2023 January 3 (Tlawngkai nihnih) ni RVA Falam service in thuthangṭha simnak:

2023 January 3 (Tlawngkai nihnih) ni RVA Falam service in thuthangṭha simnak:

“Pathian Tuufa hi zoh uh. Hi leitlun sualnak tlentu hi zoh uh. Tuufa ih zanriah donak ah
kawhnak a ngahtu pawl cu mithluasuah an si!”
RVA Falam service in thuthangṭha a ngaitu Bawi Khrih ah duhdawtmi nu le pa, u le nau
pawl, Runtupa in leitlun ah kan mah hrang ih a rak ken mi duhdawtnak, lungawinak le hnangam
daihnak pawl cu nan hnen ah um ringring hram seh. January 3 ni hi a thianghlim bikmi Jesuh ih
hmin puai ni khal a si. Kan Bawipa Jesuh ih hmin sunglawi sin ko seh. Bible siarnak kan nei ta hrih
pei. Tuni kan siar ding mi thuthangṭha cu Johan 1: 29-34 tiang a si.
Johan 1:29-34
A thai sun ah Johan in Jesuh a hnenih a rat lai kha a hmu ih, “Leilung sualnak a phurtu
Pathian Tuufa khi zoh hnik uh! ‘Ka dungin mi pakhat a ra, asinain kei hnakin a tum sawn,
ziangahtile ka suah hlanah anih cu a rak um zo,’ tiih a thuhla ka sim rero zo mipa cu amah hi a si.
Amah hi zo a si ding ti ka rak thei lo. Asinan amah hi Israel mi pawl ih an theihnak dingah tidai in
baptisma ka pek rero sannak a si,” tiah a ti. Johan in, “Thlarau cu vancung ihsin thuro bangin a rung
ih a parah a rung fut kha ka hmu. Amah teu a si tihi ka rak thei thotho cuang lo, sikhalsehla tidai in
baptisma pe dingih i thlahtu Pathian in ‘Thlarau a rung dingih mi pakhat parih a fut kha na hmu
ding; cupa cu Thlarau Thianghlim in baptisma petu ding a si,’ tiah i sim. Cupa cu ka hmu ngah zo.
Fiang tein ka lo sim: Amah cu Pathian Fapa a si,” tiah a hmuhmi le a theihmi kha a sim.
(Bawipa ih thuthangṭha a si.)
Hi kan siarmi Bible sungah baptisma petu Johan in Bawi Jesuh kha Pathian Tuufa tiin le
Pathian Fapa tiin a khih hmunnak kan hmu thei. Bawi Jesuh hi Bible sungah a phunphun in an
lang ter: a hmaisa bikah Ṭongkam a rak si; cuih Ṭongkam cu Minung ah a rak cang ih “Jesuh” tiah
a hmin sak ding in vancungmi nih a fial vek in Joseph in Jesuh tiah a rak sak. ‘Emmanuel’ tiin
siseh, ‘David Fapa’ tiin siseh, ‘Milai fapa’ tiin siseh, tuni Gospel kan siar mi sungah cun ‘Pathian
Tuufa’ tiin le ‘Pathian Fapa’ tiin kan hmu thei.
Tuni ah “Pathian Tuufa’ timi tu bik kha kan ruat tlang ding in ka lo sawm duh. Tuufa asilole
tuu note hi bible sung ah Pathian hnen ih raithawinak ah an hmang ṭheu tikhal cu kan hmu thei ih
tuu sa cu ei theih mi khal a rak si. Johan in “Leilung sualnak a phurtu Pathian Tuufa khi zoh hnik
uh” a ti nak in Jesuh khrih hi Pathian hnen raithawinak hrangah a si ti a lang ter vek in ei ding mi sa
a si tikhal a lang ter a si. Jesuh a mah khal in ka sa ei uh a rak ti. A thoknak ih ka simmi “Pathian
Tuufa hi zoh uh. Hi leitlun sualnak tlentu hi zoh uh. Tuufa ih zanriah donak ah kawhnak a
ngahtu pawl cu mithluasuah an si!” timi hi Missa raithawinak ah kan tel tin in Bawipa Thisa kan
san hlan te ah kan thei ringring mi a si. Baptisma petu Johan in Pathian Tuufa zoh uh a timi kan nih
in Missa raithawinak ah kan rak tuah ringring kan rak zoh ringring a si. Curuangah mi thluasuah zet
kan si.
Kan Bawipa Jesuh Khrih ih a sihnak hi kan zoh a si le a thupi bik in phun thum in kan hmu
thei ding tiin ka ruat. Cumi pawl cu a hmaisa bikah Fapa Pathian asilole Jesuh Khrih cu Ṭongkam
in a rak um. Cuih Ṭongkam cu Pathian a si ih ziang hmuahhmuah cuih Ṭongkam in sersiam a si ih,
cuih Ṭongkam kha minung ah a cang ti Johan 1 sungah kan hmu thei. Fapa Pathian cu Ṭongkam a
si ih Minung ah a cang ih minung pian zia in a piang (Filipi 2:7). Fapa Pathian ih sihnak pahnih kan
hmu zo, “Ṭongkam le Minung.” Hmuh theilo mi Ṭongkam in hmuh thei mi Minung ah a cang ih
cuih hnuah Pathian Tuufa te a simi a mah ih taksa kan ei thei nak ding ah sangreu hmang in a taksa

in pek a si. Minung sinak a lak mi Fapa Pathian Jesuh Khrih hmu cu mit ih hmu thei lo mi Pa
Pathian hmu thawn a bang ih a Bawipa ih Pumsa a si mi sangreu hmu khal cu a mah Jesuh Khrih
hmu thawn a bang aw ve a si. Curuangah Johan in Pathian Tuufa zoh uh a timi le Tlangbawi in
Jesuh Pumsa a simi sangreu kha thlir in Pathian Tuufa zoh u law a timi khal an bang aw ve a si.
Cuih Tuufa a zoh tu le Tuufa zanriah ah kawhnak a hmu mi a tel ngah ve mi pawl cu mi thluasuah
taktak an si timi kha tuni ah a thar in mang sal in Pathian hnen ah lungawi thu kan sim tlang ding in
ka lo sawm duh.
Jesuh cu hmuthei lo mi Ṭongkam a si, cun hmu theimi Minung ah a cang ih cuih hnu ah ei
thei mi sangreu ah a cang hrih. Cumi pawl kan zum ṭheh thei lawng ah Jesuh Khrih kha a famkim
in a zumtu kan si ding thei ding a si. A ngaitu nan zate parah ka lung a awi. Bawipa in lo thluasuah
hram seh.

Fr. Peter Lal Zin Thang (Hakha Diocese)