“Pathian in Ziangruangah a Caan in Thei Ter Lo”

“Pathian in Ziangruangah a Caan in Thei Ter Lo”
2023 August 31 (Tlawngkai nili) ni RVA Falam service in thuthangṭha simnak:
“Ralring in um uh; ziangahtile ziangtikah nan Bawipa a ra ding ti nan thei lo.”
RVA Falam service in thuthangṭha a ngaitu Bawi Khrih ah duhdawtmi nu le pa, u le nau pawl,
Bawipa ih daihnak cu nan hnen ah um ringring hram seh. Tuni kan siar dingmi Thuthangṭha thawn
pehpar in “Pathian in Ziangraungah a Caan in Thei Ter Lo” timi ruat tlang in thlarau thazaang kan
lak tlang ding in ka lo sawm. Kan siar dingmi Thuthangṭha cu Matthai 24:42-51 tiang a si. Kan siar
ta hrih pei.
Matthai 24:42-51
“Curuangah ralring in um uh; ziangahtile ziangtikah nan Bawipa a ra ding ti nan thei lo. Inn neitu
pa in fifir a ratnak ding tikcu a theih ahcun it lo in a kil dingih fifir pa cun a inn bauh in a lut thei lo
ding, ti cu nan theihmi a si. Curuangah ralring tein um uh, ziangahtile Milai Fapa cu nan rin lo
laifangah a ra ding a si. “Cuti asile zo bik so rin tlak le a fimmi hnenum cu a si ding? Rin tlak le a
fimmi hnenum cu a bawipa in hnenum dang pawl hotu ah ṭuanvo a pek ih a tikcu hmantein hnenum
dang pawl rawl a pe theitu pa kha a si ding. Ṭhateih a hna a ṭuan rero laifangah a bawipa a rakir a si
ahcun ziangtlukin so cuih hnenumpa cu a lung a awi ding? Thungai in ka lo sim: Cuih hnenumpa
cu a bawipa in a thilri hmuahhmuah kilkhawitu ah a ret ding. Sikhalsehla hnenum fel lomi a si
ahcun, ka bawipa cu a ra tlung hrih lo ding, a rei lai paam ding tiah a ti dingih hnenum dang pawl
kha a hmuhsuam, a thawi pei ih zuri pawl thawn ei le in, in an um ding. Cule a bawipa cu a rin lo ni
le a theih lo caan ah ruah lopi in a rakir ding. A bawipa in cupa cu a dawi dingih mititeraw pawl
umnak hmunah a kuat ding; cutawkah ṭap-ai in a hacang a rial ding a si,” tiah a ti.
(Bawipa ih thuthangṭha a si.)
Bawi pa khatkhat asilole upa pa khatkhat kan hnen ah a thleng ding tivek a um tik ah,
kawlram ih a ṭhang mi pawl in cun kan thei zet ding, zinglam ah a thleng ding an ti ih kan hngak
kan hngak ih sun a kim cuahco ni a sa vivo, an thleng thei lo, zanlam a si vivo khua a thim tum,
khua a sik vivo ih kan ril khal a rawng zet thlang, kan bawi hmuak mi cu an thleng thei dah lo tikah
kan thin khal a heng vivo ih an thleng nawn lo ding si ding tiin tlung ding kan tim tuah hrawng ah
an thleng thlang tin tlang an au. Cu tivek nan tong dah ṭheu maw? Cu vek caan ah ziang tin nan
thinlung ah a um? Cu vek caan ah ziang tin nan khan-saa? A nuam lo nasa ti, thin heng a um nasa?
A ṭhangso deuhnak ram pawl ah cu hngak aw rero hi an peih lem lo ih ziang vek mi upa si khal le a
thleng cu tik ih a thleng lo ah cun an hngak lem lo. A thleng zik te thlang tiih thleng dah lo tivek hi
hngak a har zet ih mi thin a tawi ter thei zet. Minung pawl in a bikin tusan minung pawl in kan duh
mi cu ziang tikah na ra ding ti hi a cekci in thei kan duh ṭheu ih kan sim mi vek cekci in thil tuah
thei khal kan duh. Cumi hi thil ṭha zet pakhat cu a si ko.
Minung in cun ziangtik ah a thleng ding tivek thei kan duh zet nan kan Bawipa cun a ra nak
ding a tik cu le can hi in rak thei siang lo. Bawi Jesuh a veihnihnak a ra sal ding ih a rei hlan te ah a
ra ding tihi kan thei ṭheu mi a si. Asinan tu tiang cumi caan hi a thleng thei dah lo. Caan a nai tuk
thlang, a ra thlang ding ti in kum a thawngthawng in a liam vivo. Mi hrekkhat cun a naituk thlang
an ti rero ih a thleng dah fawn lo tiah zum duh lem nawn lo in mi ṭhihnak ah an ti men a si ding tiin
a umtu khal cu an um phahphah. Ziangruangah a nai tuk thlang an ti ih cuih caan cu a thleng dah lo
si pei. Asilole ziangruang ah Bawipa in a tikcu le caan teh in thei siang lo a si pei?
Tuni kan siarmi Thuthangṭha sungah “ralring tein um uh, ziangahtile Milai Fapa cu nan rin
lo laifangah a ra ding a si,” tiah Bawipa in in ti. A caan in thei ter lo lawng hman si lo in nan rin lo

laifangah a ra ding a ti hrih lai. Ziangruangah a caan in thei ter lo tisi le cu, a fiang tuk ko, ralring te
in um cia ringring seh ti in duh ruangah a si. Thil pakhat khat kan tuah tik ah a caan kan thei cia a si
le cu a caan kim hlan lo dai thlang in kan um ṭheu. Ziangtikah Bawipa a ra ding asilole ziangtikah
kan thi ding ti thei cia seh la kan thihni a thleng hlan sung poh cu kan duhduh in um in, Pathian
khal ṭih lo in, leitlun nuamnak ah a feh tu hi kan tam sawn ding ti cu a fiang mi a si. Pathian in kan
thihzik zawng lawng ah fim le fel teih um lawng si lo in kan nun sung hmuahhmuah ah nun ṭha ten
kan nung ih ralring ten kan um ringring thei nak ding ah a tik cu le caan in thei ter lo a si. Thlarau
lam in mifim kan timi cu a tik cu le caan a thei tu kha siloin a tik cu le caan a thei lo ruangah
Pathian ṭihzah nak thawn fimkhur te ih a nung thei ringring tu hi mifim an si sawn.
Cun a caan a nai zo, a rei nawn lo ding an ti rero mi khal cu tuni kan siarmi Saam sungah
fiang tein in sim fiang a si. Kan siarmi Saam cu Saam 90 sung ta a si ih, “Kum thawngkhat cu na
hmaiah ni khat bangtuk a si; A cem cia mi manisun vek a si ih zan ih tikcu tawite sung vek a si ko”
a ti (Saam 90:4). Cun kan kum a upa deuhdeuh tikah kan thei fiang dehhdeuh mi cu, caan liam hi a
rang tuk ih a liam cia mi caan khal cu hmakhat te vek a si ti hi kan thei cio mi asi. Cun a dang
pakhat cu rin lo pi in kan thi thei tihi a si. Caan a rang lawng hman si loin rin lopi in kan thi theinak
ruangah ralring ringring kan ṭulnak a si.
Cun leitlun kan nunnak a tawi zia kan thei ṭulnak pakhat cu mifim kan si theinak ding ah a
si. Tuni kan siarmi Saam sung thotho ah, “Kan nun tawi zia siardan in zirh awla, cule mifim ah kan
cang ding,” a ti. Pathian ṭihzah hi fimnak ih a hramthok nak a si ih kan nunnak a tawi zia thei khal
hi mifim kan sinak dingah a thupi tukmi a si. Ziangahtile kum tampi kan um lai ding, a rei tuk lai
tiin thu a ruat tu le kan nunnak hi hmakhat te a si tin a ruat tuih ruahnak le duhnak khal an bang aw
thei lo. Hi ka simmi hi leitlun kan hnaṭuan nak lam zoh in ka simmi a si loih thlarau lam mit in zoh
in a rei lo tiin ka sim duh mi a si.
“Pathian in Ziangraungah a Caan in Thei Ter Lo” timi a tawinak in kan sim sal ding a sile,
Pathian in kan thih cu tik hrawng lawng ah miṭha si ding tum lo in kan nun sung hmuahhmuah ah
ṭha te ih kan nun ding a duh ruangah a si. Leitlun kan nunnak a tawi zia thei in le kan ralring cia
ringring a ṭul ti ruat in Bawipa ih hnenum ṭha vek in a ṭhabik in nung thei dingin zuam cio u si. A
ngaitu nan zaten parah ka lung a awi. Bawipa in nan ṭulsam mi thluasuah lo pek cio hram seh.
Thianghlim Maria Pathian ih nu a tu le kan thih a cut tikah sualneimi kan mah hrangah thla
in cam sak aw. Amen.

Fr. Peter Lal Zin Thang (Hakha Diocese)