Tthat Cuh ih Tthatlonak

3rd Monday-II        Readings: 2 Samuel 5:1-7,10; Mk 3:22-30

        Tthat Cuh ih Tthatlonak

               Mittha pawl in anmaih tthatnak an rel ciamco dah lemlo ding. Asinan tthat cuh pawl cun mai tthatnak lang ter duh ah mi tthatlonak kan rel thiam ttheu tihi ka nundaan ka cek awk sal tikah ka hmu fiang nasa. Cuvek kha si tthat cuh ih tthatlonak cu. A poi zet mi thil a si nan poimawh lemlo vek in kan parah a rak thleng ih a rak um ve ttheu. Cancer nat hram a thok tikah zo hman ih theihthiam lo le hmuh tlak lo, poimawh ih ruah tlak lo vek te a si nan thil poimawh zet pakhat a si zia hi kan theih ttheh mi a si. Cuvek thotho in kan ruahnak tthalo tla hi hmuh theih le theihthiam dingih a um rero lo hmanah kan thinlung, kan thlarau hrangah cancer phunkhat a si tihi kan ruah thiam ding a poimawh tuk. Zumtu kan nunah mi ih tthatnak an tuah mi par ih lungawi pi thei lo tu si hi zaangfak za kan si. Cuih hnak ih roh sin tu pawl cu mi ih tthatnak an tuah mi parah iksiknak thawn sual hawl lam ih a ttang tu kan si bet. 

                Tuini kan siarmi Thuthangttha Mk 3:22-30 sungah Jerusalem ihsin a rami Daanthiam hrekkhat pawl in Jesuh ih Satan a dawi thei nak huham hi Pathian hmin in si lo in Satan bawipa Beelzabul ih huham in a si an ti. Anmaih ti theilo mi a ti thei tu Bawipa kha an dekcok, an hmuhsuam. Khatlam in cun an iksik kan ti mai ding. An hrangih ttih a nun zia Bawipai' simmi ttongkam in a lang ter: "minung hi ziangvek in an sual ih ttong siava tiang an va ttong hmanah ngaithiam an si ding nan Thlarau Thianghlim a thangsiat tu cu ngaidam a si lo ding, ziangahtile kumkhua daih sualnak a tuah a si".

Kan dung zarh sungih veikhat nak Cathianghlim kan siarmi pawl sungah Saul le David ih thuhla kha tuini ih ka thu lo hlawm mi thawn von kaikuah ta hrih ka duh. David in an ral Goliath a thah hnu Isarael ralkap pawl an ra tlun tikah Israel ramsung khua pawl ihsin nunau hmuahhmuah an tho ih Saul siangpahrang hmuak dingah an pok. Khuang le daar le ttingttang tum in lungawi ih laam phah ah nunau pawl in "Saul cun a thawng a sawm in a that; David cun a thawng a za in a that" tin hla an phuah. David kha an lom sawnnak aw Saul in a thei tikah a lungkim lo zet in a thinheng ciamco ih a iksik tukah David thah ding a tawl rel thlang a si. Iksik nak hin mithah duhnak tiang a thlen ter. Asinan David sawn cun siangpahrang Saul kha duhdawtnak thawn a upat ringring tikah Saul khal in a that thei cuanglo. David in Bawipai hriak culhmi cu ziangvek a si khal le ka kut ka thlak hrimhrim lo ding ti tiangin Saul ih siangpahrang sinak a lungawi pi in a upat thei thotho a si. Cuticun tuini ih veikhatnak kan siarmi Cathianghlim 2 Samuel 5:1-7 sungah David cu mipi pawl rori in an siangpahrang si dingah an fial ih hriak an culh ti kan hmu. Saul in a tthatnak cuh a duh nan a cuh thei cuanglo ta riai. Amaih siatral nak sawn ah a cang. Tthat cuh hi a va ttha lo tak ve. David siangpahrang hi Bawipa Jesuh khihhmuh tu a si ih Saul siangpahrang cu Daanthiam pawl khih hmuh tu a si. Nang le kei teh zo deuh in in khih hmuh?

              Veikhat veihnih cu ziang hman lo te ah tla hi tthat cuh ruangah kan buai ttheu. Khua le ram ah siseh Pawlpi ah siseh tlangram, Pawlram tivek ih thingfa phun mi a tthat ngah le kemaih phun mi tivek hrawngih cuh awk rero in tla buainak tumpi ah a cang thei. Tthat cuh ngah ruangih miat lan ta pawl hi cu dawt an um cuang lo so khaw. Kan daw tum pang le kan theih cia mi thuanthu kha von mang sal cio uh si. Hlanlai ah mi pakhat in vok le uico a vulh ih khuimi sawn in innpar ah a um dingih khuimi sawn inn hnuai ah a um ti kha relcat sak dingin anmah te lo a feh ter. A ruah daan cun lo a thlo tam deuh tu kha innpar ih ret ding ti a si. Vok le uico cu lo a va feh ih hnattuan an thok thlang. Vok cu sunvu lo a thlo ih a ttheh tikah inn lam pan in a tlung. Uico cu vok ih lo thlawh sung hmuahhmuah sunvu in hnemdai ah a rak it men. Vok a tlun hnu ah vok ih lo thlawh nak hmuahhmuah ui in a bual sal. An inntek pa cun amah rori lo ah feh in a va zoh tikah uico neh lawnglawng a hmu. Aw! Vok cu zianghman a ttuan lo pi uico lawng sisi a ttuan a ti ih uico cu inn parah a ret ih vok cu innhnuai ah a ret. Cutin tuini tiang uico cun innpar ih umnak khuan a ron ngah lan ta. Depde le tthat cuh ih hmin tthatnak ngah cu uico hmintthat ka ti. Nangteh ziangtin na ruat?