“Jesuh Khrih ih Kohhran asimi Catholic Kohhran"

Homily for Thursday (20/2/2020).

Bawi Khrih ah dudawt zetmi nu le pa, u le nau pawl, kan Bawipa Jesuh Khrih ih zaangfah lainatnak, Pa Pathian ih duhdawtnak le Thlarau Thianghlim ih pawlkomnak pawl cu nanmah thawn um hram seh tiah cibai ka run lo buk hai. Tuihni cu 2020, February thla ni 20, Tlawngkai nilini asi. Chin miphun suahni asi ruangah nan zatein “Happy Chin National Day” tiah tla cibai ka run lo buk bet hai. Tuihni kan siar dingmi Cathianghlim pawl cu James cakuat 2:1-9 tiang le Marku 8:27-33 tiang pawl tla ansi pei. Kan ruah khawm dingmi cu “Jesuh Khrih ih Kohhran asimi Catholic Kohhran” tiah asi pei.

Tuihni kan siarmi Thurthang Ttha sungah “Jesuh le a dungthluntu pawl cu Sizaria Filipi khua kiang tlawng dingah an feh. Lamzin ah a Dungthluntu pawl cu Jesuh in “Mi in zo in ti so, in sim hnik uh” tiah a sut. Annih in “Mihrekkhat in baptism petu Johan asi anlo ti. Mihrek khat in Elijah asi an lo ti. Midang in prophet pakhatkhat asi an lo ti” tiah an sawn. Jesuh in “Nannih in zo in ti so?” tiah a sut. Peter in “Nang cu Messiah na si” tiah a let. Cutikah Jesuh in “Cu thu cu zohman nan si lo pei” tiah a tiam tiah Marku 8:27-30 kan hmu thei. Matthew ih nganmi Thuthang Ttha ahcun a famkim deuh in a nganmi kha Mt 16:13-19 ah kan hmu thei. Matthew ih thuthang ttha sung vekin kan bet hrih ahcun Jesuh ih thusutmi kha Peter in “Nang cu a nungmi Pathian ih Fapa Messiah na si” tiah ati. Cutikah Jesuh in “Johan ih fapa Simon, nang cu mithluasuah nasi. Ziangahtile hi thu cu minung hnen ihsin na ngahmi asilo. Vancung ih a ummi ka Pa in na hnenah a phuanmi asi. Curuangah ka lo sim; Nang cu Peter na si. Hi lungpi parah ka Kohhran ka din dingih thihnak hmanin a neh thei dah lo ding. Vancung uknak tawhfung ka lo pe ding; leitlun ih na khammi cu vancungah kham asi ve dingih leitlun ih na onmi cu vancung ah khal on asi ve ding” tiah kan hmu thei. 

Bawi Khrih ah duhdawtmi u le nau pawl, Kohhran cu ziangso asi? Catholic Kohhran ih zumnak thuzirnak ca-uk sungah “Kohhran timi cu Pathian ih miphun thar asiih hmu theimi lu pakhat thuai ah a bangrepmi zumnak le sacrament pawl hlawm tlangmi pawl ansi” tiah in zirh asi. 

Jesuh Khrih in a Kohhan cu Simon Peter parah a din asi. Cumi cu Antioch khua ah Christian tiah kawh ansi. AD kum 100 sehvel ahcun Antioch khua mi Ignatius in Jesuh Khrih ih Kohhran cu Catholic Kohhran si siah tiah a ti ih cuihni ihsin thawkin zumtu Christian pawl cu Catholic tiah kawh ansi. Catholic timi cu mizapi hrangah tiah a sullam a um asi. Jesuh Khrih ih rundamnak cu mizapi hrangah asi vekin a Kohhran khalle mi zapi hrangah asi a ttul ve asi. 

Jesuh Khrih ih Kohhran cu Pakhat, a thianghlimmi, Catholic le Tirhthlah pawl thawn pehzomnak a neimi Kohhran asi tiah Dungthluntu pawlih zumnak hrampi ah kan hmu thei. Pakhat kan ti tik ah a bangrep in kan co tlangmi zumnak le Sacrament pawl siseh, Kohhran ukdaan upadee pawl cu a bangrep in uktu lu pakhat tangah kan hlawm tlangnak pawl siseh a ti duhmi asi. Adam a ihthat lai fangin Pathian in a hnakruh pakhat a lak sakih a nupi Eve cu a serhsiam vekin Jesuh Khrih a ihthat lai/ a thi lai ah a nupi asimi a Kohhran cu serhsiam asi ve asi. Adam ih hnakruh cu Pathian in tampi a lak sak lo, pakhat lawng a lawng sak asi. Curuangah Jesuh Khrih ih hnak ihsin tla Kohhran pakhat lawng Pathian in a serhsiam asi. Kohhran cu a thianghlimmi asi kan ti tikah a serhsiamtu hi a thianghlim ih a cuih a Kohhran khalin tthelh theilo mi zumnak pawl a zirh asi, cule mithanghlim tla relcawk lo in sankhat hnu sankhat a suakter asi. Thlirhthlah pawl thawn pehzomnak a neimi Catholic Kohhran cu Jesuh Khrih ih Kohhran asi. Tirhthlah pawlih zirhmi le zumnak pawl cu tuihni tiangah sankhat hnu san khat Catholic Kohhran in a kilkhawi ringring lai ih zirh sin ringring asi lai asi. 

Jesuh Khrih in a Kohhran a din lai ah ziang vek uknak thawn so a uk dingah a duh? Tuihni kan siarmi Thuthang Ttha sungah Jesuh Khrih in “mi Fapa cu mi nih zo in ti so” tiah a sut timi cu Democracy daan asi. Democracy daan cu mizapi in anmah hruaitu kha hril a ttul asi. Vancung ram ih hruaitu Jesuh kha mipi in “zo nih in hruai seh” tiah an lungkimnak kha Jesuh Khrih in a sut tikah Dunthluntu pawlin “Bawipa, Nang cu Baptism petu Johan, mihrekkhat in Elijah, mihrekhat nih cun prophet pakhatkhat asi” an lo ti tiah an let. Mipi ih lungkim dan cu a phunphun asi. Curuang ah vancung ram asi mi Jesuh Khrih ih dinmi Kohhran cu Democracy daan in hruai a ngahlo asi ti kha a fiang ruangah Jesuh Khrih in “Nannih in teh zo in ti so, in sim hnik uh” tiah a sut asi. Mipi sung ihsin Bawipa Jesuh in a lungkim zawngmi a phyi a ngahlo ruangah mimal tak asimi a Tirhthlah pawl a sutnak asi. Uknak lam ihsin kan zoh asile cu hlutdaw asilole, a wonkyi pawl kha Jesuh Khrih in a sut. Mirang ttong in cun “Aristocracy” tiah kawh asi. Mipi ih aiawhtu mimal pawl tiah a sullam a um. Zohman in an sawn lo caan ah Simon Peter in “Bawipa, Nang cu a nungmi Pathian ih Fapa, Messiah na si” tiah a sawn. Bawi Jesuh cu a lung a awi ngaingai. Jesuh in “Johan ih fapa Simon, nang cu mithluasuah nasi. Ziangahtile hi thu cu minung hnen ihsin na ngahmi asilo. Vancung ih a ummi ka Pa in na hnenah a phuanmi asi” tiah a sawn sal. Pathian in Simon Peter hnenah a ram hruaitu kha a phuan a si, a sim asi. Pathian ih phuanmi cu mirang ttong in “Theocracy” tiah kawh asi. Curuangah Pathian ram ih uknak/hruainak daan cu Democracy daan in asilo, Aristocracy tla a si lo ih Theocracy thawn lawng a ngah asi tiah Jesuh Khrih nih in zirh fiang. Peter hnenah Pathian in a phuan daan vekin a Kohhran asimi vancung ram cu hruai ding asi. 

Kawlram a um ahcun Kawlram sungih ummi pawl a um ttul, vancungram a um ahcun vancung ram sungih ummi pawl a um ttul; Kohhran a um ahcun Kohhran sungih ummi a member pawl an um ttul asi. Tuihni kan siarmi Gospel sungah “Mi fapa cu nasazetin a tuar dingih upa pawl, puithiam pawl le daan thiam pawlin an hnong ding; an that ding asinain nithum hnu ah a tho sal ding” tiah Bawi Jesuh in a Dungthluntu pawl a cahnak thu kan hmu. Kohhran member kan si ahcun hremnak le hnonnak pawl kha nasa zetin kan ton a ttul asi. Harsatnak, hremnak le hnonnak pawl kan tuar duhlo, kan hrial duh asi ahcun Jesuh Khrih thluntu ah a tlakmi kan si lo tinak asi; Christian kan si theilo; vancungram ih ummi ah kan cang theilo, vancung member kan cang theilo asi. 2Timothy 2:11-12 “Amah thawn kan thi khat ahcun amah thawn kan nung tlang ding. Harsatnak kan tuar thei ahcun amah thawn kan uk tlang ve ding. Amah kan hnong asile anih khalin in hnong ve ding” tiah Jesuh Khrih thawn tuar khat ding, Jesuh Khrih thawn thi khat ding a thupi zia in zirh asi. Peter in cun Christian pawl ca a kuat tikah 1Peter 2:21 “Cubangtuk harsatnak tuar dingah Pathian ih kawhmi nan si. Ziangahtile amah Khrih rori in nan hrangah harsatnak a tuarih nannih cu a keneh thlunin zohtthim dingah a lo tanta mi asi” tiah in forh asi. 

Khrih ah duhdawtmi u le nau pawl, Catholic Kohhran member kan sinak hi uar uhsila Pathian thangtthat uhsi. Nitin harsatnak kan tonmi pawl tuar thei dingah zuam uhsi. Zuam theinak thazaang Pathian nih in run pe hram seh. Amen.