zuamnak nei kan ttul zia

Homily for Thursday (30/1/2020)

            Bawi Khrih ah duhdawt zetmi nu le pa, u le nau pawl, “kan Bawipa Jesuh Khrih ih zaangfah lainatnak, Pa Pathian ih duhdawtnak le Thlarau Thianghlim ih pawlkomnak pawl cu nan zate thawn um hram seh” tiah cibai ka run lo buk hai. Tuihni cu 2020 January ni 30, Tlawngkai nilini asi. Kan siar dingmi Bible pawl tla cu 2Samuel 7:18-19, 24-29 tiang, Thuthang Ttha ahcun Mk 4:21-25 tiang ansi pei. Kan ruah khawm dingmi ah ka hrilmi cu zuamnak nei kan ttul zia thu asi pei.

           Tuihni kan siarmi Thuthang ttha kha ruat cio tlang uhsi. Mk 4:24 Jesuh in an hnenah “Nan theimi kha ttha tein ruat uh. Midang tahnakih nan hmanmi kha Pathian in nanmah tahnak ah a hmang ding. Cuhnak ih nasa sawn hmanin a hmang ding asi” tiah in zirh asi. Himi Bible catlangte sungih Bawi Jesuh ttongmi hi kan Falam ttong in a fiang lemlo, Kawl Bible ah ka zoh sal tikah a fiang zet asi. A ti duhnak cu Midang hnenah thil kan pekmi zat in Pathian nih in pe sal ding. Midang hnenah malte lawng kan pek ahcun Pathian ih thluasuah khal malte lawng kan co ding. Midang hnenah tampi kan va tthen siang asi ahcun Pathian in kan parah thluasuah tampi in run toih ding. A liam thluahthlo hmanin in run toih ding asi ti duhnak asi. (Mirang ttong in investment= Kawl ttong in yinhnii hmyuhnan hmuh) tampi kan tuah thei ahcun a myat tampi kan co ding. Malte lawng yinhni hmyuhnanhmuh kan tuah ahcun malte lawng a myat kan co ding asi ti thu asi. 

Mk 2:24 cu fimthiam zirnak hrangah a dik zet asi. Tampi kan zir le tampi kan thei ding, tampi kan thiam ding asi. Bible kan siarih kan duhmi lawng kha voi tampi kan siar rero ttheu. Cumi cekci in Bible kha a dik kan ti. Kan duh lemlo mi pawl cu kan lanmen asi ahcun Bible ih nun in simmi pawl kha kan hmu ban nawn lo ding asi. Tthimnak ah “Jesuh Khrih a zumtu hmuahhmuah cu thutthennak tuar lo in kumkhua nunnuamnak an ngah ding (John 3:18)” timi thawn an lungawi tuk dingih Bible sungih a dang nun in simmi pawl kha an lung nawn. Zumtu kan si ahcun kan hrial ttulmi pawl le kan thlun ttulmi pawl Christian nundan ziaza tampi a um lai asi ti kha an ruat paih nawn lo. Tthimnak ah Rom 2:6 “ziangahtile Pathian in zozo khal an tuahmi vekin tuahman a pe ding” tiah in zirh. Thuphuan 20:12 “Mithi cia pawl cu a tum a sen in bawi tokham hmai ah an ding ka hmu. Mithi pawl cu a cuih cabu sungih an rak khum ciami an hnattuan vekin thutthen an si ttheh” tiah asi. Mt 25:31-46 ah “Zaangfahnak hnattuan ttha a ttuantu pawl cu kumkhua nunnuamnak ah le zaangfahnak hnattuan ttuanlotu pawl cu kumkhua meikangram ah an tla ding thu” in sim asi. Curuangah kan zumnak vekin hnattuan ttha kan ttuan maw ti kha a thupi nasa asi.

Mk 4:24 cu thlacamtu pawl hrangah a dik ngaingai asi. Pathian hnenah kan va panih thlacam kan cak deuhdeuh ahcun thlarau thacahnak kan ngah deuhdeuh ih thlarau ral cu ngam zetin le cak zetin kan do thei. Amah hnenah thluasuah dilin thlacamnak kan nei sinsin asi ahcun thluasuah tam sinsin kan ngah ding asi. Malte lawng thla kan cam ahcun thluasuah tla malte lawng kan co ding asi. Curuangah St Catherine of Siena in “Bawipa hnenah thla ka cam deuhdeuh ih thluasuah ka co deuhdeuh; cun thluasuah ka co deuhdeuh ruangah Pathian hnenah ka va pan duh deuhdeuh asi” tiah in zirh asi.

Mk 4:25 “A neimi cu pek bet asi dingih a neilo mi cu a neimi hman kha lak sak asi ding.” U le nau pawl himi Bible catlangte cu theithiam a har asi. A ngah hrihlotu pawl va zem ih coter sehla saduhthah a um ngaingai. A neitu pawl cu pek bet ansi ding. A neitu pawl cu an nei sinsin dingah Bawipa in a duh. A farahtu pawl cu farah sinsin ding cu ziangtin si thlang?

Himi Bible nih in sim duhmi cu zuamnak kan nei ttul zia in sim asi. Tthimnak ah Mirang ttong kan zirih kan ttong zuam zet. Practice tuahnak ah kan ttong zawk rero. Kan thei banlo mi pawl kha a theitu pawl kan va sut. Mirang ca ih nganmi ca kan siarih kan thei lo mi ttongfang pawl kha Dictionary kan zoh, kan hminsin, kan zuam hrat rero ruangah neta ahcun Mirang ttong hmannak ah kan tthangso. Kan thiammi le kan theimi kha kan zuamnak thawn kan bet tikah kan thiamnak cu a karh asi. Computer kan va zir ih basic cu kan ti thei. Kan ti theimi te kha nitin in practice kan tuah tikah computer a thiammi ah kan cang tata. Thil thiamnak kan neimi cu pek sinsin asi kha. Kan thiammi kha kan hmanglo, practice kan tuahlo ahcun kan thiam cia mi le kan thei ciami pawl hman kha a hlo cih ding asilo maw? Malte kan neimi le kan thiammi te hman kha laksak asi ding tiah Bawi Jesuh nih in zirh cu a diktuk lo maw?

U le nau pawl, Mk 2:24-25 thu kha kan ruat sal asi ahcun zuamnak nei kan ttul zia ti thu kha in khihhmuh asi. Midang kan va bawm thei sinsin ahcun Pathian nih thluasuah in toih sinsin ding. An sualnak pawl kan ngaidam deuhdeuh ahcun Pathian in kan sualnak pawl tampi siar cawklo in in thlah sak ding asi. Pathian nih in pekmi talent timi thilthiamnak kha kan hmang tam deuhdeuh ahcun kan thiamnak kha a karhzai deuh dingih kan thiam sunmite kha kan hmanlo ahcun kan thiamsunmite hmanah a hlo cih ding asi. 

Curuangah u le nau pawl zuam cio uhsi. Zaangzel hlah uhsi. Satan pawl hmanin mizaangzel pawl an hai lo asi. A cuangce in mino deuh pawl zuamnak tampi nei uhsi. Cutin cu kan thiamnak le kan theinak hi a kau deuhdeuh ding asi. Midang ram ah hna kan va ttuan hmanah anmaih dinhmun ah kan nung thei ding, hna kan ttuan thei ding asi.

Pa Pathian in zuam theinak thazaang thluasuah + in run toih hram seh. Amen.