“Christian pawl cu phu hlamtu silo in duhdawtnak neitu si ding ah asi”

Homily for the 7th Sunday of the year (Year A) 23/2/2020

Bawi Khrih ah duhdawt zetmi nu le pa, u le nau pawl, “kan Bawipa Jesuh Khrih ih zaangfah veel, Pa Pathian ih duhdawtnak le Thlarau Thianghlim ih pawlkomnak pawl cu nanmah thawn um hram seh” tiah cibai ka run lo buk hai. Tuihni cu kumkhat sungih Zarhpi voi 7 nak asi. Nan zatein Biakinn lamah va panin khawm theinak dingah Pathian in cahnak le damnak lo pe hram seh tiah tla thla ka lo cam sak hai. Tuihni ih kan siar dingmi Bible pawl cu Puithiam hnattuan 19:1-2, 17-18 tiang asiih a tlangpi thu ahcun “mah le mah duhdawt aw vekin maih innhnen pawl tla va duhdawt dingin Bawipa ih thupek” tiah asi. Bible a voihnihnak ahcun 1Korin 3:16-23 tiang asi pei ih a tlangpi thu ahcun “Kannih cu Khrih ih ta kan siih Khrih cu Pathian ih ta asi tinak” asi. Cule Thuthang Ttha ahcun Mt 5:38-48 tiang tla ansi pei ih a tlangpi thu ahcun “Pathian cu a famkim vekin kannih tla famkim ve dingah zuam ding thu” timi pawl tla ansi pei. Tuihni kan ruah khawm dingmi cu “Christian pawl cu phu hlamtu silo in duhdawtnak neitu si ding ah asi” tinak asi pei.

Pathian in Israel miphun pawl hnenah Pa Pathian cu thinlung zate thawn, fimnak zate thawn, cahnak thazaang zate thawn duhdawt dingah le mahih innhnen pawl kha mah le mah duhdawt aw vekin duhdawt dingah thukham a pek dah asi. Bawi Jesuh in cumi thukham cu a siatbal lo ih a fekter sinsin sawn asi. Tuihni kan siarmi Cathianghlim sungah Duhdawtnak thukham pawl ttha tein kan thlun thei ahcun a famkimmi ah kan cang dingih Jesuh Khrih cu Pathian ih ta asi vekin kannih tla Khrih ih ta kan si ding asi. Pa Pathian cu mittha, misia parah bangrep in ruah a surtertu asi. Pathian in hi leitlun ah kan sualnak vekin cawhkuan in pek dah lo asi. Ps 130:3 ah “Maw Bawipa, kan sualnak pawl cu na ciing ringring ahcun zo in so a tuar thei ding? Asinan Nang cun kan sualnak in ngaidam na si” tiah kan hmu thei.

Tuihni kan siarmi Thuthang Ttha sungah Bawi Jesuh in duhdawtnak le famkimnak nei dingin in zirh lai ah huat awknak le phulaknak pawl hrial dingah tla in zirh bet asi. Tuihni kan siarmi Mt 5:38 ah Bawi Jesuh in “mi ai ah mit, haa ai ah haa” ti an sim ttheumi nan thei. Kei cun hitin ka lo sim: a lo ti siattu parah phu va hlam hlah uh” tiah in zirh asi. Khua hlan lai ah Israel miphun pawl neirawn ramcar ah an um lai ah phulaknak cu a thiangmi hnattuan tiah an ruatih mahih sungkhat kha midang in an tuahmawh asi ahcun phu an la sal ttheu asi. Mipum siarnak 35:18 ah “mi pakhatkhat in thingtan lak tahratin mi a thah asi ahcun laithat asi ruangah amah cu thah asi ve pei” tiah kan hmu. Mi a that ruangah thah a tuarmi cu sualnak ah an rello asi. Daanpeksalnak 19:21 “Zohman zaangfah hlah uh; nunnak ai ah nunnak, haa ai ah haa, kut ai kut, kee ai ah kee asi pei” tiah kan hmu bet. Himi cu thildiklo zawngin tettii khantu pawl hrangah asi. Himi cu Hamurabi ih zirhmi kha an rak lakih Israel pawl hruainak ah an hmanmi zirhnak ah a cang tata asi. Curuangah Jesuh in “mi ai ah mit, haa ai ah haa, ti an sim ttheumi nan thei” ti mi kha kan hmu thei. A ngaingai ahcun Bawi Jesuh in cun phuhlam a duhlo ih “sikhalsehla kei cun hitin ka lo sim: a lo ti siattu parah phu hlam hlah uh. Mi pakhatkhat in na vorh lam biang a lo beng asile na kehlam biang khal tun lawlaw aw” tiah in zirh asi.  Cule a tirah Pathian in tla milai pakhat le pakhat duhdawt aw dingin a zirh asi ti kha tuihni kan siarmi puithiam hnattuan 19:17-18 ah “Na unau huatmi nei hlah; amah ruangah misual na si lo nak dingah a mawh na ti asile fiangtein sim sawn aw. Zo par hmanah phu lak hlah. Mi na huatnak kha na thinlung ah taap ter hlah; nangmah na duhdawt aw vekin midang tla duhdaw ve aw. Keimah cu Bawipa ka si” tiah fiangzetin kan hmu thei. 

Christian pawl cu phuhlamtu silo in ngaithiamtu le duhdawtnak neitu pawl kan si dingah Pathian nih in ko asi. Tuihni kan siarmi ah tla Pathian rori in Moses hnenah “Zo hnen hmanah phu lak hlah” tiah Puithiam hnattuan 19:18 ah in zirh. Phuhlamnak cu milai ih ttuanvo asilo, Pathian in ttuanvo asi sawn.  Daanpeksalnak 32:35 ah “Bawipa in phu a la dingih a hrem hai ding; an riil ih an tlak caan tikcu a thleng ding” tiah asi. Thufim 20:22 ah “Tthatlonak cu tthatlonak in lehrul hlah, Bawipa rinsan awla a lo run ding” tiah Bawipa been dingah Cathianghlim thukamnak hlun in in run zirh asi. Thukamnak thar ah phuhlam lo dingah thuzirhmi pawl cu tuihni kan siarmi Thuthang ttha sungah fiangtein kan hmu thei. Cuhlei ah Rom 12:17+19 ah tla “Ka rual le uh, ziangtik khalah phulak tum hlah uh, cuhnakin mi pakhatkhat in nan parah tthatlonak an tuah tikah an parah tthaklonak thawn lehrul hlah uh” tiah in Paul nih in zirh asi. Peter in tla Khristian pawl ca a kuat tikah 1Peter 3:9 ah “tthatlonak cu tthatlonak in lehrul hlah uh, siatcamnak khal siatcamnak in lehrul hlah uh; cuhnakin thluasuahnak thawn lehrul sawn uh” tiah in zirh asi. Hebru 10:30 ah Bawipa in “Keimah in phu ka la ding; Keimah in ka lehrul ding” ati tlunah “Ka minung pawl cu thu ka tthen ding” tiah a bet hrih asi. Kannih in pakhat pakhat thutthen rero a ttullo, phulak a ttullo, lehrul a ttullo asi. 

Kan ral pawl kha hua dingah silo in duhdawt dingah in Jesuh Khrih in tuihni kan siarmi Mt 5:43-44 ah in zirh asi. Bawi Jesuh in ral pawl duhdawt ding le ngaithiam ding in zirh lawng silo in Amah rori in tla amah a thahtu a ral pawl hrangah a thi hlante ah thla a cam sak asi. Steven cu amah lungto thawn a denthattu pawl hrangah thla a cam sak asi. Paul in amah a hremtu pawl kha thluasuahnak pekin a lehruk kir asi tiah 1Korin 4:12 ah in zirh. Cuhlei ah kan ral pawl tuamhlawm dingah tla Rom 12:20-21 “Na ral pawl a rilrawng asile ei dingah rawl pe aw; a tihal asile in dingah tidai pe aw” tiah in zirh asi. St Maria Goretti in amah sual pi tumtu le a thattu Alessandro Serenelli cu a ngaithiam ih thla a cam sak ruangah a piang a tharih tipilnak a ngah hnu ah thawnginn sungah zohtthim tlakmi tlangval pakhat ah a cang asi tiah St Maria Goretti ih thuanthu ah kan hmu thei asi. 1981, May 13 ah St John Paul cu Rome khua ih St Peter tualpi ah Ali Agca in meithal thawn a kah that nain Bawinu Mary ih humhimnak thawngin a thi lo ih a dam sal tikah amah a kah thattu Ali Agca kha thawnginn sungah a va veh salih a sualnak pawl a ngaidam asi. 

Cuti vekin sual ngaidamtu le phu hlamlotu kan si ahcun duhdawtnak a neitu kan si dingih mifamkim ah kan cang ding asi. Milai mit in kan zoh ahcun phu-hlamlo timi cu aatthlaknak asinain Pathian ih duhdaan asi sawn. 

Kan nunnak kan ruangpumpi cu Pathian ih biakinn thianghlim asi ti kha thei ringring uhsi. Sualnak hmuahhmuah hrial thei dingah zuam ding kan si asi tiah tuihni kan siarmi Paul ih Korin cakuatnak ah kan hmu thei. Kan ruangpumpi kha sualnak thawn kan khahter asile Pathian ih thianghlim biakinn a baltertu ah kan cang dingih Pathian nih in siatsuah ding asi. Milai ih siatsuah hnakin Pathian ih siatsuah hi ziangtlukin so a na ding ti kha ruatin thianghlim tein um thei dingah zuam ringring uhsi. 

Pathian in zuam theinak ding thazaang in run pe hram seh, Amen.