A vei 7nak Leitlun Biaknaklam Hruaitu Pawl Tonkhawmnak ah Pope Francis in leitlun remdaihnak hrangah biaknak a thupi zia sim (15.9.2022)

A vei 7nak Leitlun Biaknaklam Hruaitu Pawl Tonkhawmnak ah Pope Francis in leitlun
remdaihnak hrangah biaknak a thupi zia sim (15.9.2022)
            Pope Francis cun ram 50 ihsin a Khzakhstan ram, Nur-Sultan khuapi ah a ra tongkhawm aw mi palai 100 lenglo hnenah September 14 ni ah thusimnak a nei. Cuih palai pawl cu biaknal lam, nunphung lam, ram mipi lam, cozah le cozah leng lam pawlkom ihsin palai pawl khal an tel. Biaknak lam hruaitu dinhmun in, “Leitluan remdaihnak hrang leh mi pakhat cio ih thinlung sungih a caammi hmuhtheih thamtheih lo (Pathian) thil hrang halnak pawl riam ter thei dingah biaknak timi hi kan tul hrimhrim” tiah Pope Francis cun a sim. Fundamentalism timi ruahnak thalo in zumnak hmuahhmuah a balh ter le a siatsuah dan pawl vun ruat phah in, mi hmuahhmuah in a tlaitluang mi le zangfah thinpemnak thawn a khat mithinlung neih a tul ti khal in a sim.
         Minung dinhmun ngaingai thawn a milaw taktak mi thansonak a um theinak dingah biaknak lam zalennak a thupit zia khal a rel. Zalennak thawn sersiam mi kan si cio tikah, mi zo vek khal in anmaih zumnak hi mipi lakah pholang ding covo an nei ko; asinain, lo theih lo in pompi dingah midang pawl forh ding a si lo zia a hmuhfiang thu tla a sim. A vei 7 tonkhawmnak ih an thu tlangpi cu “Pulhnat a tlun hnu, leitlun mipi pawl ih thlarau lam siseh, pehtlaihawknak lam siseh an thanso theinak ding hrangah biaknak lam hruaitu pawl in ziangvek tuanvo kan nei” ti hi a si.
        Himi thutlangpi ruat phah in, Pope Francis cun leilungpi hrangih thupi zetmi thil 4 a hmu ih cumi hlen suak thei ding tumtahnak thawn lungrual te’n tuan tlang dingah biaknak lam pawl hnenah forhfialnak a nei. A pakhatnak ih thil thupi mi cu, kan zate’n siatral theimi kan sinak le tuanvo nei tlang mi kan sinak theihfiang ding hi a si. Covid-19 ruangih pulhnat kan tonmi sirhsan in leitlun mi zaten siatsuah theimi kan si zia leh khat le khat bom awk ding tuanvo kan neih khawm zia sim phah in, hi pulhnat in lungrual ding in khihhmuh ih a lak si ter lo ding khal ralrin peknak a nei.
Kan milaipi pawl in thenthek ter sinsin theitu thil tampi lakah lungrualnak karh ter sinsin dingin biaknak pawl hi hmainawr tu ding kan si tiah sim phah in, hmailam hrang ruat ih tangdornak thawn kekar sinsin dingah Pope Francis cun sawmnak a hlan.
         Minung hmuahhmuah kilhim ding leh, maih pawlkom, phunhnam, biaknak/kawhhran hrang lawng ruahnak pahsuak ih pumkhat sinak cawisangtu le hnatuan tlang duhtu kan sinak langter ding hi Pathian zumtu kan zate ih tuanvo a si thu khal a sim. Cule himi hnatuan tlangnak cu mifarah pawl, hnonmi pawl le bawmtu neilo pawl ih aunak aw ngainak thawn thok dingah sawmnak a hlan. “Ka sawmawk duhmi cu ngaihven awknak le lungrual a karh sinsin theinak ding lawng silo in, mizapi kan himdam theinak ding lamzin hawl tlang ding hi a si. Ziangahtile, pulhnat a karh tertu le sumpai harsatnak le bangran lonak a umnak hmun ih kan hmuh theumi thatlonak pawl suahpi tu khal farahnak hi a si bik” ti’n a sim.
          A pahnihnak ah thupi zet tiih a hmuh mi cu remdaihnak hi a si. Ral buainak le doawknak in leilungpi a siatsuah zia a hmuh tikah, remdaihnak hrangah lungrualnak thawn tan la sinsin dingah biaknak picang pawl hmai kan nawr sinsin a tul zia a hmuhfiang thu khal a sim. “Pathian cu daihnak a si ih daihnak lamzin lawngah in hruai ringring. Ral buainak ah in hruaih dah lo” ti’n khal a sim. Cule, hmuhthiamawk lonak a um tikah, thuneihnak, hriamnam le hringhro awknak hmang loin thinsau te’n hmaiton thurel tlangnak thawn remdaihnak hawl sawn dingah a sim bet. Ziangah tile himi lamzin hi hmailam san hrangah thansonak a suahpi sawn.
          “Zangfah te’n hriamhrei hnakin fimzirnak sawn ah sumpai kan hmang cio pei” ti khal in ngennak a nei. Cun, thil thupi a pathumnak ah khat le khat cohlan awk ding thu a sim. Himi thu thawn pehpar in Pope cun, nitin hnon a tuarmi naute suak zo le suak hrihlo pawl, ramdang ihsin thawn mi pawl leh kum upa mitar pawl a sawhkhih. “Minung zo vek khal an sunglawi thluh timi ruahnak leitlun mi pawl hnen ih simfiang ding hi biaknak lam pawl ih tuanvo a si” tiah Pope Francis in a ti. Sersiammi hmuahhmuah Pathian ih a kilhim vekin midang pawl ngaihven dingah le unau sinak
hmel hmu thiam ding a thupit thu khal a sim. Inntek tha lungput, zangfah thinpemnak lungput thawn midang cohlang thiam dingah lamzin hawl ding khal forhfialnak a nei. “Mi zangfah thiamnak hi mi tha le zumtu tha in si ter sinsin tu a si” ti’n khal a sim.
          Thil thupi palinak ah kan lentlangnak hmun (leilungpi) kilven ding leh minung ruangih a cangmi siatsuahnak a phunphun ihsin kiangkap kilhim ding thu hleice takin a sim. Tenren lo tuk in sersiammi thil kan hman le kan siatsuhnak in kan tlanlennak hmunpi a siatsuah ih leilungpi khal Sersiam tu ih duhdan vekin hmu thiam nawn lo dingah in tuah thu khal a sim. Cun, pawlkom awknak thawn hmailam kekar tlang sinsin dingah biaknak kip hnenah Pope Francis in sawmnak le forhfialnak hlan tahratin a thusimnak a net ter.

https://bit.ly/3BpE49r