Pathian le minung țhit umnak (Sim tu - Rev. Fr. David Kap Cin Mang) December 15, 2022

Pathian le minung țhit umnak

Thuthangtha sim tu - Rev. Fr. David Kap Cin Mang

December 15, 2022 (Nili ni)

RVA ihsin thuthangtha a rak ngaitu nan zate’n cibai ka run lo buk hai a si.

Kan Bawipa Jesuh Khrih ih zangfahnak, Pa Pathian ih duhdawtnak le Thiang Thlarau ih pawlkomnak cu nanmah hnen ah um seh law!

Tui tum ah Pathian in minung pawl in duhdawtnak a maksak zia a rak langter daan pawl ruat phah in thazang lak khawm ding ka duh a si.

Tuini a veikhatnak ih kan siarmi Is 54:1-10 sung kan zoh tikah Pathian ih Israel mi pawl a duhdawt zia a lang ter nasa. “A lo semsuahtu cu na pasal a si ding” ti rori’n a ti (v. 5). A tanglam kan vun siar peh a sile, hiti’n a ngan bet: Maw Israel, nupi note bangtuk na si, A pasal ih maak mi le ninghang riahsia ih a ummi nunau bangtuk na si. Sikhalsehla Bawipa in a hnenah a lo kosal ih, “Tikcu tawite sung ka lo then; Ka lo duhdawtnak a thuuk ruangah ka lo hruaisal ding. Caan tawite sung ka thinheng in khatlam ka lo hoi san; Asinan kumkhua in a hngetmi ka lo duhdawtnak cu ka lo hmuh ding,” a ti. A lo runtu Bawipa in a ti a si (vs. 6-8).

 Duhdawtmi u le nau tla, kan Bible sung kan zoh a sile, Pathian in a sersiam mi minung pawl a duhdawtnak hi nupa karlak ih duhdawtnak vekin a langter mi tampi kan hmu thei.

Bible thiam pawl ih an sim theu mi cu, Pathian in Eden hmuan sungih milai a rak sersiam ihsin milai pawl cu a nupi ah a rak thi zo ti a si. Curuangah Adam le Eve nupa sinak ih a rak komawk ter mi khal hi, Pathian le milai pehtlaihawknak rak lang ter tu pakhat a si ve.

Thit-umnak thawn nupa dinhmun ih komawk tikah, pumkhat sakhat sungih komawk a si ih, nun tawmawk nak pakhat khal a si.

Pathian in a nupi dingih milai a rak sersiam tikah amaih nun tawmpi tu dingah ti’n a rak sersiam mi a si. Hmansehla, milai lam ih titsa phohnak ruangah milai cu maak a rak tuar. Cucu sualnak ruangih Pathian ih nun tawm thei nawn lo dinhmun ih kan thlen nak a si.

Hiti dinhmun kan thlen hnu khal ah, Pathian in milai pawl parih a ret mi a duhdawtnak hi a cem thei cuanglo. Curuangah, Pathian in Abraham, Noah le Moses tei pawl hmangin amah thawn komawk theisal nak dingah covenant timi thukamnak a rak tuah. Ahleicein, Sinai tlang parih khukamnak an rak tuah mi hin Israel miphun pawl a nupi ih a cohlan salnak a rak lang ter. Culawng siloin, a palai pawl hmangin a duhdawtnak maksak zia khal mangbaza tampi tuahsak in a rak lang ter ko nan, milai lam ih titsa phohnak ruangah amaih nun tawm tlak mi dinhmun an rak thleng thei cuanglo.

Tuini ih kan siarmi Is sung kan zoh tikah, milai pawl ih titsa phohnak ruangah Pathian khal in a dungtun lawk ve timi a lang ter. Hmansehla, a sualnak pawl hmuahhmuah ngaithiam in, a nupi dinhmun ih khaisang sal dingah a kam mi thu khal fiang zet in kan hmu.

Cuih Pathian ih tiamkam mi a rung famkim taktak cu, Jesu Khrih minung sinak a run lak tikah a si. Curuangah Christmas thawn pehpar in Bible thiam pawl cun ‘Divine Marriage’ Pathian le minung thit-umnak ti’n an kawh theunak a si.

Pathian amah rori hi Fapa Jesu Khrih thawngin mopa dinhmun in leilung ah a rung tum ih, a duhdawtnak a maksak zia le a cem thei lo zia khal, thinglamtah parih thihnak tuar tiangin a run lang ter. Thinglamtah parih a thlet mi a thisen thawn, milai pawl ih uretnak sualnak hmuahhmuah khal a run tlenfai ih, a duhdawtnak a cohlang tu hmuahhmuah in mo-thar dinhmun ah in khaisang sal a si. Ziangtluk in a sunglawi!

Tuih Christmas caan hi, Bawipai’ in duhdawtnak maksak zia kan vun ruah sal ding caan tha a si. In duhdawt tuk ruangah amaih nun tawmpi thei dingin amah rori kanmaih  minung sinak in tawm dingah le in tthi dingah mopa dinhmun in leilung ih a rung tumnak thuthuk pawl a thar in kan ruat sal pei uh.

Mo-thar in mopa thawn tonawk ih umtlang ding a hngahhlap zet vekin nang le kei teh, kan mopa a simi Bawipa tong ngah dingah kan hngakhlap ve maw? ziangti vekin timtuahnak teh kan nei?