Zumnak zar to

Feb 4, 2020 hrangih Thuthangttha, Thlarau rawl

Zumnak zar to

Caantluang zarhlinak, tlawngkai nihnih ni (Feb 4, 2020)

Siarding: 2Samuel 18:9-10, 14, 24-25, 30- 19:3; Ps. 86:1-6; Mk. 5:21-43.   

             Tuisun cu kan Bishop Lucius Hre Kung ih suahni a si vek in thlacam saknak thawn ''Suahni lungawi cibai - Happy Birthday" tiah cibai buknak ka rawn nei hmaisa.Tuisun kan siarmi Thuthangttah ah hin, Jesuh in mi na a damternak kan hmu. Mina pawl ih dinhmun kan zoh tikah an pahnih in nunau veve an si ih pakhat cu Jairus timi mi upa pakhat ih fanu, kum 12 mi a si. Hinu te ih damnak dingh a pa Jairus cu Jesuh hnenah amah rori feh in a Inn ih ra dingah a va sawm. Apa ih thlacam saknak - Jesuh a va sawmnak - ruangah a fanu cun damnak a hmu ti kan thei. Jairus cu zo a si ti kan theihtawk cu tonkhawmawknak inn ih upa lam ah a tel ban ti a si. Himi ih a tarlang mi pakhat cu ''Jairus cu Jew miphun lakih mi upa a si ban'' ti a si.Jew pawl ih rinsan tlak deuh le ttuanvo nei deuh pawl cun Jesuh cu an engtainak thu kan hmu ttheu. Tu ahcun Jairus cun ''ka fanu a dam tak ah'' ti in a mai sinak le a kiangkap ruat lo in a fanu ih hrangah Jesuh ih hnen ah a pan ih hrhdamnak a dil sak a si."Jesuh cu mi menmen a si lo" ti mi Jairus ih zumnak kan hmuh thei vek in cui a zummi pa, Jesuh, ih hnen ih a fanu ih hrang ''a va dilsaknak - midang hrang thlla a cam sak nak" kan hmu.

    Jairus ih ''midang zawn a ruahnak" le a zum feknak pawl cu cawn tlak an si. Jesuh cu Jairus ih fanu damnak pe dingah Jairus ih inn lam a pan lai ah a fehnak lam tluan ah mipi in an rak um pi, an rak thlun, an rak zoh. Cui mipi pawl lakah "thidok nat'' in kum hleihnih sung a na zo mi nunau pakhat a rak tel ve. Cu nu ih natnak kan zoh a si le midang lakih lengvak ding a si lo, daan in a duh lo. Lv. 15:25-30 sungah ''Nunau pakhat in thlatin thi a neih mi hlei ah ni tampi thi a neih ahcun, asi lole nunau daan keel lengih thi a neih ahcun, thi a neih sung hmuahhmuah cu nunau daan a neih sung vekin mi thiangfai lo a si" ti in kan hmu. Cuti asi ruangah thidok nat neitu nunaunu khal cu mi thiangfailo a rak si. Amah a thiangfailo ti lawng si loin a mah a thamngahtu, a ihnak le a tonak a thamngahtu pawl khal mi thiangfailo ah an cang thluh. Jesuh khal cu hinu ih a ra tong ruangah daan feh zawng ih kan zoh a si ahcun a thinghlim nawnlo khi a si ve.Hinu cun amai zumnak ruangah Jesuh ih hnenah a pan, "a puan ka tham thei ah cun ka dam ko ding" a ti. Amah in a kut ka parah suangseh ti hmn a si hrih lo, amah minung thamngah ding hman a si hrih lo, "a hruk mi hnipuan" tham ngah ding lawng a si lai. Cumi hmanah damnak a ngah ding a zum, a zumnak ziangtluk in a fek. A natnak lam kan zoh tikah "kum hleihnih" a ki zo. Jairus ih fanu hman kum hleihnih te a si ih Jairus ih fnu ih kumzat a na zo. Aneih a siaah cem ko in a hlawm aw ko, siibawi tin hnenah a feh ih a zing aw ko, a sinan,  a dam thei cuanglo. Anatnak ih besiatzia kan hmu thei. Asinan ruahsannak a nei lai ih cui a ruahsannak cu Jesuh ah a si, "a puanzim te ka tham ngah ahcun ka dam ding" Cui a ruahsannak le a zumnak in thazang a pe. Curuangah ''mi thiangfailo a sinak ruangih mii lak ih tlang thei lo'' a sinak cu thup hlo tahrat in mipi lakah a feh ih Jesuh ih puam tham thei ding in a zuam. A zuam vek in a tlin, Jesuh ih puan cu a tham ngah. A zum vek in a ngah, "a natnak ihsin a dam.'' Asinan zianghmuahhmuah theitu Pathian cun aa rak thei, mipi lakah a hnipuan thamngahtu an tampi ko ding nan ''tumtahnak'' thawi ra thamtu an um ti a rak thei. Mipi an tamtuk ruangah a hnipuan thawi dai aw ngahtu an tam zet ko nan cupawl hmuahhmuah in an tthhathnem pi lo, damnak an ngah cuanglo, ''zumnak'' thawi a ra thamtu in damnak a ngah ti khal a rak thei. Curuangah Jesuh cun amah thamtu a hawl, "zo ha ii tham" a ti.Miburpi lakih tlangleng lai, "zo ha ii tham" ti cu duhsan neilo a bang, curuangah a dungthluntu pawl in "lungkim hnailo'' ih an rak sawnnak a si. Asinan Jesuh cun duhsan nei in a hawl a si.

              Nunaunu cun a ttih tlohthlo. Jesuh in ii kawk pang pei maw ti hnak in amah "thidok nat" ruangih Bawipa Jesuh tiangtinag "mi thiang fai lo" a can cer ding khal a ruat phah a si ko ding. Jesuh thawi an hmuhawk le an tonawk taktak ahcun a ttihphannak vek sin awn loin a rak hngahhlap vek le a rak ruahsan vek in a si sawn, "na zumnak in a lo damter" ti a si. Himi ah Bawipa Jesuh ih a hman mi ttongfang kan zoh a si le dam menmen hnak in "rundam na si" ti mi a khih hmuh. "Dai ten va feh aw, remdaihnak thawn feh aw" ti a si. Na nawn lo ding a khih hmuh ruangah rundamnak ttongfang le sullam a tel.Bawipa Jesuh a ra hruaitu cu Jairus a si ih a fanu hrangah ruahsannak thawn a ra hruai. Cu ahcun Jairus hnen ih thu a ra thleng mi cu "na fanu a thi zo, Bawipa khal hnaihnok duh nawn hlah" ti a si. Ruahsannak um nawn lo bembem dinhmun a si. Jairus ih hrang ahcun "Van zoh le a sang, Lei zoh le a pit" timi dinhmun a thleng. Jesuh cun "phang duh hlah, amah lawngte zum aw" a ti ih a zumnak cu thaarthawh ter sal. Jesuh cun a mai hruai ttheumi a dungthlun pathum, Peter, James le John, pawl hruai in Jairus fanu ih umnak hmun ah an feh. Minung pawl ih ttahaw le ninghannak pawl, Jesu ih awkam parih an rak thungrulh dan pawl zoh ah Jairus fanu cu a thi taktak ti asi. Asinan Jesuh cu ttong fangkhat ih sersiamtu a si vek in le ziang hmuahhmuah cu amah thawng ih sersiam an si vekin tu khalah "tho aw" timi thupek voikhat te in Jairus fanu cu nunnak ah a kaihruai sal. Nauhaknu te ih cangvaih daan, mipi pawl ih an mang a bang daan, le ei ding rawl a pekternak pawl in "Jairus fanu cu a nung taktak" ti a fiangApa Jairus ih "thlacamnak" zar to in nunnak a nei sal. Nangkhal zum aw, na nung ding. Na zumnak ruangah midanag khal an nung thei.