Jesuh ih sungkhat pawl

Jan 28, 2020 hrangih Thuthangttha, Thlarau rawl

Jesuh ih sungkhat pawl

Caantluang zarhthumnak, tlawngkai nihnih ni (Jan 28, 2020)

Siarding: 2Samuel 6:12-15, 17-19; Ps. 24:7-10; Mk. 3:31-35.   

Tuisun kan siarmi Thuthangttha hi la in mihrek cun 'Jesuh in unau suahpi a nei" an ti, mihrek in ''Mary cu Jesuh hman in a nu ti in a pom lo'' an ti. Himi thu sim fiangaw sehla ka duh. Himi Bible catlang kan zoh tthat asi len a linglet in kan hmu dingih Mary cu Jesuh ih nu a si thu a fiang vuarvi ding. Ziangah ti le Jesuh cu Pathian ih Fapa neihsun a si vekin Maria ih sung ihsin hi leiung ih hrin a si ruangah a si. Jn 3:16, 18 ahcun ''Pathian in leilung hi a duhdawt zet ruangah a Fapa neihsun a pek'' ti kan hmu. 1Jn 4:9 khalah ''Pathian ih in duhdawtnak cu a Fapa neihsun hi leiung ahhin run thlah in a langter ih amah thawngin nunnak kan conak dingah a si.'' ti in kan hmu thotho. Hi catlang pawl kan zoh ah Pathian in fapa dang a neilo ti a fiang. Cun "Mary in fate dang a neih le neihlo"  thu ah hlanlai ih an ttongfang hmandaan khal in lai tampi a rel. Kan Bible cun Mt. 1:25 ah ''fapa a hrin hlan tiang a ihpi lo.'' a ti. Kan laittong umdaan ih kan ruah ahcun "fapa a hrin hnu cun ihpi ding'' khi a bang. Asinan grik ttongfang umdan ahcun "an it tlang nawn lo" ti thawn a bang aw. Hiimi ttongfang ih thuhnu a neih mi cu "Mary cu Joseph thawn siseh, mipa dang thawn siseh, an it tlang dah lo" ti a si.

             Cun Grik pawl cun nu le pa ih unau pawl ih fa pawl khal cu "unau" ti in an hmang ttheu. TUi kan siarmi Bible khalla Jesuh ih unau timi pawl hi sulkhat kual, suahpi ngaingai an si lo. Curuangah Mary in fa a dang a nei lo ih Jesuh khal cun suahpi unau a nei lo ti a fiang. Mary cu Jesuh ih nu a si maw si lo? Lk 2:5-7 ah ''Mary cu nau a pai ih Bethlehem khua an um lai-ah nau hrin tikcu a kim. A fatir ah fapa a hring'' ti in kan hmu. Mt. 1:24-25 ahcun ''Joseph cu a hung tthang ih Mari cu a tthit. Fapa a hring ih a hmin ah Jesuh tiah a sak.'' ti ah kan hmu thotho. Mt. 1:20 ah le ''David tefasin Joseph, Mari hi na nupi ih tthit dingah ttih hlah! Ziangah tile fa a vonnak hi Thlarau Thianghlim thawngin a si. Amah in fapa a hring ding ih a hmin ah Jesuh tiah na sak pei." ti in a um. Himi Bicle catlang pawl kan zoh tikah Jesuh cu Mary ih pumsung ihsin nau a sem a si ruangah Mary ih pum a rak hmang sung men siloin, Mary ih fa ngaingai a si ti a fiang. Jesuh ih lei tisa sinak cu Mary hnen ihsin a ngahmi a si ii Mary cu Jesuh ih nu a si. Cuti sinacing in ziang ruangah si pei, Mt 12:48 - ''zoso ka nu cu a si, zoso ka naule pawl cu an si'' a ti. Jesuh cu Jew miphun felfel a si vek in Jew pawl ih Daan pawl thluntu a si ve. Amah rori in ''Daan pawl pahbal dingah ka ra lo, kimter dingah ka ra (Mt. 5:17)" a ti. Cui daan pawl lakah "na nu le na pa upat aw (Deuh 5:16)" ti khal a tel. Jesuh cu amah le amah a kalhaw thei lo ruangah "Mary cu a nu sinak in a hnong lo." Himi ihsin a ra lang fiang vivo mi cu Jesuh ih hrang ahcun lei tisa ih pehtlaih awknak, sungkhat sinak hnak in thlarau lei ih pehtlaih awknak le sungkhat sinak hi a sunglawi sawn, a ngaina sawn ti hi a si. Thlarau lam ah Jesuh le Mary ih pehtlaih awknak malte zoh ta uh si. Lk 11:27 ah, ''a lo hringtu le a lo tuamhlawmtu nunau cu mi thluasuah a va si so!'' ti ih an ti laiah Jesuh cun, "Pathian thu a thei ih a thlun taktaktu pawl cu mi thluasuah an si sawn" ti in a sawn. Lk 1:38 ah ''Kei cu Bawipa ih salnu ka si. Na sim vek cun ka parah si ko seh." a ti. Amai mualpho ding hman thupi ah ruat nawn lo in "Pathian ih thu" a ti theitu a si. Bible sungah nupinu tthattha tampi kan hmu, sunlawih tlak nupinu tampi kan hmu, an nuncan cawntlak nupinu tampi kan hmu. Asinan Mary hnak ih Pathian thu a thlun thei deuhtu kan thei ban lo.

                Hi nupinu tthattha pawl hi anmai bulpak nun ih an ningzahnak, micing an sinak, ruangah maw, an pasal ruangah maw, an miphun ruangah maw ti in thu tampi ruangah Pathian lam hoi in an um thu kan hmu. Asinan Mary cu cutivek thu pakhat khal um lo-in fala note a si. Is 7:14 "nunau no pakhat in fa a vun dingih fapa a hring ding, a hmin ah "Immanuel" tiah na sak ding." ti ih kan hmuh vekin, Lk 1:27 ahcun ''Pathian in vancungmi Gabriel cu Galilee ram, Nazareth khua, Joseph thawn tthi aw ding ih thukamnak a neimi fala hnenah a thlah." ti in kan hmu. Asinan Mary cu cutivek thu pakhat khal um lo-in fala note si cingin Pathian thu ah a rak hngat aw ngam. Lk 2:19 ahcun ''Mary in hi thu huahhmuah cu ttha zet in a ciing ringring ih thuk zet in a ruat'' ti a si. Mary ih thinlung sungah Jesuh le Jesuh ih thu cu a um camcin. Himi pawl kan zoh tikah Mary hnak ih Pathian thu a ngai le a nunpitu kan thei ban lo.Cuti a si le Mk 3:35 ih ''Pathian duhnak a tuahtu hmuahhmuah cu ka unau, ka farnu le ka nu an si.'' ti ih a ti mi ah Mary cu hmaisabik ah a tel ti a fiang.

A tlun ah "Mary cu Jesuh hringtu nu a si ruangah Jesuh ih nu rori a si" ti kan thei zo ih tu ah "Mary cun Pathian duhnak a tuahnak ruangah Jesuh ih nu a si" ti a lang sal lala. Cuticun Mary cun Jesuh ih nu sinak cu lei tisa sinak le thlarau lam khal in a kop cih thluh.Tuisun ah Jesu in nang le kei khal a unau ti ah in ruat ve. Asinan a unau si ding ah kan mai lam ih kan ralrin ding a um. Jn 1:12 ''Cuithu a zumtu cu Pathian ih fate cantheinak thu a pek. leilung daan, minung ih thi le sa in si lo, Pathian a mah rori kha an Pa a si" a ti. "1Jn 3:2 "Ka duhdawtmi pawl, a tu cu Pathian fa te kan si zo, asinan ziangbangtuk kan si ding ti cu a fiang hrih lo'' ti  a si.  Rm 8:16-17 ahcun "Pathian fa kan si zo ruangah Khrih thawn ro co tlang tu ding kan si" ti in kan hmu. Bawipa Jesuh thawn unau kan sinak a lang zet.Asinan, Pathian duhnak kan tuah lo ahcun Jesuh thawn unau kan sinak a hlo ding. Bawipa cun a unau ah in cohlang khal sehla kan mai lam in kan umtudaan in kan cohlanglo ah a cang ding. Ziangah tile a duhnak kan tuahlo ruangah a si. Amah Bawipa rori in "''Pathian duhnak a tuahtu hmuahhmuah cu ka unau an si" a ti.Jesuh thawi unau sin a duh a si le "Pathian ih duhnak tuah aw."Pathian ih duhnak a tuahtu pawl cu Jesuh ih sungkhat ah an cang.