Kan Idol cu Jesuh Khrih asi

Kannih zumtu pawlih Idol cu Jesuh Khrih lawng si hai seh.

 (January 2, 2020)

Siarding: 1John 2:22-28; Jn 1:19-28

Bawi Khrih ah duhdawt zetmi nu le pa, u le nau pawl, Emmanuel Bawipa hminin cibai ka run lo buk hai. 2020 Kumthar puai teh nan rak hmang nuam cio hai maw? Tuihni cu 2020 January thla ni 2 ni, tlawngkai nilini asi. Tuihni ih kan siar dingmi Bible pawl cu 1John 2:22-28 asipei ih a tlangpi thu cu Khrih ih ral le Pathian ih ta si dingin hriak culhmi Christian timi thu asi. Thuthang Ttha sungah cun Jn 1:19-28 tiang asipei ih a tlangpi thu cu Tipilnak petu Johan ih tetttikhaannak thu asi. Tuihni ih ka lo hlawm duhmi cu “Kan Idol cu Jesuh Khrih asi” tinak asipei.

Tuihni kan siarmi Bible a voikhatnak ihsin Khrih ih ral timi Mirang ttong incun Antichrist timi thu asi. Khrih ih ral cu zo pawl ansi pei? Tuihni kan siarmi ah John in Khrih ih ral cu “Jesuh cu Messiah asilo atitupoh cu thuphanpertu asi. Cu pa cu Khrih ih ral asiih Pa le Fapa a hnongtu asi. Ziangahtile Fapa a hnongtu cun Pa khal a hnong asi’ tiah 1John 2:22-23 ah in sim fiang. Khrih dotu kan ti tikah Khrih siseh, a zirhmi pawl siseh, a Kohhran siseh, a tuahdahmi pawl siseh dodalnak asi vekin Khrih ih hmunah tla amah le mah hmun latu pawl ansi. Jesuh Khrih hrang hmun va pek lo in mah le mah kha Khrih dinhmun ah khaisan awknak tla a rak si. Jesuh Khrih in Mt 24:5 sungah “mi tampi cu ka hmin in a ra dingih ‘Keimah hi Messiah ka si’ tiah an ti dingih mi tampi an bum ding” tiah fiang keukeu in in sim kha kan hmu thei. Thuphuan 12:9 ah “Rulhreng tumpi, khuahlan rulpi, Khawsia asilole Satan tiih kawhmi, leilung pumpuluk mibumtu cu van ihsin hlon asi zo” tiah kan hmu. Curuangah Lucifer timi khawsia cu khuahlan lai ihsin mi va bum dingah a tawi vak rero dah zo asi. Kan san ah tla a tefasin pawl mi hmuahhmuah va bum dingah an tawivak rero lai. Satan ih hnattuan cu leitlun ah mi va bum dingah le van ahcun “Pathian hmai ah dingin a sun le zan in kan unau pawl sual puh dingah asi” tiah Thuphuan 12:10 ah in sim bet. Mibum hnattuan cu Khrih dotu a si ti kha thei uhsi.

Paul in Efesus khua ih Kohhran member pawl hnenah “Ka feh hnu ah ttihnungza cinghnia hrang an ra dingih tuuruun pawl hi an zoh men lo ding ti ka thei. Nanmah sung ihsin mihrek cu anmah lamih hruai duhah  thuphan per ta hrat in zumtu pawl an hruai sualnak tikcu caan a ra thleng ding” tiah ralrin a peknak cu Tirhthlah 20:29-30 ah fiang zetin kan hmu thei. Kanmah lak ihsin paisa duh ruangah maw, thuneinak duh ruangah maw, lal duh ruangah maw tthenttheknak a suak dingih mipi buaipi phahin mibumnak hnattuan kan hmu tikah Khrih dotu cu kanmah sungah a thok zo asi tiah kan thei thei asi. Ralring uhsi. An simnak le an hruainak kha va zum hlah uh. 

Cuhnak in tuihni kan siarmi 1John 2:27 sung ih ta vekin si sawn uhsi. “Nannih cu Khrih in a Thlarau nan parah a lo toih zo ruangah cuih Thlarau nan sungah a um sung ahcun midang ih zirh rero nan ttul lo. Ziangahtile a Thlarau in ziang hmuahhmuah cu a lo zirh ih a lo zirhmi tla thuphan asi fawnlo, thudik asi sawn. Curuangah Thlarau ih zirhmi cu thlun uhla Khrih thawn pehzom aw ringring in um uh” tiah kan hmu thei. Kannih cu Pathian ih ta si dingin Thlarau Thianghlim thawn hriak culhmi kan si ti duhnak asi. Cumi cu Baptism kan ngah lai ah siseh, Chrisma thapeknak kan ngah lai ah siseh hriak culhnak kan ngah asi. Olive hriak thawn culhnak kan ngah asi. Khua hlan lai ah Israel miphun pawlin Puithiam pawl siseh, Siangpahrang pawl siseh, cun Prophet pawl siseh hriak culhnak an pekih Pathian ih Thlarau Thianghlim cahnak cu an parah a rung thleng ttheu ih Pathian ih mipi kha dik le fel zetin thianhlimnak thawn Pathian ih duhdan in an rak hruai thei asi. Puithiam pawl kha hriak culh ih Ordination pek dingah Suahlannak 29:7 ah “Cule hriak la awla Puithiam Aaron ih lu ah na toih pei ih cutin cun hriak na culh pei” tiah kan hmu thei. Siangpahrawng pawl hriak cukhnak thawn pehparin 1Samuel 10:1 ah Prophet Samuel in siangpahrang ih hrilmi Saul kha hriak a culhnak thu kan hmu. 1Samuel 16:3 ah tla Samuel in David kha siangpahrang si dingin hriak a culhnak thu kan hmu thei. Siangpahrang pawl hriak an culh tinak cu siangpahrang a cannak sui lukhuh an khumnak ti langternak asi tiah asulam a um. Prophet pawl thawn pehparin Prophet Elijah in amah a roltu ding prophet Elisha kha hriak a culh asi tiah 1Siangphrang 19:16 ah kan hmu thei asi. Jesuh Khrih cu lei le van uktu Siangpahrang, Melkhizedek vekin a kumkhua Puithiam le Prophet tumbik asi ruangah Thlarau Thianghlim thawn Hriak cukhnak a ngah asi tiah Tirhthlah 10:38 ah in zirh asi. 

1Peter 2:9 ah “Sikhal sehla nannih cu hril cia miphun, Siangpahrang ih puithiam, miphun thianghlim, Pathian ih miphun bulce nan si” tiah kan hmu thei. Curuang ah kannih tla baptism kan ngahnak thawngin puithiam miphun, siangphrang miphun le prophet miphun nan si tiah 2^nd Vatican Council ih meeting pi ah thu in zirh asi. Puithiam kan sinak thawngin “kannih tla nitin tein kan ruangpumpi cu a thianghlimmi le cohlan tlak raithawinak bangtukin Pathian hnenah rak hlan ding kan si” tiah Rome 12:1 ah in zirh fiang asi. Siangpahrang pawlin an ukmi ram kha ral pawlin an lon theilo nak dingah ral do an ttul asi. Kannih tla siangpahrang miphun kan si zo ruangah leitlun tisa ral le khawsia ral pawl kha do ding kan si ve asi. Cumi cu kan thlarau nih humhinak a ngah theinak dingah asi. Prophet miphun kan si kan ti tikah kannih baptism ngahtu pawlin Pathian thu sim dingah ttuanvo kan nei asi. Kan nuncan ziaza tthatnak le duhdawtnak kan neinak kha leitlun khawvel pawlin Pathian an hmu theinak dingah asi. Jesuh Khrih in Jon 13:35 ah “pakhat le pakhat tlunah duhdawtnak nan neih ahcun zokhal in keimah  ih dungthluntu nan si kha an lo thei ding asi” tiah in zirh asi.

Kan dung zarh ah a lar zetmi cu Myanmar Idol program ih winner hrilni asi. Idol timi cu thinlung takin uarnak, kawl ttong in cun a tee suai nak asi. Benjamin maw, Tan Khun Kyaw maw, Yaw Kee maw, Esther maw na Idol cu? Na tikcu caan le a tangka pawl hmanah Idol voting ah maw na theh vorh ttheh? Thla na cam lai fangah teh na thinlung sungah na idol voting pekmi hi a cuang rero lo maw? Asinain “Kannih zumtu pawlih Idol cu Jesuh Khrih lawng si hai seh.” Jesuh Khrih hmun ah tha na pek zetmi na idol a lut pang asi ahcun Anti-Christ, Falam ttong in cun Khrih dotu na cang ding khah. Ziangahtile Khrih ai ah anmah kha hmun na pek zo kha. Cun Idol ihsin Idolatry a rak cang sinsin ahcun a poi sinsin ding. Idolatry cu milem biaknak ti asi. Cun Idolater cu milembiaktu asi. Minung asilole thilri kha na uar tikah na idol asi. Idol aa in na aa, ihhmu thawlo, rawl eika thaw lo tiang na si ahcun idolater silole idolatry ah na cang ding. Khrih dotu na si ding. Ralrinnak ka lo pe sal. A lo serhsiamtu le a lo rundamtu Jesuh Khrih teh kha tlukin na uar maw, na duhdawt thei maw? 

Kannih hriak culhnak ngahtu siangpahrang miphun, puithiam miphun, prophet miphun pawlih idol cu Jesuh Khrih asi. Jesuh Khrih cu Idol winner asi. Myanmar Idol winner asilo. Leitlun ih Idol winner asi, kumkhua in winner asi ringring, zohman nih an long thei lo ding. Amah cu zuam thei tla asilo. A cumi cu kan thinlung, kan nunnak le kan ziangzongza thawn duhdawt uhsi, uar uhsi.

Naute Jesuh in nan zaten lo thluasuah hram seh. Amen.