A Thupi Deuh Mi Hngilh Hlah (sim tu - Rev. Fr. Peter Lal Zin Thang) August 23, 2022

“A Thupi Deuh Mi Hngilh Lo Ding”

Thuthangtha sim tu - Rev. Fr. Peter Lal Zin Thang

August 23, 2022

Siarding: 2 Thes 2: 1-3, 14-17/ Ps 96/ Mt 23: 23-26.        

              RVA Falam service in thuthangṭha a ngaitu Bawi Khrih ah duhdawtmi nu le pa, u le nau pawl, Bawipa ih pek mi hnangam daihnak cu nan hnenah um hram seh. Tuni kan siar dingmi Gospel cu Matthai 23: 23-26 tiang a si. Ngai ta hrih u si.

Matthai 23:23-26

“Daanthiam pawl le Farasi pawl, nan hmakhua a va pit so! Nannih mi depde pawl! Hmeh ih rawimi puṭinan, remhmui le aithing pawl kha Pathian hnenah ṭhenhra ṭhenkhat nan pek; asinain Daan sungih a thupi zetmi dingnak, zangfahnak le rintlaknak pawl cu nan thlun lo ih zianghman ah nan siar fawn lo. Himi pawl hi nan tuah ṭul mi a si ih a dang tuah ding pawl khal ah nan daithlan lo pei. Hotu mitcaw pawl! Nan inmi sungih thothe cu nan hap, asinain kalauk riangri nan dolh fawn! “Daanthiam pawl le Farasi pawl, nan hmakhua a va pit so! Nannih mi depde pawl! Nan khuat le nan pakan pawl a lenglam lawng fai lengleng in nan kholh ih a sung cu midang thil nan lonmi le hamṭamnak in nan ngahmi thil in a khat. Farasi mitcaw pawl! Nan khuat a sunglam pawl kha kholh hmaisa uhla cuticun a lenglam khal a fai ve ding a si.

(Bawipa ih thuthangṭha a si.)

            Bawi Jesuh hi mi nunnem le mi dangdor zet mi a si ti hi kan thei ṭheu mi cu a si. Matthai 11: 29 khal ah Bawi Jesuh in, “Kei cu nunnem le tangdornak thinlung neimi ka si,” tiah a timi khal kan hmu thei. Jerusalem biakinn pi kha sumdawnnak ah an hmang tikah Bawi Jesuh cu a thin a heng tuk ih an  thil pawl a ling let sak ṭheh ih a dawi ṭheh hai. Tuni kan siarmi Gospel sung khal ah Jew miphun hruaitu upa pawl kha mi depde pawl, mitcaw pawl tiah nasa zet in a ṭhuat hai ti kan hmu. Cutivek pawl kan hmu tikah Bawi Jesuh cu mi nunmen le mi dangdor mi a si timi hi ziang tin kan ruat, ziang tin kan hmu? Mal lai cu thei thiam lo in le khuaruahhar in kan um men thei? Atawinak in kan sim ding asile nunnem le tangdor timi hi thin heng dah lo le ṭong nem lawng hmang ringring a ṭul tinak a si lo timi kan Bawipa in in thei ter sawn mi a si

            Kan ruat dingmi sawn cu kan thin heng a si le ziang ruang ah kan thin a heng? A ṭul maw ṭul lo? A hman maw hman lo tivek sawn hi zoh a ṭul sawn a si. Thuṭhimnak ah Jerusalem biakinn pi kha a dik lo in an hmang mi kha Bawi Jesuh in thinheng lo in poi lem lo ee tiin maw a ti men ding. Daanthiam pawl le Farasi pawl a dik lo in an um mi kha a poi lo tiin maw a zoh men ding. Thin heng a ṭul ih cian deuh in sim a ṭul ruang ah Bawipa in cu tin a tuahnak a si. Cun pakhat kan thei ding a ṭul mi cu thin heng asilole kawk timi le ngaithim thei lo asilole hua timi pawl hi an bang aw lo a si. Cun Bawi Jesuh hi a mah kha an ti ruang ah an hrem ruang ah a thin heng in a kawk hai mi a silo ih biakinn kha a dik lo in an hmang mipi pawl parah a dik lo in an nung ruangah a thin a heng sawn mi a si tikhal kan hmu thei.

            Cun Daanthiam pawl le Farasi pawl ih nun daan hi kan zoh tik ah a thu bik mi kha tuah lo in a dang pawl sawn kha uu-sa pek in an tuah deuh ti kan hmu thei. An hanghnah hangrah nei mi a fate bik tiang ṭhenhra ṭhenkhat fel zet in an pek ṭheu. Asinan a thupi zet mi dingnak, zangfahnak le rintlaknak tivek pawl cu ziang siar lo in an um ti a si. Tunai ih ka siarmi Gospel ah malte keimah tein ka rem mi te a um i nan Bible nan zoh a si le a bang lo men thei. Cumi te cu Falam Bible version pakhat ah “Ṭhehhra ṭhenkhat cu nan pek ding hrimhrim a si,” tiin a ngan mi te kha a si. Bible dangdang ah kan zoh a si le cutin a um lo. A ngantu in Laimi pawl ṭhanhra ṭhenkhat an pek lo ding a phang deuh ih a ngan mi khal si men thei. Bawi Jesuh cun ‘Ṭhehhra ṭhenkhat cu nan pek ding hrimhrim a si’ ti kha a uu-sa pek lemlo ih ‘dingnak, zangfahnak le rintlaknak’ pawl tuah ṭulmi a si kha a thupi deuh in a sim duh ih, cuhnu ah ṭhehhra ṭhenkhat tivek le a dangdang daan pawl khal nan daithlang lo ding tiin a sim a si. Hitawk ah kan fing ding ka duh mi cu pek siangnak le daan thlun tivek pawl hi a thupi lo tinak a si lo, tuah a ṭul lo tinak a si lo ti sim fiang ka duh. An thupi zet ih tuah an ṭul asinan a thupi sawn mi kan thlarau thianhlimnak pawl hrang kan tuah hmaisa lo in daan thlun menmen kan si le cu kan tuah mi hi a lak ah a cang thei men a si.

            A caancaan ah kan nih khal a thupi bikmi pawl tuah lo in a thupi ve nan a thubik a si lemlo mi pawl hi kan tuah duh deuh caan a um thei. Mi duhdawtnak, dingfelnak, zangfahnak, ngaithiamnak tivek pawl cu nei tum lo in punghman tein ṭhenhra ṭhenkhat ka pe, punghman tein ka khawm ti hrawng lawng in kan cawl men a si le cu Daanthiam pawl le Farasi pawl vek ah kan cang sual thei a si. Duhdawtmi nu le pa u le nau pawl, tuah a ṭul mi thil dangdang khal tuah in kan thlarau thianhlimnak ding hrang ah a thupi bik in a tuah duh tu kan si ringring theinak ding in Pathian hnen thluasuah dil in zuam cio uh si.

Fr. Peter Lal Zin Thang (Hakha Diocese)