Pathian Duhzawng Fimnak

          Thu thang tha hlawn aw thei ding ih dam nak le can tha in petu kan Pathian a hmin thang that siko seh, Amen.Tui sun ih Bible kan siar mi 1Siang 10:1-10 sungah “Siangpahrangnu Sheba cu siangpahrang Solomon hnen a ra tlawng” ti thu kan siar. An ton awk nak thu hla ruat phah in “Pathian duh zawng fim nak “timi thu lu thawn thlarau thazang la cio tlang uh si.

          Fim nak cu a phunphun a um. Zir nak tampi, sang zet nei ih mifim an um vek in zir san nak nei lo nan khawkhan lairel thiam zetzet lai nu lai pa tampi an umve. Mitampi hrangih that nak le thanso nak hrangih mifim tampi an um nak in, mi siat suah thei nak hrimnam tuah nak le sual nak phunzakip lamih a tawk hrawk, depde mifim khal an um ve. Mitampi ih tha hnem zet ih kan hman mi fim nak a um ih mi tampi ih that lo nak lam ih hman mi fim nak khal a um. Cutiih fim nak a phunphun lakah “Pathian duh zawng fim nak” cu ziangvek si pei?

Pakhat nak: Solomon in Pathian duh zawng fimnak a co. Ziangruangah tile pathian a rinsan. Amai kumno zia a thei awaw ih, a hmuh ton mi a mal zia le siangpahrang dingih a tlinlo zia a thei tikah Pathian a rinsan. Pathian ih miphun thu pi zet ah a re. Amai hrang lawng ruat lo in mipi pawl zawn a ruat, a seherh. Pathian in fimnak cu a pek ih za pi hrang le Biak inn pi sak nak ah Solomon cu man hla zet in a hmang. A hmin than nak cu ramkip a thleng. Solomon vek in in kan ton taih nak le kan famkil lo nak thei aw in Bawipa rinsan uhsi. Thlacam uhsi. Kan mah hranglawng siloin Pathain miphun hrangle zapi hrangah thlacam uhsi. Fimnak cu Bawipa in in pe ding asi. Kan thilti thei nak khal zapi hrang le Biak nak lam ah siangzet in pe uhsi, hmang uhsi. Bawipa ih pek in duh zet mi fimnak a karh sin ding. Cawisaan sunlawi nak a mah in in pe sin vivo ding.

          Pahnih nak: Siangpahrang bawinu Sheba in Pathian duh zawng fim nak a co. Solomon ih fim nak thu cu Sheba siangpahrang nu in a thei tikah thei sin, hmuh fiangsin a duh. Khual lam hla pi feh in Solomon a tong. Laksawng tampi a keng. Thu tampi Solomon ih fim zia a lang ter thluh. Siangpahrang nu cu a lung a kim tuk, a mang khal a bang a lung mittheh rori tiang. A hmuh mi lak ih phun dang te pakhat cu “Biak inn ih thawi nak an pek mi pawl” a hmuh mi si. Solomon a tong, Solomon ih fim nak khal a tong ih, Pathian biak daan khal a tong ngah. A rak ken mi thil man khung laksawng tla cu biak inn hrang le thang that nak hrang awn mawi le tingtang ah an hmang. Solomon hnen a pek mi lak sawng cu Biakinn hrang ah hman asi ih, Solomon hnen khal in laksawng tampi a ngah sal. Lei tlun thil mak saksak hmuh tinten Bawipa ih kutneh hmuh cih uhsi. Kan laksawng a tum sin ding.

          Pathum nak: Zum tu Khritfa pawl Pathian duh zawng fim nak kan co ve. 1Cor 1:24 ah “Khrist cu Pathian cah nak le fim nak asi” in ti. Jesuh Khrit hnen pan tu, ka Bawipa ka Pathian ti ih zum tu kan zaten Pathian ih fimnak kan co ngah. Lei tlun pek mi fim nak a siloih, suah keh ken mi fim nak khal asilo. Thlarau thinghlim ih bom nak in kan co mi asi. Minung kan sinak ih thu ruah thiam nak fim nak cu kan kum a upat vivo tikah a thangso vivo ve. Ca zir nak le tuan thiam nak lam khal ah kum a tam vek in fim thiam nak a sang ve. Curuangah lo theih lo ih Khritfa pawl kan tuan tul mi cu Pathain fim nak kan neih mi Jesuh Khrih hi ni khat hnu ni khat, kum khat hnu kum khat thanglian ter vivo hi asi. Khrih kan sungih thangsin rero thei ding in ziangkan tuah ding? Siangpahrang nu Sheba hnen in kan zir ding.

          Jesuh Khrit thu cu midang hnen in kan thei hmai sa cio. Midang ih simsin men hi tawk timen lo in kan mah roriih hmuh le tonngah kan tum a tul hrimhrim. Cutikah Khualtlawn a tul, hmai lam ih feh a tul. Jesuh cu mipi khal in an thlun, dung thlun tu pawl cun inn lo tan in an thlun. Jesuh ih a hnak fei pi ih sun tu cu Jesuh thin lung sung tiang a thlun. Jesuh ih in duh dawt nak a thinlung kekkuai sung ah Pathian fim nak man khung bik aum. Cutiang thleng ngah tu cun Sheba siangpahrng nu ih tongmi kan tongthei ve, “Ka mit ih ka hmuh roricun na thu hla ka rak theih mi cu a hrek hman asilo” ti asi. Tongfang ih sim thiam lo, ca in ngan theih lo fim nak kan co ngah. Jesuh Khrih thu hi a tha thei tawp, sunglawi thei tawp in kan au pi rero nain a si nak tak tak ih a hrek hman phuang lang thei tu kan um lo. Cutluk ih sung lawi man nei fim nak cu Jesuh ih a kekkuai mi thinlung sung ih colh hah dam nak co ngah tu pawl cun nun sung le kum khaw daih neih lan asi. Siangpahrang Solomon le siangpahrangnu Sheba hnak in kan co mi fim nak hi a tum sawn, a sang sawn. Ziangruangah? Pathian fimnak Jesuh kan neih ruangah asi. Khrih nun co ngah ding in zumnak le biak nak lamah taimak suah in khual tlawng hrih ko uhsi. Lak sawng tampi phur uhsi. Jesuh Khrit ih thawm huham le sunlawi nak hi mi ih sim mi khal cingkengin kanmah rori in tong in co thlang uhsi. Khrih ih kan hrang thawi nak a pek nak tla sunglawi zet in cingkeng uhsi. Kan nunm, kan caan, kan tha zang le kan neih mi sumsaw thil ri tla a mah thangthat nak le Biak nak hrangah  hmang uhsi. Pathian ih fimnak Jesuh Khrih ah hmufiangin a maksak zia thu le hla in au pi rero cio uhsi. Kan tuan thei mi le pek thei mi hnak ih tam sawn in lak sawng inleh rulh sal ding asi. Pathian fimnak Khrih in kan zaten thluasuah in pe hram seh. Amen.