Pope Francis in Caritas Internationalis hotu zaten cawl ter dingah thu botcat.

Pope Francis in Caritas Internationalis hotu zaten cawl ter dingah thu botcat.

          Pope Francis in tlawngkai nihnih ni ah International Confederation of Charities (Caritas Internationalis) ih hotu upa dinhmun ih tuanvo latu zaten a cawl ter hai ih pawlkom ih hoha daan tha deuh dingah rei lo te sung hoha tu ding pakhat tuanvo a pek.Tu ahcun a lawng mi Caritas Internationalis (CI) pawlkom ih ukawknak hnatuan pawl tuan thei dingah Italy hruaikainak lam ih ruahnak petu Pier Francesco Pinelli tuanvo a ap thu Pope Francis in Nov 22 ah a rak suah.

          Pope ih thu a suah theh hnu ah Catholic Confederation of Charities ih hohanak lam sinak zaten ka cawl ter zo tiin Pope Francis in a rak sim. Caritas Internationalis ih hotu, Philippines Cardinal Luis Antonio Tagle le general secretary, Aloysius John pawl khal Pope ih thubohcatnak vekin an cawl ter ve. Cardinal le secretary lawng si loin sinak ih colh ternak tuar mi dinhmun pawl ah vice-president,sumpai kiltu, Pawlpi dinhmun ih secretary, hohanak lam council le ai-awhtu council ih tuanvo neitu pawl zaten an tel.

          Caritas Internationalis ih “hruaikainak le tuah daan pawl” cu sambaunak pawl hmuh a theih ih hlei ah pawlkom lungrualnak le hnatuantu pawl ih thinlung um tu daan lam ah khal ruahnak luarih ih tuah mi pawl hmuh a theih tiin Caristas Internationalis pawlkom a lenglam ihsin a dang ten cekfelnak vekih an tarlang ruangah Pope in hi vek in thubohcatnak a tuah thu thureltlangnak ah a sim.

          Caritas Internationalis (CI) pawlkom cu 1951 ih rak din mi a si ih hi pawlkom cu ram zaten 200 luan in nunphung bomnak charity pawlkom 162 thawn an din mi leilungpi ih Catholic confederation pawlkom a si. CI pawlkom zungpi cu Rome ah a um ih Vatican Pope zungpi in CI pawlkom ih cangvaihnak pawl zoh in a uk.

          Caritas Internationalis (CI) pawlkom ih upa lam sinak ih tuan zat cu kumli veikhat tuanvo pawl an thleng theu ih pawlkom ih thureltlangnak ah upa lam tuanvo neitu pawl pek a si theu. Caritas Internationalis ih a ralai ding mi general conference cu 2023, May thla ah a si nan conference hlan ah Pope in tu vekin CI upa pawl a colh ter mi a si.

          Tu ahcun rei lo te sung tuanvo ap mi hotu Pinelli in Caritas Internationalis pawlkom tuanvo la in a hoha rero lai ih Dicastery for Promoting Integral Human Development (Vatican ih thansonak hnatuan lam zung) ihsin (Jesuit Puithiam pawlkom) in Cardinal Michael Sani thawn reltlang in tuah dingah a sim. Dicastery for Promoting Integral Human Development (Vatican ih thansonak lam zungpi) in tui kum sungah Caritas International pawlkom ih hnatuan sungah a dang ten a zalen mi zingzoinak pakhat thawn cek fel dingah tuanvo a rak pek thu Vatican thansonak zung in thureltlangnak ah a rak sim. Cekfelnak ah CI ih secretary hnatuan a va zingzoi ih milai sinak thawn pehpar mi Catholic tidaan pawl thawn tuah mi a um le um lo leh pakhat le pakhat upat awknak a um le um lo parah a hleice in a rak cekfel.

          Caritas Internationalis pawlkom ah a hlan ih hnatuantu le tui hnatuantu thar pawl khal hi cekfelnak ih tel cio dingah a rak sawm ih thusuhnak le zingzoinak pawl vek a si le sumpai lam ah a tul lo ih hmannak, nunau le mipa thatlonak lam zoh mawi lo mi a um lo tiah a tarlang. Asinan, thusuhnak vek a si le a dang thulu pawl le a thupi dinhmun pawl ih hnatuannak pawl ah buainak a um thu theih a si. Caritas Internationalis pawlkom ih ukawknak lam le tuah daan kel a sangsang ah lungrualnak le hnatuantu pawl ih thinlung lam ah thilcang a um thu zingzoi mi simnak ca ah a tarlang.

          Pope Francis ih thusuah mi vek a si le rei lo te sung hotu Pinelli cu Caritas Internationalis pawlkom ih forhfialnak, simrelnak zung hotu, Maria amparo Alonso Escobar in a sawmdawl dingih Jesuit Puithiam, Fr. Manuel Morujao in Caritas Internationalis hnatuantu pawl ih bulpaak lam, thlarau lam lamhmuhtu dinhmun in tuanvo a lak ding thu khal a tarlang.

          Pinelli ih tuanvo cu 2023 ih tuah ding mi Caritas Internationalis ih general conference timtuahnak hrangah upadi pawl suah dingah, Caritas Internationalis ih thuhla pawl timtuah ih ngan ding tla a tel. 2023 ih tuah ding mi Caritas Internationalis ih general conference timtuahnak hrangah Cardinal Antonio Tagle cu Pinelli thawn an tuan tlang ding.

          Pope Francis ih suah mi Pawlpi thawn pehpar mi thusuah ‘Praedicate evangelium’ sungah The Dicastery for Promoting Integral Human Development thansonak lam Vatican zungpi in “Caritas Internationalis parah tuah theinak a neih thu, hi vek Catholic thawn pehpar mi tumtahnak pawl le charity pawlkom pawl le sumpai pawlkom pawl dinnak le an mah zingzoinak hnatuan pawl tuah dingah Vatican ih upadi tuah theinak vekin Promoting Integral Human Development thansonak lam thawn pehpar mi Vatican zungpi parah tuanvo a ap thu” Promoting Integral Human Development thansonak lam thawn pehpar mi Vatican zungpi in thureltlangnak ah a suah thu a than.

          Hi thuthang cu CNA thuthang ih kan ngah mi a si.

https://bit.ly/3TZ23TT