Zumnak Thawn Bawipa Rinsannak

Rev. Fr. Joseph Ro Nei Thang ih Thuthangtha sim mi (February 13, 2020)

Siarding:1Siangpahrang 11:4-13; Marku 7:24-30.

          Bawi Khrih ah duhdawt zetmi u le nau pawl, kan Bawipa Jesuh Khrih hmin in cibai ka run lo buk hai. Nan zatein nan rak dam cio hai maw? Bawipa in hnangamnak, duhdawtnak le zaangfahnak thluasuah lo pe phram seh tiah thla za ka run ko cam sak hai. Tuihni cu 2020, February ni 13, tlawngkai nilini asi. Kan siar dingmi Bible pawl cu 1Siangpahrang 11:4-13 tiang le Marku 7:24-30 tiang pawl tla ansi pei.  Tuihni ih ka lo hlawm duhmi cu zumnak thawn Bawipa rinsannak tiah asi pei.

          Tuihni kan siarmi Bible a voikhatnak ah Pathian in siangpahrang Solomon parih a thinhengnak thu pawl kan hmu thei. Kan thei cia vekin siangpahrang Solomon cu siangpahrang David ih fapa asi. A kum no te lai ihsin siangpahrang ah cawisannak a ngahtu asi. Harsatnak teplonin siangpahrang a ttuan ruangah harsatnak ih man hi a tep ngah dahlo asi. Pathian in a duhdawt tuk ruangah a thlacamnak tla a sang asi. Pathian hnenah fimnak a dilih Pathian in a thlacamnak cu lungawi tein a sangih a dillomi nunsaunak, hminthannak le lennak thluasuah pawl tla a pek bet cih asi. A duhmi pawl a ngah tikah leitlun tisanomnak in a nehih Pathian thawn a hla deuhdeuh. Pathian thawn a hla deuh ruangah Pathian ih duhlo zetmi pawl a tuah ngah thlang asi. Nupi 1000 lai a nei ih acuih nupi pawlin siangpahrang ah a cawisangtu Pathian kha tlansan in leitlun khawvel lamah an fehpi asi. Tuihni kan siarmi Bible a voikhatnak sungah siangpahrang Solomon in fihnungza raithawinak pawl cu milem pawl hmai ah a pek asi tiah kan hmu thei. Cuti cun Pathian cu a thinheng ter asi. Pathian a rinsantu silo in Pathian a tansantu asi ruangah Pathian in tla a uknak ram cu tthen hnih ah a canter asi. Pathian ih thluasuah kilkhawi thiamlo ruangah Solomon in rapthlakza thangsiatnak a tong asi.

          Tuihni kan siarmi Thuthang Ttha sungah cun Gentile nu pakhat in Bawipa Jesuh a zumnak, a rinsannak le a bennak thu pawl kan hmu thei asi. Khawsia ih tuahsiatmi a fanu kha damter dingah beiseinak tumpi a nei ih Bawi Jesuh hnenah a va panih bawmnak a dilnak thu pawl asi. Bawi Jesuh hmanmi ttongfang pawl tla a rak na nawn nain nunau nu cun Bawipa hnenah rinsannak tumpi thawn a va pan thotho asi. Bawi Jesuh in “fale pawlih ei ding rawl cu uico pawl pek hi a diklo asi”tiah a va ti nain nunaunu in “Asiko Bawipa! Sikhalsehla fale pawlih hlahtakmi rawl ttilfuan pawl cu cabuai hnuai ah an ei ve ttheu ko asisi” tiah a let tiin Markus 7:27-28 ah kan hmu thei asi. Kha tluk in Bawipa ah zumnak le rinsannak a nei ruangah a beisei zetmi cu Bawipa in a pek asi.

Christian kan si, Pathian ih fale pawl kan rak si. Kan zumnak le rinsannak cu kan nunnak ah thuk zetin kan nei a ttul ve asi. Bawipa ah rinsannak kan nei thei nak dingah 1). Mah le mah rinsan aw lo in Bawipa kha rinsan sawn ding. Bawipa in kan harsatnak le kan vansanglamnak pawl in thei sak asi. Ziangzongza a thei ih thil tla a ti thei asi. Rom cakuat 11:33 “Pathian ih zaangfahnak cu a va tum so! A fimnak le a theinak hi an va thuk lawmmam so! A thurelcatmi pawl hi zo in so a hrilhfiah thei ding? A fehnak lamzin pawl hi zo in so a zong thei ding?” tiah in sim asi. 

2). Bawipa kha thei ringring ding. Thufim 3:6 “Na tuahmi kipah Bawipa cu thei ringring awla Amah in lamzin dik cu a lo hmuh ding asi” Pathian ih ttongkam in tangdornak thawn thlacam phah in Pathian pan dingah in zirh asi. Tangdornak thawn thla kan cam tikah Bawipa ih lamzin le khuakhannak pawl cu kanmaih lamzin le khuakhannak, ruahnak pawl hnakin a sang sawn asi tiah kan hmu thei asi. David siangpahrang bawipa vekin “Ka aihramnak cu zing, sun le zan ah Bawipa hnenah a thlengih ka kawhnak aw cu a thei ding” tiah Ps 55:17 tiah harsatnak caan ah Pathian kha thlacamnak thawn vun mang dingah thu in zirh asi. 

3). Sualnak ihsin tlan hlo ding. Thufim 3:7 “Ka fim paam tiah ruah aw hlah; Bawipa ttihzah awla sualnak pawl cu tansan aw” tiah Pathian ttongkam kan hmu thei. A tthatlo mi rualpi le kiangkap ruangah kannih tla tthatlonak sungah kan tla cih thei asi. Curuangah sualnak le tthatlonak pawl cu hrial ding hrimhrim kan ttul asi. 2Timothy 2:22 ah tla “No lai ih taksa hiarnak pawl cu tlansan awla thinlung thiangin Bawipa ih bawmnak a diltu pawl thawn hmunkhat ah dingnak le daihnak ngah dingah napi in zuam aw” tiah in forh asi. Bawipa ih duhlomi sualnak pawl kan tansan theinak dingah Bawipa kha ben in thlacamnak thawn pan uhsi.

4). Mahih nunnak ah Pathian cu uusaa pek ding asi. Thufim 3:9-10 ah “Bawipa cu na sumsaw le na thlairah hmaisabik in thangtthat aw. Cubangtukin na tuah asile na rawl inn cu rawlin a khat dingih na cabik beel tla cu cibit tharin a liam thluahthlo ding asi” tiah kan hmu thei. Bawipa Jesuh in cun Mt 6:33 ah “Pathain uknak le a felnak cu hmaisa hawl uhla thil dang hmuahhmuah pawl cu a lo pe beet ding asi” tiah in zirh asi. Bawipa hrangah cu ziangtin kimah uusaa pe ringring ding kan si asi. 

5. Mah le mah kha Pathian ih ttongkam thawn check fel ringring ding. Kanmah le kanmah kan thei aw thiam ttheulo ruangah Pathian ih ttongkam thawn check fel sal kan ttul asi. Jeremiah 17:9 ah “Milai ih thinlung cu zo in so a thei thiam ding? Ziangdang hnakin mibum hmangmi asi. Damter dingah a har zet; a natnak cu a besia tuk” tiah in sim. Zo hman a tthatu kan um lo ruangah Pathian in ttongkam lawng kha rinsan tlak asi, rinsan ding kan si asi. “Maw Ka fapa, Bawipa ih nunsimnak cu ziangsiarlo in va um hlah aw; a lo kawk tikah na thin na hlah” tiah thufim 3:11 ah in zirh fiang asi. Bawipa ah kan pan ttul ringring asi.

6). Thlarau thianghlim ih simmi kha ngai ding asi, ziangahtile Thlrau Thianghlim cu ziangzongza in zirhtu asi tiah John 14:26 ah in sim fiang asi.

7). Pathian ih duhdawtnak sungah cawl ding asi. Thufim 3:12 “ziangahtile pa in a duhawt zetmi a fa le pawl nun a sim bangin Bawipa in tla a duhdawt zetmi pawl kha nun a sim ve asi” tiah kan hmu thei. Cuhlei ah Bawipa cu san cem tiang kan hnenah a um ding asi tiah Mt 28:20 ah fiang zetin Bawaipa nih thu in kam ta dah asi.

U le nau pawl, Bawipa Cu rinsan ringring uhsi. Jeremiah 17:7 ah Pathian in “Keimah I rinsantu cu ka thlawsuah ding” tiah thu in kam asi. Ziangtlukinso thlawsuahnak a pe ding? “Tiva kiangih a khomi thingkung, a hram ah tidai a thlengmi thinkung bangtuk in a si dingih tthal caanih nisa khal a ttih lo ding; a hnah tla a hring ringring dingih rah tla a rah ringring ding” tiah Jeremiah 17:8 ah Pathian in amah a rinsantu pawl kha thlawsuah a co ding daan thu in kam asi.

A ngaitu nan zatein Bawipa rinsan thiamtu kan si ringring theinak dingah Bawipa in thluasuah in run toih hram seh. Amen.