“Ti Thuknak le Hlawhtlinnak”

“Ti Thuknak le Hlawhtlinnak”

2023 September 7 (Tlawngkai nili) ni RVA Falam service in thuthangṭha simnak:
“Ti thuknak lamah na lawng hi ṭhawn awla na rualpi pawl thawn nan sur cu vun vorh hnik
uh.”
RVA Falam service in thuthangṭha a ngaitu Bawi Khrih ah duhdawtmi nu le pa, u le nau pawl,
Bawipa ih daihnak cu nan hnen ah um ringring hram seh. Tuni ah “Ti thuknak le Hlawhtlinnak”
timi thulu hmang in Bawi Jesuh zumtu ṭha le amah thluntu ṭha kan si ringring thei nak ding in
thazang pek le sawm ka lo duh. Tuni kan siar dingmi Thuthangṭha cu Luka 5:1-11 tiang a si i kan
siar ta hrih pei.
Luka 5:1-11
Veikhat ah Jesuh cu Gennesaret Tilikap ah a ding ih culai ah Pathian thu a simmi ngai duh ah
misenpi cun amah naih an cuh aw ciamco. Culai ah Jesuh in titlang ih lawng pahnih an hrenmi kha
a hmu. Ngakaitu pawl cu lawng sung ihsin an suak ih an sur pawl an kholh rero. Jesuh cu lawng
pakhat deuh sungah a lut; cuih lawng cu Simon ih ta a si; cule lawng cu titlang ihsin a hlatnak deuh
ah ṭhawn dingin a fial. Cuih lawng sungah Jesuh cu a to ih misenpi pawl cu a zirh hai. Thusim a
ṭheh tikah Simon hnenah, “Ti thuknak lamah na lawng hi ṭhawn awla na rualpi pawl thawn
nan sur cu vun vorh hnik uh,” tiah a ti. Simon in, “Bawipa, taima zet in zanvarte kan vorh nain
zianghman kan awk lo. Sikhalsehla vorh uh, in ti a si ahcun kan vorh a si pei cu,” tiah a ti. Sur cu
an vun vorh ih nga tam ngaingai an awk ih an sur tiangin a tlek ṭheh zik. Cutikah lawng dang ih an
rualpi pawl kha, “In ra bawm uh,” tiah an kut an hei zaap. An ra ih an lawng pahnih cu nga khat
tein an ret ih an lawng cu a pil zikte. Cumi cu Simon in a hmuh tikah Jesuh ih khuk kiangah a khuk
a bilh ih Jesuh hnen ahcun, “Bawipa, i fehsan hram aw; ziangahtile kei hi misual ka si!” tiah a ti.
Amah le a rualpi pawl cu nga tam ngaingai an awh ruangah an mang a bang ngaingai. Cuvek thotho
in amah thawn nga a kaitu Zebedi ih fapa Jeim le Johan khal an mang a bang ve. Jesuh in Simon
cu, “Na thinphang hlah; atu thokin minung kaitu na si ding,” tiah a ti. An lawng pawl cu ti kapah an
dinter ih an thil hmuahhmuah fehsan in Jesuh cu an thlun.
(Bawipa ih thuthangṭha a si.)
Hi kan siarmi Gospel sungin a lar bik mi catlang asilole ṭongkam cu ‘ti thuknak ah’ timi si
ding tin ka ruat. Bawi Jesuh in a hmaisabik dungthluntu pawl a ko lai ah a simmi ṭongkam pakhat a
si ih a sullam a nei zet mi khal a si. Piter le a rual le pawl zanvar te in sur an vorh rero nan nga
pakhat hman an ngah lo tikah a thaizing ah Bawi Jesuh in Simon Piter hnen ah ti thuknak lamah an
lawng ṭhawn in a rualpi pawl thawn an sur va vorh dingah a sim hai. Zanvar tein an ṭuan rero ih nga
pakhat hman an ngah lo nan Bawi Jesuh in ti thuknak lam ah va ṭhawn uh la vorh uh a ti tikah Peter
in zanvar kan vorh rero zo a um lo ti men lo in “Bawipa, taima zet in zanvarte kan vorh nain
zianghman kan awk lo. Sikhalsehla vorh uh, in ti a si ahcun kan vorh a si pei cu,” tiah a ti. Bawi
Jesuh ih sim vek in an tuah ngaingai tikah nga tampi an ngah.
Ti thuknak ah Bawipa Jesuh in an sur a vorh ternak thawn pehpar in thusimtu pawl ih simmi
tampi kan thei ṭheu ding. Sullam a nei zet mi khal a si ko ding. Asinan kei cun phun dang deuh in
sim ka duh. Piter te pawl in ziangruangah nga tampi an ngah. Ti thuknak ah nga a tam deuh ruang
ah a si maw? A si tla a si thei ko ding. Asinan ti thuknak ah an vorh ruang ah maw, ziangruangah
nga tampi an ngah timi a thar in kan ruat sal pei. Bawi Jesuh in ti thuknak ah vorh uh a ti tikah Piter
ih a let mi ṭongkam kan zoh sal pei, “Bawipa, taima zet in zanvarte kan vorh nain zianghman kan
awk lo. Sikhalsehla vorh uh, in ti a si ahcun kan vorh a si pei cu,” a ti. Zan ah ti thuknak lam ah an
vorh le vorh lo cu Bible in fiang te in a sim lo. Asinan Piter ih ṭong mi kan zoh a si le cu ti thuknak
lam tla tawk fang cu an vorh zo khal a si thei. Ti thuknak lam ah vorh uh a ti tikah Piter in

“Bawipa, taima zet in zanvarte kan vorh nain zianghman kan awk lo,” tiin a let. Curuangah ti
thuknak lam khal ah an vorh rero zo khal a cang thei mi a si. Sim duhmi cu ti thuknak lam ah nga a
tam ruangah nga tampi an ngah ti hnak in Bawi Jesuh ih thu simmi an ngai ruangah an ngah mi a si
deuh ti kha tar lang ka duh mi a si. Himi a cang mi hi a dungthluntu pawl a ko thoknak lam ah a si.
Thihnak in a tho sal tikah hi vek thotho veikhat a cang lala. Cu tikah cun Jesuh in ti thuknak ah
vorh uh a ti nawn lo ih lawng vorhlam kam ah va vorh uh a ti. Cutik khalah nga tampi an ngah
thotho. Curuangah a thupi bikmi cu Bawipa ih simmi vek in tuah hi a si.
Ti thuknak cu a har deuh ih ṭih khal a nung deuh vekin nga khal tampi a um thei. Cuih ti
thuknak ih kan hnaṭuannak ah hlawhtlingnak kan hmu theinak ding in cu ti a thuk le thuk lo hnak in
Bawipa ih sim mi ngai hi a si deuh. Ti thuknak ah nga a tam kan ti ih Bawipa thungainak tel lo in
kan mah duhduh in kan ṭuan a si le cu ti a thuk khal le nga kan ngah cuang lo ding. Khrih ah
hlawhtlinnak kan hmu theinak ding in cu Bawipa ih simmi thu ngai hi a thupi bikmi a si.
Bawipa ih thusim ngai in kan um kelnak asilole kan dinhmun kel kha tan in ti thuknak vek a
si mi a har ih kan thlarau hrangah ṭhanso nak a um theinak ding hmun lam kha pan zuam cio uh si.
Bawipa in a mah thu nan ngainak thawng in nan hna ṭuannak cio ah hlawh tlinnak lo pek cio hram
seh.

Fr. Peter Lal Zin Thang (Hakha Diocese)