Harsatnak ziangtin kan pom ding - A sim tu Rev. Fr. David Mangte

Harsatnak ziangtin kan pom ding?

Thuthangtha sim tu Rev. Fr. David Kap Cin Mang

June 20, 2022 (Nikhat ni)

Bawipai’ pekmi hnangam daihnak in lo zel hram sehla, nan tuahtuannak kip ah Bawipa’n lo umpi in hlawhtlinnak khal lo pe hram seh tiah RVA ihsin thuthangtha a rak ngaitu nan zate’n cibai ka run lo buk hai a si.

Leitlun boruak kan vun thlir tikah, zianghman kumkhua a hmunmi thil hi leilung ah a um lo zia a langfiang tuk. Kum reipi sumpai khawl in harsa tak ih kan sak rero mi inn pawl khal mitthep karah an ziam mai. Pathian biaknak ding hrangah tiih kan sakmi Biakinn mawi zetzet pawl khal mi thalo pawl in ol te’n in siatsuah sak hluahhlo thei mai.

Hiti thei nacing in, hi leitlun thilri par lawngah kan thinlung kan thum pang ahcun hi pawl an ziamral zawngah kan thinlung khal a cem kei kan ruahsannak pawl khal an cemral ve mai ding. Curuangah kan dung tlawngkai ninga ni ih kan siarmi Mt 6:19-23 sungih kan Bawipai in zirh vekin, leitlun kan nun sungah kumkhua a hmunmi thil hawl thiamtu le zo vek hmanih siatsuah thei lo nak hmun ah hlawnthil a khawl thiamtu kan si ding hi zumtu pakhat cio ih nun ah a thupi tuk timi hi a thar ih kan ruah dingah sawmawk ka duh a si.

Tuini a veikhatnak ih kan siar mi Cathianghlim cu 2Kgs 17:5-8, 13-15, 18 sungta a si ih, Israel mi pawl in Pathian ih duh zawngin nung lo in anmaih duhnak thlun ih sualnak an tuah ruangah Pathian in Assyria siangpahrang kut thuai ih a thlen ter nak thuhla a si.

Himi thu kan zoh tikah, Pathian in Israel mi pawl an sual tuk ruangah Assyria siangpahrang hmangin a hrem a si ti’n kan ruat men thei. Hmansehla, Israel mi pawl ih thuanthu kan zingzoi tikah, harsatnak an parih a thlen tinte’n Pathian in a hnenih kirsal dingin a kawhnak aw ih a hmanmi a si thu Prophet pawl hmangin a rak phuang theu timi thu khal kan thei.

Tuisan zumtu pawl ih hringnun khal ah Pathian in hiti’n a cangvai theu timi kan thinlung sungih kan ret ding hi a thupi zet.  

Minung tampi cu kan parih harsatnak a phunphun a thlen tikah, Pathian kan mawhthluk theu ih, mihrek cun kan kiangkap minung pawl sawn kha kan mawhthluk ih an parah thu kan thensak pang theu.  

A ngaingai ahcun, kan parih harsatnak a thlen tin te’n kan mah le mah cekawk ding caan tha Pathian in in pe a si hi ti zawngin kan cohlan thiam a tul nasa.

Pathian in kan duhlomi harsatnak le thil thalo pawl kan parah thleng dingin khuan a pek tinte’n a lak ih in pekmi a si dah lo.

Hmaisabik ah, kanmaih palhnak le sualnak pawl theifiang dingah harsatnak thawn nun in sim theu. Cule, a pahnihnak ah harsatnak thawngin Pathian in kanmah te’n thil ziangkim ti theimi kan silo zia in khihhmuh sak theu. Cun, a pathumnak ah, harsatnak thawngin Pathian in amah thawn nai sinsin dingin in sawm theu.

Kan kiang kan kap kan zoh tikah, vansiat malmaknak ton hnu ihsin Pathian lamah kir duhnak thinlung nei in a ra pan saltu kan hmu hnuaihni ko ding. Mihrekkhat a sile, a tlun ih kan simawk zo vekin, harsatnak le vansiatnak a phunphun kan parih a thlen tikah, Pathian in ziang si pei in zirh duh tiih Pathian ih duhnak hawl ding hnakin, midang mawhthluknak le camsiatnak in kan can kan cem ter ih, hlohralnak kan pan sinsin sawn theu.

Tuini Gospel ih kan siarmi Mt 7:1-5 sung kan zoh a sile, kan Bawipa in midang mawhthluk lo ding le soi lo ding thu in zirhmi pawl kan thei. Mi parih kan hmanmi tahfung kha kan par khalah Pathian in a hmang ve ding in ti.

Minung cu zo cio, harsatnak le thil thalo kan ton canah, midang parah mawh kan phurh ih camsiatnak kan hmang theu.

Tuini ah kan Bawipa in kanmah le kanmah cekawk hmaisak ding in sawm a si.

Tui tum ih kan rampi huap dinhmun in kan ton reromi harsatnak lak khalah minung tampi cun midang camsiat ding lawng kan bawh theu. Midang mawhthluk hlanah Pathian in ziang in zirh duh si pei ti’n Pathian ih duhnak a hawltu kanmah zumtu lakah pa ziat kan um?

Himi hi tui tum ah kan ruat tlang cio pei.

Pathian in harsatnak hi a lak in a thleng ter dah lo…….

Harsatnak thawn pehpar in, 1 Peter 2:19-23 le Heb 12:7-8, 11-12 kan man can ah kan siar pei…..