Bawinu Maria hnen Vancung mi ih thuthan nak puai ni ah Ukraine, Russia le Myanmar ram pawl hrangah ahleice thlacam nak tuah (March 25, 2022)

Bawinu Maria hnen Vancung mi ih thuthan nak puai ni ah Ukraine, Russia le Myanmar ram pawl hrangah ahleice thlacam nak tuah

(March 25, 2022)

              Bawinu Maria hnen Vancung mi ih thuthannak puaini asimi March 25 zan 10:30 ah Yangon St.Mary Cathedral Biakinn sungah Cardinal Charles Bo hoha in Bishop pawl, Puithiam pawl, Sister pawl komkhawm in thlacam nak thawn ahleice ih thlacam nak an tuah. Ahleice ih thlacamnak cu “Ukraine le Russia ram pawlah Bawinu ih sual hram nei lomi thinlung hnen hlan nak hrangah zaten hmunkhat in thlacam dingah Pope in a forhfial ruang khalah a si. Rosary cam hlanah Cardinal in Pope Francis ih kuat mi ca a siar.

              Cui ca sungah Pope in “Upat tlak mi ulenau pawl Ukraine ram ih a cang mi ralbuainak cu a tu cun thlakhat asi zo. Minung pawl cu anasa zet mi thinlung nat nak an tuar rero. Leitlun remdaih nak hrang khalah hringhro nak pakhat a si. A tu vek a thim mi harsat nak pawl ih khuh caan ah harsat tuar pawl thawn kan um. Remdaihnak Pathian hnen ahleice ih thlacam ding a si. Thlacam sak dingah, sup dingah duhdawt nak thawn tel dingah ka lo dil nak par ah sian nak thawn a tuah tu nan zate par ah ka lungawi. A tam zet mi Pathian ih minung pawl ih dil nak pawl tuah sak nak in ralbuainak  a can nak ram pawl cu thluasuah hmuahhmuah thawn a khat mi Bawinu hnen hlan dingah ka duh. Angelus thlacam theh ah than cia mi vekin Bawinu hnen Vancung mi ih thuthan nak puai ni asimi March 25 ni ah leitlun minung pawl ahleice in Ukraine le Russia cu Bawinu ih sualhram nei lo mi thinlung hnen ka ap duh. Pathian ih ngaidam nak a co tu thinlung thawn remdaih nak dil dingah a kaih zet ruangah St.Peter Basilica innpi ah Rome tikcucaan 5:00 ih tuah ding mi sualsir nak caanserh ah Bawinu hnen hlan nak kan tuah ding. Riahsia, ninghang in harsat tuar tu pawl ih tah aw, tih a nung mi pawl ih tuahmawh nak a tuar tu pawl ih zangfah dil nak aw thawn kan minung innsang  pawl ih hmailam cu tuini kan nu asimi remdiahnak Bawinu hnenih hlan nak cu hmunkht ten kan um nak langter nak a si. Curuangah March 25 niah Puithiam pawl, Pathian riantuan tu pawl le Kohhran mipi zaten Biakinn ah biakkhawmnak hmun pawl ah komkhawm in Pathian ih a thianghlim mi mi phun pawl ih thinlung ih a suak mi zangfah ding nak cu kan nu Bawinu hnen tuahsak dignah ka lo dil. Bawinu hnen hlan mi thlacam nak cu kan unau pawl thawn hmunkhat ten cam thei ding khal ah nan hnen ah ka lo kuat zo. Zangfah ka lo dil nak thupi zet in tuah in tel dingah man cia ih nan um ruangah ka lungawi. Nan mah le keimah ih hlan mi Kohhran mipi pawl ih duhdawt nak tampi thawn thluasuah k a pe. Bawi Jesuh in lo humhim hram seh. Bawinu Maria in lo kilkhawi hram seh. Ka hrang khalah thla in cam sak dingah ka lo dil” tiin March 22 ih a kuat mi ca cu Cardinal Charles Bo in a siar.

              Pope dinhmunin Ukraine le Russia ralbuainak remdai nak hrang lawngah Bawinu hnen ap ding tiin a sim nan Cardinal Charles Bo in Kawlram hrang khal bet in thla a cam. Cuihleiah Kohhran thenkhat khalah Puithiam thawn mipi pawl Bawinu upat nak ah komkhawm in remdaih nak hrang hmunkhat in Rosary cam nak pawl an tuah. Himi thuthang cu RVA Myanmar ihsin kan don mi a si.