Keimah

Monday, March 30, 2020
Keimah
March 31, 2020 hrangih Thuthangttha, Thlarau rawl
 
Ulhcaan zarhnganak, tlawngkai nihnih ni (March 31, 2020)
Siarding: Mipum siarnak (Numbers) 21:4-9; Ps 102: 2-3, 16-21; Jn 8:21-30
John ih nganmi thuthangttha kan zoh tikah (Jn 8:12-59) sung ahhin Jesuh le Jew pawl ih
karlakah elawknak a um ih cui elawknak cu "Jesuh ih sinak le Pathian thawi an peh tlaih
awknak" thu ah a si bik.
Tuisun kan siarmi Bible ahcun Jesuh cu Pa ih Fapa a si thu le Pa ih thlahmi a si thu kan hmu.
An karlak ah a fekzetmi pehtlaihawknak a um thu kan hmu.
Jesuh cu Pathian ih Fapa a si thu zumh hicu nunnak diktak kan ngahnak hrangih a ttulsammi a
si.
Jesuh ih sinak cu felfai te ih kan theihlo a si le amah kan zumnak khal cu a fumfe lo ding.
Khatlamah Jesuh cu Pathian a si tikah Jesuh ih sinak cu felfai te in kan thei thei ding maw? Asi.
Jesuh cu Pathian a sinak ah asinak cu kan thei thluh theilo ding nan a "Pathian sinak" kha
fumfe ih kan zum ding kha cu a thupi.
Jesuh in Jew pawl hnenah "ka fehnak ahcun nan ra thei lo ding" a ti tikah Jew pawl in an thei
thiam lo. Amah le amah a that aw tum si hmang an ti. Jesuh cu khui ah a feh tum? Ziang
ruangah midang pawl in teh an thlun thei lo nak ding san? Bawipa cun "nan nih cu hnuailammi
nan si, kei cu tlun lammi ka si" a ti. Jesuh cu vanmi a sinak a pho lang. Hitivek ih "vancungmi
sinak" le "leilungmi sinak" ih danglamnak ruangah idang ih an thlun theilonak cu a si. Jesuh cu
a ratnak ah kirsal ding a si.
Hiti ih "tlunlammi le hnuailammi" ti ih tthen awknak cun hmailam ih Jesuh ih a aupi dingmi
"keimah" a ti mi hrangah lamzin a sial aw in kan hmu thei, Pathian a siak kha in hmu ter.
Jesuh cun "Keimah cu Keimah a simi ka si" tiah amah le amah a phuang aw.
Ex 3:14 sungah "Israel mipi pawl in kan hnen ih a lo thlahtu cu a hmin zo saw" tiah in sut hai
sehla ziangtin ka sim ding" tiah Mose in Pathian hnen ih a sut tikah Pathian cun "Keimah cu
Keimah ka si. Keimah a simi in nan hnenah ii thlah" na ti ding tiah a sim.
Hlanlai ihsin himi ttongfang "Keimah" ti cu Yahweh Pathian in amah le amah "zo ka si" ti a
khihhmuh awknak ttong ti in an rak pom. Cucu Is 43:3 sungah "Keimah cu Bawipa nan
Pathian ka si, a lo runtu Israel ih Pathian thianghlim ka si" a ti.
Himi "Keimah" ti cu Pathian a si ti kan theih vekin cuicaan ah Jesuh in amah le amah "Keimah"
a ti awknak thawng in Pathian a sinak cu a phuang aw vivo.
Tuisun kan siarmi ah Jesuh in "Keimah" timi hmin le ttongfang hmang in a dot dot in amah le
amah a phuang aw vivo. Hmaisabikah (Jn 8:24) ah "Keimah cu Keimah a simi ka si" ti hi nan
zumlo a si ahcun nan sualnak sungah nan thi rori ding" a ti. Cui hnuah (Jn 8:28) ah "Milai
Fapa hi nan thlei tikah 'Keimah cu Keimah a simi ka si' ti kha nan thei ding" a ti. (Jn 8:58)
ahcun "Abraham a suah hlanah Keimah a simi ka si" a ti.
 
Himi pawl kan zoh vivo asile Jesuh cu Pathian ih fapa a si thu, Pathian ih thlahmi asi thu le
Pathian a si thu kan hmu.
Asinan a ttong theitu pawl in an zum duh cuang lo. Curuangah "nan sualnak sungah nan thi
ding" a ti. (Jn 16:9) sualnak thu an ruahdan a palh; ziangah tile keimah in zumlo ruangah a si"
a ti ih Thuthangttha ngantu John ih hrang ahcun "zumlo ih an umnak" cu sualnak a si ti kan
hmu. Zumnak an neih lo ruangah an thi ding a si. Asile cui zumnak teh ziangvek zumnak si a
rel?
Bawipa Jesuh cu Thinglamtah ih thlai a si tikah mi hrek ih hmuhnak le ruahnak ahcun "Satan in
nehnak a co" ti le "Pathian in a dung a tun" khi abang. Ziangah ti le (Jn 14:30) ah "nan
hnenah reipi thu ka sim thei nawn lo, ziangah tile hi leilung uktu pa a ra zo" ti in siseh, (Jn
16:32-33) "Keimahte lawng in taan tik cu a ra thleng ding, a si, a tu a ra thleng zo" ti in kan
hmu. Asinan (Jn 10:18) "Ka nunnak cu zohman in, in laksak theilo, Keimah te siangzet in ka
pekmi a si. Keimah in pek theinak thu le laksal theinak thu khal ka nei. Cumi cu ka tuah dingah
Pa in ii pek" ti in siseh; (Jn 14:31) "Ka pa ka duhdawt kha leilungmi in an theih theinak dingah
A mah in thu ii pekmi hmuahhmuah ka tuah ttheh a si" ti ah a ti. Curuangah, a diktak ahcun
"Pathian thawi pumkhat an sinak" a lang sawn.
Pathian ih duhnak a tuah" timi hi "Pathian thawn pumkhat" an sinakbik a si.
Keimah a ti aw tu Bawipa cu kan zumlo a si le kan sualnak ah kan thi ve pang ding. Kan kaa
lawng ih "ka zum" kan ti a si le hmual a nei lo idng, man a nei lo ding. Jew pawl in Abraham ih
tefa kan si an ti nan Jesuh in nan tuah nan tuannak zoh ahcun Abraham ih tefa si nan tlak lo a ti
vek in kan tuah kan tuannak a tel lo a si ahcun "Pathian ka zum" kan ti mi cu thuphan ah a cang
ding. Curuangah Pathian ih duhnak kan tuahnak thawng in Pathian thawn pumkhat si zuam
uhsi.
 
 
 

Add new comment

7 + 1 =

Quick Links