Mah le mah Duat-awk tuk cu Mai Sunnak

Mah le mah Duat-awk tuk cu Mai Sunnak (Adventu Zarh (3) nak,  December 16, 2019 - Nikhat ni)

Readings:    Lev 24:2-7, 15-17; Ps 25:4-9; Lk 21:23-27

Tuini kan siarmi Thuthangtha sungin thu tlangpi ih ka ron tar lang duh mi cu Mah le mah Duat-awk tuk cu Mai Sunnak ti a si ding.

            Kan thutlangpi ih kan feh hlanah kan dung zarhsung ih kan rampi thuhla thawn pehpar aw in Khristian nundaan, a hleice in, Advantu caan sungih thupibik ih kan ruah dingmi tim tuah awknak thu ron rel ka duh ta. Kan dungzarh sungah Falam RVA lamin kan rampi thuhla thuthang tar lang ih thlacam sak ding in ron sawm nak ah ngaidaan, theihdaan le pomdaan hi a rak bang aw cio lo men thei. Ramkhel lam pang ih caangvai pawl hrang sinsin cu ruahdaan dangdang tla a um thei ding. Asinan, ka sim theu mi cu Kristian minung a simi, zumtu a ti aw tu cun kan ramkhelnak le kan sum dawn nak lam tiang khalah kan zumnak ih lam in hruai ding a thupi tuk. Curuangah biaknak lam ih hruaitu a simi pawlin kan ralring zet tla a tul. Tadin timi thuthang hi kan hna ih theinak men ih a tawp ah cun aphyin timi thulolak (thlisia zuang) men a si ding. Sim duh mi cu thuthang kan theih veten ziangtin response kan tuah timi kha a thupi zet ti'n ka ruat.

            Tulai cu online san a si bangin ziang zongza thuthang kan thei thei ih cumi pawl tlunah kan Khristian nundaan ding kha zumnak thawn kan khaikhin thiam ding a tul ka ti nasa. Curuangah si pei maw thuthang theih ka duh zet theu nan ka thei thei theu lo. Ka tum ngam ngaingai lo si ke maw ka ti aw theu. Kan dungzarh thuthang thawn pehpar in cun RVA Falam zilthli in rampi hrangah thlacam sak in sawm kha tha ka ti lawlaw. Aung San Su Kyi kan dinpi tivek men le Party at ih aa, at tan in tan rero ding silo'n kan rampi sungih thudik thuhman le zalennak diktak a leen theinak dingin a silo bik ah thlacamnak tal cun kan tan ve a tul ve lo maw. Culawngah Advantu hi kan hrangah man a nei ve ding. Khristian timi hi Khrih dungthluntu ti hnakin Khrih thuthluntu ti ding hi ka duh deuh sawn. Ziangahtile a dung thlun men hnakin ahmai ih a fehnak ding lam sialtu dungthluntu sawmsarih a thlah bangin kannih khal a ratsalnak ding lam sialtu ih thlah kan si ve. Curuangah lamsialtu Johan nun, thudik thuhman ruangih nunnak tiang liam ngam hi Khristian nun diktak, Khristian pawlih kan cawn ding nunzia a si tihi timtuahawknak caan sunglawi a simi, Hngahhlapnak caan kan timi  Advantu tikcu caan ih sawmawk ka duh mi a si. Advantu tikcu caan a hrek kan luan thlang ih thaizing December ni 17 cun ahleice ih timtuahawk ding caan a si thlang ruangah mah le mah duat aw tuk lo'n Johan ih nunzia hi kan ti thei tawk te tal in kan cawng tlang pei uh.

            Ziang thil kan tuah poh ah zongsang timi hi a um thei mi le thil ol-ai te a si. Cumi lakah thiltha tuah hnakin thil sual, thil thalo tuah hi zongsang a ol sinsin ti khal kan nunnak ah kan theih le kan ton cio mi a si ko ding. Thiltha tuah ah zongsang thei lo ih thil thalo sawn ih zongsang a ol le a tam hi ziang ruangah ha a si ti ruah sal tikah kanmah le kanmah kan duat awk tuk le kan duh kan zulh awk tuk ruangah a si bik ko. Minung cu rel lo, thilri hman ah hiti vek a si thei zia hi veikhat ah tuih Falam kan Biakinnpi sak rero tu Hniang Mawi pa in hna i tuan sak lai ah ka rak thei ngah. Ziangtin a si tile keimah in grinder cet-fate ka rak nei ih cuipia kan tan. Kan theh tikah cet ret sal ding zawngah thiangfai ten ka rak tuah ter rero. Culaifangah Hniang Mawi pa cun a tawk tuk zo ee, cet tivek tla hi duat tuk siri le an siat ol sawn, a cian an khan lo sawn so khaw in ti. Ka lung a kim tukah a ciah in i ciah thei.  Cuih thu ka rel sal tikah kan naupa pakhat in in rak lung kim pi tuk ih in sim bet mi cu, Tuluk motorcycle 125 tla hi a cak tuk kan ti ko nan kawl rawn ih nuhmei deuh pawl ih hman mi cu Laitlang kainak ah ka hmangih hmanawk hman a tha ceo; dimdoih, dimdirh tuk a thei ih a zong sang rori si ko; a cak thei lo lawlaw a ti ve. Keimah rori khal hi nikhat ah ihcaan nazi 7 sung tal ka neih a tul tiah ka rak ruat ih ka rak duat aw tuk theu; zing deuh ih ka thang khal le Nazi 7 sung ka it ngah hrihlo pi tiih ka ih bet theu tikah Morning Mass khel dok, khel dok lo in ka rak um theu ih sa helhel in ka um ringring. Curuangah ka ruat aw salih zingih thawh ka rak tum tikah ka zong a sang deuh hnu cun ka ih ka khop lo hmang ka rak ti laiah ka hah a dam sawn ti hi tu naite lawngah ka theithiam aw. Curuangah si mah le mah duat awk tuk cu mai sunnak ka ti ngam hi. Sun hmanah sunhnih sunthum rori ih sun a si thei ti hi ka hmu suak bet. Kan ruahnak a hah dam lo tikah kan tisa in a rak thei ve, cui hleiah thlarau lam hrangah sunnak a rak si thei bet lai a si.

            Tuini kan Thuthangtha sungah Bawipa in Biakinn sungih thu a zirh lai ah Puithiam upa pawl le Kohhran upa pawlin ziang ruangah hi ti vek in na tuah; zoih thuneihnak thawn ha na tuah tiah an rak sut. Bawipa Zesuh khal in an thusuhnak let cih lo in kei khal thu ka lo sut ve dingih ka thusuhnak in sim thei le ka lo sim ve ding a rak ti. Johan ih Tihnimnak hi van in maw lei in (minung hnenin) a ra tiih a suh tikah annih in van in ti sehla, a sile ziangah nan sang lo in ti kei, lei in a ra ti sehla le mipi pawl in an sang fawn ih mipi kan tih lala si tiah an maih luatnak ruat tahrat in kan thei lo tin an rak sawn ta. Cutikah Bawipa khal in kei khal ka lo sim thei ve lo a rak tiih an theih duhmi thei ngah lo ah an cang ve. Cucu an maih luatnak, mah le mah duat awk tuk ruangih an sunnak ka ti duh mi a si.

            Cun, khatlam ah kanmah kan luat takah tiih midang hrang ruat lo tiangih mah le mah duat aw ih mi'h harsat tuar ziangih rel lo ih um men khal Khristian nun diktak a si thei hrimhrim lo. Himi zawng te ah Siangbawi tlawng (Minor Seminary) kan kai pek lai ih kan phar parih ca-taar ka von mang lala sal. "ajymrSod? xdrSem? omrSae? aorScif þav;tif vlwGifrusifhtyf" ti a si. Curuangah kan fa-le-nau pawl hi anmaih kan rilrawng in ti hlanlo mah ril rawn lo ruangih kan um san men ding a si thei lo. Kan fale an nat tikah kanmah nat lo ruangih taan san men ding a si thei lo. Caantha kan neih lai ah Bawipa thawn tonawk ding tiim tuah aw cia ih kan um ringring thei nak dingin kan tulsam mi thazang thar thluasuah cu Amah Bawipai Thiang Thlarau in a ngaitu kan zate parah in burh hram seh.