Zumnak leh tuahnak thawn Vanram ah

Zumnak leh tuahnak thawn Vanram ah
Thuthangtha sim tu Rev. Fr. Lucas Tha Ling Sum
June 23, 2022
Mt 7:21-23

Zumtu u le nau, Pathian in thlawsuah lo pe hram seh. Tuittum ah zumnak le tuahnak thawn vanramah, timi thu ka ron lo hlawm duh a si. Hmaisa ah tawiten baibal kan ngai ta pei. Mt 7:21-23 tiang.
“Bawipa, Bawipa, tiih i ko tu hmuahhmuah in vancung ram an thleng thluh lo ding. Vancung ih a um mi ka pai duhnak a tuah tu lawng an thleng ding a si. Thutthen ni a thlen tikah mi tampi in Bawipa, Bawipa, na hmin in Pathian thu kan sim, na hmin in khawsia tampi kan dawi suakih mangbangza tampi kan tuah, tiah ka hnenah an ti ding. Asinan kei cun, ka lo thei dah lo. Ka hnen ihsin thlan uh, nannih mi ttha lo pawl, tiah ka ti hai ding.”

Himi cu Pathian ih ttongkam a si. Bawi Jesuh Khrih hnenah thangtthatnak um seh law.

Zumtu u le nau, kan dung bai te ah pi thar nu te pakhat ka hnenah a ra ih hitin thu i sut. Siangbawipa, kei hi tlamtling lo te ka si. Sualnak khal tampi ka nei. Ka sualnak pawl hi Pathian ih ngaidam theih an si pei maw? Vanram ka kai thei pei maw?.., tiah helh kam zet le thin bang zet in i sut. Ee ka pi, sual sirih sual thlahnak sacrament na ngah a si ahcun Pathian in na sualnak a lo ngai thiam ding a si, tiah ka ti.

Nitin kan nunnak ah kei hi vancung ram ka thleng thei pei maw? Vancung ram thleng thei dingin ziang ka tuah pei? timi hi sut aw ringring ding kan si. Tuisun kan baibal cathianghlim siar mi sungah Bawi Jesuh in ziang tivek ih a um tu pawl cu vancungram an thleng lo dingih ziang tivek pawl ih um tu pawl cu vangcung ram an thleng ding a si, timi fiang ten in sim.

A pakhat nak ah Bawi Jesuh ih “Bawipa, Bawipa, tiih i ko tu hmuahhmuah in vancung ram an thleng thluh lo ding”, a timi hi kan hrangah tthih nung ngaingai le ralrin ttul ngaingai mi pakhat a si. Aw kam lawng cun vanram kai a theih lo; Cun a hmin i zumtu si men lawng khal in vanram kai theih a si, tinak a si lo, timi hi Bawi Jesuh i in zirh duh mi a si. Cuti a silen ziang tin vanram kai theih a si pei?

Bawi Jesuh in hitin in sim: “Vancung ih a um mi ka pai duhnak a tuah tu pawl lawng, vanram an thleng ding a si,” a ti. Vancung kainak ding ah Pathian ih duhzawng tuah tengteng a ttul tinak a si. Cuti a silen Pathian ih duhnak cu ziang a si pei? Pathian i duhnak cu a fapa Bawi Jesuh ih zirh mi zumh le thlun a si. Cuti a silen vanram kai thei nak dingah Bawi Jesuh ih zirh mi cu ziang a si? Himi thu thawn pehpar aw in Bawi Jesuh in tampi in zirh. Pakhat in von sim uhsi. Cumi cu Matthai 25 sungah hitin kan hmuh.

Ril rawng pawl rawl pek ding; ti hal pawl tidai pei ding; mikhual pawl tlun inn pek ding; hnipuan nei lo pawl hni puan pek ding; minaa pawl tuam hlawm ding; thawngtla pawl veh ding, timi pawl an si. Ttongfang kamkhat ih kan sim a silen bomttul mi pawl bom ding, tinak a si.

Zumtu u le nau, tuisun ih Bawi Jesuh ih in zirh mi a tawi zawngih kan sim a silen awkam lawng ih Pathian biak cu a famkim lo; tuah nak a ttul hrimhrim tinak a si. Himi thu thawn pehpar aw in mithianghlim Jeims khal in hitin fiang zet in in sim: tuahnak tel lo zumnak cu a thi a si, a ti.

Zumtu u le nau, nan zumnak cu nitin nannunnak ah tuahsuak le ttuansuak thei dingin Pathian in nan zaten thlawsuah lo pe hram seh. Amen.