A Hawl tu hnenih Phuangaw tu Pathian

Bawipa cu mifim, mi-aa, mithiam le thiam lo ti si lo in amah a hawltu pawl hmuahhmuah ih hmuh dingin a phuang aw ringring tu a si.

Siarding: 1Jn 2:12-17; Lk 2:36-40

          Tui ni kan Thuthangtha sungah Profet nu Anna ih thu kan thei a si. Ziangvek minung a si tile kum note lai in pasal a nei ih kum sarih sung lawng an pa thawn an um tlang man. An pa in a thih san ih nuhmei dinhmun in kum sawm riat le kum li tiang ah Biakinn tan san lo rori in a sun a zaan in Bawipa kha rawl ul le thlacam in a rian tu a si. Kan ruah sak tikah kum note lai in nuhmei dinhmun a thlengtu Anna hi tulai kan dinhmun vek tla si sehla innsang nei sal ding rori a si. Mi banglo a si ruangah si ding e tiih ruat khal kan um thei. Mibanglo a va si ngai hmanah a Bawipa le a Pathian a duhdawt daan cu a nun ah a lang a si. Bawipa khal amah a duhdaw tu le amah a hawl tu cu a umsan thei lo zia hi Anna in Runtu Bawipa a hmuh ngahnak in theih fiang le hmuh fiang kan tul ve a si. Veikhat veihnih minung sinak zoh in mibanglo te pawl kan zoh suam caan tla a um men ding. Keimaih ka ton dah mi thil pakhat ka ron lo hlawm hrih ding.

          Parish siangbawi pakhat ka si tikah ka minung pawl hi Pawlpi zumnak sungah ziangtin ha ka thangso ter thei ding ti ruat in thu pakhat ka rak suah dah. Ka minung pawl hi innhmun ih thlacam puai tuah le thlacam kawh cu an thiam zet ko nan Missa ngai ding le Biakinn lam pan ding ruat lemlo an tam phah ruangah hitin ka ti: tuih si cun inn hmunah thlacam puai nan tuah duh a si le Biakinn ah nan ra thleng hmaisa pei ih Missa nan ngai hmai sa ding. Cuhnu lawngah nan inn hmun ka ra ve ding ziangah tile Pawlpi thlacam nak ah Missa hi a thupi bik, a thuk bik, a sang bik le a famkim bik mi a si.

          Zumtui kan nunnak le Pawlpi ih nunnak thihri cu Bawipai ThiSa sacramentu a si. Innhmun ih thlacam kan sawmawk tikah kan laidaan te in rawl donak hi kan thupit zet mi a si vekin nan innhmun ih rawl in do duh ngai le a hmaisa ah Bawipai rawl donak puai Missa ra kai hmai sa uh. Cumi lo cun luhmuhzi men a bang ding ka ti theu. Curuangah veikhat ah khawm dah lemlo mi innsang ah thlacam in ko ih a ni khua ih Missa an ngai ngah lo ruangah a thaizing ah ra ngai tengteng dingih an inn thlacam kan tuah lai ah ka rak sawm ih a thaizing cu inntek papi rori khal Missa a ra ngai ve ih Bawipai Thisa a saang ngah. Asinan neta ih a rel sal mi ka theih leh sal mi cu ziang a si tile 'Morning Mass' tivek cu lo thlo theilo le mi ze deuh pawl, hnatuan ding nei lemlo ih man hiarhiar nuhmei pawl lawnglawng si lo maw ka khawm sual' a rak ti cu maw. A ra khawm thei cu ka lung a awi lawk nan ka aan a hai leh sal riangri.

          Pathian lam ih zuam aw thei pawl zoh tik ah le nuhmei deuh kan tam tla a bang ngai theu. Cun kan Pathian thu zuam le kan nundaan tla hi a milh aw thei lo mi tla tampi a um thei ko. Asinan minung sinak in cumi khi zoh suam ciamco ding hi cu Bawipai lungawi lo zawng tak a si ding. Curuangah kanmah lam kan zuam theilo nak hi a zuamtu pawl sual hawlnak a si lo ding ralring uh si. An zuamnak parah Bawipa in thluasuah a pek ringring tihi kan theipi paihlo hmanah zumlo in um hlah uh si. Kanmah sawn khal kan zuam ah cun kan zuamnak parah Bawipa in in thluasuah tengteng ding. Asinan kan zuamnak ruangah a zuam thei lo pawl hi sual hawl kan tum la la pang le a poi theu. A zuam theilo pawl in kan zuamnak parih Pathian hmel an hmuh ve nak dingah kan hnenih a phuang aw tu Bawipa kha kan phuan thei ve nak dingah kan nunnak in Bawipa sunloih thei ding hi kan hmabak mi a si cio ding. Hihi 'Missa kan theh zo thin nuam ten va feh uh' tiih Missa theh zawngih Puithiam ih in thlahnak phunkhat ah a tel ve mi a si.

          Bawipa cu duhnak taktak thawn amah a hawl tu hrangah a relh dah lo. A phuang aw ringring a si. Christmas puai kan tuah caan sunglawi ah hin Bawipai phuanawknak hi a hleice in kan hmu thei. Tui zarh zarhpi ni le Mifim pathum puai kan tuah bet ding ih Bawipai phuanawknak thu fiang sinsin in kan thei lai ding. Bawipa cu mifim, mi-aa, mithiam le thiam lo ti si lo in amah a hawltu pawl hmuahhmuah ih hmuh dingin a phuang aw ringring tu a si. Duhnak taktak thinlung thawn Bawipa kan hawl theinak dingin a phuangaw tu Naute Zesuh ih thluasuahnak cu a ngaitun kan zate par ah a thar in thlen hram seh. Amen.