Riannak ih hmual

Feb 25, 2020 hrangih Thuthangttha, Thlarau rawl

Riannak ih hmual

Caantluang zarhsarihnak, tlawngkai nihnih ni (Feb 25, 2020)

Siarding: James 4:1-10; Ps 55:6-10, 22; Mk 9:30-37

           Bawipa cu mipi lak ih a hnattuan cu colhsan in hmundang ah a feh. Cuti ih an feh cu midang ih theih ding a duh lo. Ziang ruangah a si pei? Ruah ding a um. A dungthluntu pawl kha a dangte ih thuzirh a duh ruangah a si men ding. Culole Jew upa pawl ih thah an tum ruangah amah le amah a humhim awk duh ruangah khal a si thei (Mk 8:31; Mt. 17:22-23; Lk 9:43-45). An cangvaih dan le an umtudaan kan zoh vivo asi ahcun Jesuh in a dungthluntu pawl kha pirpak te ih thuzirh a duh ti in a rawng lang vivo.

           Hiti ih ''Jesuh ih duhdaan" hi zoh in "hruaitu" ih dinhmun hrang malte zoh ta uhsi, cuisin a zirhmi kan zoh bet ding.

Jesuh cun a dungthluntu pawl cu hmundang ah a hruai ih cui hmun ah amai harsat a tuar ding thu pawl a sim. Cutikah mipi cun Jesuh ih harsat a tuar ding thu an thei nawn lo. Himi zoh ahhin ''hruaitu ttha'' cun amai bulpak ih harsatnak kha mipi theiter lo-in a um ti kan hmu in kan zir thei.Hruaitu cun "a mipi ih thinlung a hmuh a ttul". Dungthluntu pawl cun Jesuh ih hmaiah zianghman thu el-awknak an nei lo, a thupte in thu an rel ih cucu "zo si tumbik ding" ti a si. Cumi laifang ah Jesuh cun an thurel cu a sut ih "hmuh dan thar - a tumbik cu mi riantu" a zirh. Hruatu le mipi karlak ah "pehtlaih awknak" hi a um ringring a ttul. Cui pehtlaihawknak cu aw le kam le ttongfang lawng a si lo, an dungih a ummi "tuarnak," "hmuhtonnak," pawl an tel. Cu pawl cu kan hmu le kan theih a si le kan pehtlaih awknak a fek sinsin.Hruaitu cu ''mipi riantu, mipi hrangah'' a nun a ttul. Amah le amah uang suang aw ih a um a si le a mipi in a thu an ngai lo ding, an tlan hlo san ding. Curuangah tangdornak thawn a mipi a rian a ttul (Mk 10:43-44)Hruaitu cun nauhak vek ih "lungput thianghlim" a neih a ttul. Dungthuntu pawl cu Bawipa ih leh le hnu ah zo si hruaitu a si ding, zo si a thupibik ding tiah an rel. Cutivek ih "tohkhamsang" an beisei lai ah Bawipa cun nauhak a ko ih an zohtthim dingah a hmuh. Hruaitu cu depde le hrokhrawl ih a nung a si ahcun rei a daih lo ding ih a sinak cu hnon a si cih ding. Curuangah "a si le si" ti theitu, "a si lo le si-lo" (Mt. 5:37)  ti theitu a si a ttul.

                           Bawipa Jesuh in amai leh le hnu khalah a thuzirhmi le a thuken pawl cu hloral men lo dingah le rawn pehzulh vivo dingah mi hrekkhat cu a rak hril ih amah thawn hmunkhat ah a umter, thu a zirh, an nun a remsak. Cupawl cu "Athlahmi Pawl" tiah kan ko ttheu. Tuisun kan Bible ahcun "dungthluntu" ti ah kan hmu. Himi pawl hi dungthluntu menmen si lo-in "hril hleice" mi an si.

Dungthluntu pawl in khuavang an dawi thei lo ih cucu Jesuh in a dawi sak hnuah Jesuh le a dungthluntu pawl cu hmun dang te ah an feh. Cutawk ah Dungthluntu pawl hnen ah kan Bawipa Jesuh in a thihnak ding thu le a thawhsalnak ding thu pawl cu a voihnihnak a rak sim cia. Himi dinhmun kan zoh a si le Bawipa in a thihnak le ta thawhsalnak thuthuk thawngin, khuavang le khuavang ih hnattuannnak pawl cu a neh thluh lai ding thu a rak phuang cia ti in mithiam pawl in an hmu.Asinan a dungthluntu pawl rori hman in Bawipa ih harsat a tuarding, thah a tuar ding le cumi ih a vuirah - satan ral nehnak - pawl cu an rak thei thiam lo. 

A dungthluntu pawl cu a zumnak a derdawng ruangah le thlacamnak an dai thlang ruangah ''tharau tthalo, khawsia,'' an dawi thei lo (Mk 9:18-19, 29). Cutivek ih an zumnak thazaang a mal ruangah Bawipa ih aw le kam cu an zum theilonak a si ding.Dungthluntu pawl cun an theithiamlo nan an sut ngam lo, Hi vek ih an suh ngam lo nak ruangah thu dik thu tak an thei ngah nawn lo ih cuticun an Bawipa cu harsatnak a ton ngaingai tikah umpi ngamlo le ttan ngamlo in an tlan hlo san thluh.

                        Culawng silo, Bawipa ih simmi, a tuar dingmi harsatnak le thihnak" pawl hman theih thiam an tum nawn lo ih, an Bawipa a um nawlo tikah "zo si upabik" ding tiah ''tohkham an cuh aw.''

"Thupibik" si an duh kan ti tikah "thu nei tu bik" si an duh. Ziangah ti le cui thuneihnak in midang ih tlunah a umter ih midang hnak in a cuangce deuh a bang. Midang rinsan ttul lo in mah te din theinak a um. Dungthluntu pawl khal cu Jesuh ih thuzirhmi an theih thiam ngaingai lo tikah "lei tisa sinak" thawn an ruat ih "upa si" an cuh awAn 'duhhamnak' pawl cu Jesuh in hmaton rori in a let ih Jesuh ih hrang ahcun "hmaisabik" si le "thupibik" si duhtu cun hmaisa ah "mi riantu" si a ttul zia a simZohtthim ding khalah a pe ih cucu amah Bawipa rori le nauhak a si. Bawipa cun 'kei cu mi nunnem le zaidam ka si (Mt 11:29; " ii cawng uh a ti. Himi nauhak a cohlang tu cun ii cohlang" a ti.

Ramkhat le ramkhaat pehtlaih awknak thu kan zoh a si le, himi rampi aiawhtu an rak cohlang a si le himi rampi cohlang dinghmun a si ih an cohlanglo a si le rampi cohlang lo an si. Mi pakhat ih palai an rak cohlang a si le a thlahtupa rak cohlang a si.

Cuvek thotho in "nauhak" pakhat cu Bawipa ih hmin ih kan cohlang a si ahcun amah Bawipa cohlang kan si ih, amah Bawipa a thlahtu Pa Pathian khal kan cohlang a si. 

                           Midang rak cohlang ti hi thinlung tthat a ttul. Lungput kaupi neih dingah, ban phar ding ah in zirh. "Midang hrangah" ti ih zawnruahnak nei dingah in zirh.

Nauhak cu  ''thincin'' an nei lo, an zai a dam. Cuvek ih zaidam dingah in zirh.

Nauhak cu anmah te ziang hman thu pipa an tuah thei lo, an nu le an pa an rinsan a ttul ttheu. Cuvek in mah le mah rinsan si loin Pathian kha rinsan sawn ding in, in zirh.

Dunthluntu pawl in Pathian an cohlan theinak dingah siseh, bawipa ih zirhmi an theih thiam nak dingah siseh an zohtthim ding cu "nauhak" a si.

Na zumnak ah pacang awla Pathian cu nauhak thinlung thawn rinsan aw. Ropinak cu tangdornak ah a si, thuneihnak cu mi va riannak ah a um.