dinhmun in tu vekih thureltlang dingah a dil mi a cohlan sak ruangah Russia Orthodox Biaknak lam hotu pawl hnenih a lungawi thu, Pawlpi dinhmun in ramkhel lam hman daan pawl hmang lo in Bawi Jesuh ih tongkam lawng hman a tul thu, kan zaten Thumkom Pathian a si mi Pathian lawng zum in Pathian ih Bawinu upat in a thianghlim zet mi Pathian miphun ih Tuukhaal an si. Remdaihnak dinnak ah lungrual ten bawm aw ton ih tuan a tul. Ralbuainak a tuar rero tu pawl bawm a tul. Remdaihnak lam cat bang lo in tumtah ih tuah a tul. Sualnak cawl dingah thazaang suah a tul thu a rak sim ih ralbuainak ih sumpai petu pawl cu mipi pawl an si. Russia ralkap pawl, mipi pawl cu bomb a puak ih an thih rero thu, an mah khal mipi pawl an si thu, Tuukhaal pawl dinhmun in ralbuainak a tong tu mipi pawl hnemnak hrangah naihniam ten um a tul.

         Veikhat ah Pawlpi sungah khal ‘a thianghlim mi ralbuainak (a si lo le) a sik mi ralbuainak’ tiih an rak rel thu, tui san ih ralbuainak cu hi vekih sim a ngah lo thu, Christian pawl ih remdaihnak lam thawn pehpar ih ruahnak pawl a rak thanso zo thu, ralbuainak hi a dik lo. Ap aw tu pawl cu Pathian ih minung pawl an si. Ralbuainak ruangih nunnak a cemtu nauhak pawl, nunau pawl, ralbuainak a tuar tu pawl hrangah tap lo. tuar lo in um a theih lo.

Ralbuainak cu tidaan a si lo. Kan mah lung in rual ter tu Thiang Thlarau in ralbuainak ruangah harsatnak a tuar tu pawl bawm dingah an dil rero thu Pope in a rak sim thu, Vatican thuthang ih a suah. Russia Orthodox ih Biaknak lam zungih thusuah sungah khal tui thureltlangnak ah Ukraine thuhla nepnawi an rak reltlang thu, hleice tak ih a rak peknak cu milai khat le khat lainat aw in bawmawk tonnak, Russia Orthodox le Catholic Pawlpi ih telpinak thawn tui dinhmun tha zet ih bawm dingah, an pawlkom pahnih in thureltlang mi tidaan hmang in a dik mi remdaihnak rei lo te ah ngah theinak lam an rak reltlang thu, tui thureltlang nak programme cu Archbishop Hilarion le Cardinal Kurt Koch pawl khal an rak tel thu, Pope Francis le Russia Orthodox biaknak lam hotu Kirill in tui harsatnak thawn pehpar in tuah tlang thei mi dinhmun tampi an rak reltlang thu Russia Orthodox lam in an suah.

         Russia Orthodox pawlkom in an mai biaknak lam hotu cu an mah lawng in an hril theu. Kohhran mipi (150) an um ih Kambapaw ih um Orthodox Christian pawlkom ih a hrek luan an um. Pope Francis in Russia Orthodox Biaknak lam hotu Kirill cu (February 12, 2016) ah Kyuva airport ah an rak tongaw dah. Veihnihnak an tonawknak cu (2021) kum cem lam ah, Archbishop Hilarion thawn Vatican ih an tonawk lai ah a si. Russia Biaknak lam hotu cu kan dung March 24 ah Europe ram tluan ah Catholic Bishop pawl pawlkom pawl asimi Poland, Germany, Ireland Catholic Cardinal Jean Claude Hollerich khal Russia ih Ukraine raldonak thawn pehpar in a dodal thu sim dingah zangfah a dil nak a rak cohlang.

         Pope Francis in 2013 Pope a tuan thok caan ihsin thok in Catholic le Orthodox lak nelawk nak um deuh dingah a zuam. Pope in nisuahnak a lailak ihsin kohhran mipi taan 300 a um mi Orthodox Biaknak lam hotu Bishop Bartholomew I thawn an nel aw zet. 2018 ah nisuahnak a lai hrawng Orthodox Biaknak lam hotu Bishop hotu Bartholomew I in Ukraine Orthodox Christian pawlkom cu Russia Orthodox ih kuthnuai a si lo thu nemhnget a si thu a than tikah Russia Orthodox in pehtlaihnak a nei nuam cat. Ziang asi khalle sim ding mi March 25 ni ah Pope Francis in Russia le Ukraine cu Nu Maria ih a thianghlim mi thinlung hnenah a ap thlang ding a si.

https://bit.ly/3ucu2oh