Keimah ka si pang maw?

Keimah ka si pang maw?

Thinghlimmi zarh, tlawngkai nihnih ni (April 7, 2020)

Siarding: Is 49:1-6; Ps 71: 1-6, 15, 17; Jn 13:21-33, 36-38

• Kan Bawipa Jesu in a leh le hnu ih a hna rawn tuantu dingah minung hleihnih a hril ih cu pawl cu Dungthluntu hleihnih ti in kan rawn theu ttheu. Cui dungthluntu pawl cu Bawipa Jesuh thawn kum thum sung rori an um tlang, khual an tlawng tlang, an ei an in tlang, Bawipa in thu le hla tampi a sim in a zirh.

• Tuisun kan siarmi Bible khal ah kan Bawipa le a dungthluntu pawl cu hmunkhat te in zanriah an ei thu kan hmu. Kan Bible sung kan zoh vivo asile "rawl-ei" ti cu lungawi thu le nuamnak thu thawn a peh aw ringring. Kan Bawipa cu a dungthluntu pawl thawn hivek ih nuam ih an um lai-ah a thinlung sungih a um mi cu suup aw thei nawn lo in a dungthluntu pawl cu a sim. Cucu "a dungthluntu pawl lak ihsin pakhat in a zuarthlai ding" ti a si. Cu tikah a dungthluntu pawl cu an thin a phang, keimah ka si pang pei maw? ti-ah an phaw keke.

• An thin nuamlo ih an hei sut tikah Jesuh in "sangreu ka pekmi in ii zuar ding" a ti ih cuticun sang cu Judas a rak pek. Jesuh cun a ratnak san a thei, a thlahtu Pa ih duhdan tuah dingah a ra. Ziangah tile a suahhlan ihsin a theitu asivekin a hmailam hrang khua a khan saktu a si. Cui khuakhan cu ttihzet cing khal in a thlun ding. Curuangah "Hi khuathai hi ka in lo ding ah cang thei si sehla aw" a ti. Asinan "na duhnak bangin siseh." a ti thotho.

• (Jn 4:34) ahcun "kei ka rawl cu ii thlahtu ih duhnak tuah le hnattuan ii fialmi tuah ttheh hi a si." (Heb 10:9) "Na duhnak tuah dingah ka ra".

• Aw le kam lwng ih "na duhnak tuah" ti cu a olzet ko ding nan voi tampi cu cui "duhnak" cu kan thei thiam lo. Curuangah Saam cangantu cun (Saam 143:10) "Na duhmi tuahtu si dingah ii zirh aw" a ti.

• Pathian ih duhnak cu "A minung pawl hruaikirsal dingah le leilung pumpi rundamnak an ngah theinak dingah" a si. Cuvek thotho in, amah thawng in Pathian ih sunlawinak langter ding a si. "(Is 49:3) Nangmah ruangah mi in in sunlawih, in thangtthat ding" a ti. Cui sunlawinak ih famkimnak cu Calvary tlang, Thinglamtah par a si ih "Leilung pumpi rundamnak ding" khal cu cui Thinglamtah zin thotho a si.

• Pathian ih lai a rak rel cia mi cu famkim ter ding a duh ruangah Bawipa cun ttih cing te in Cross zin a zawh. Bawipa ih a in dingmi khuaihai, harsatnak pawl cu Pathian ih sunlawinak hrangah a si. Himi Thinglamtah zin a zawh nak ding thu ah Judas ih cangvaihnak a lang.

•  

• Jesuh in sangreu cu Judas Iscariot a pek ti kan hmu. Jew pawl ih nunphung lam ihsin kan zoh a sile innteek in sang a pek ti cu sunlawih awknak le duhsak awknak a si. Jesuh in amah phatsantu le zuarthlaitu ding Judas cu bikhiah neilo in a duhdawt ti a langter.

• Judas Iscariot cun a phasan, a thlun reromi le a rinsanmi a Bawipa cu sumpai thawn a thleng. Ziang ruangah a phatsan? Judas cun hi leitlun ih dinhmun sang a rak duh, sunlawinak a rak hawl, a ruahsanmi le thil thleng cu a danglam aw tuk. Bawipa ih zirhmi cu a thei thiamlo, a hleice in Bawipa ih harsat tonnak, hmuhsuam le nautat a tonnak tivek pawl a hmuh tikah a rak ruahsannak thawn a dang aw tuk.

•  

• "Judas in Jesuh ih pekmi sang cu a lak ih a suak. Cu tikcu cu zaan a si" a ti. Jesuh le a dungthluntu pawl cu zanriah an ei ti a si ruangah khua a siim thlang ding ti cu ruah theih a si. Amag lawngte Bible ngantu in "zaan a si" ti ih a ti duhsannak cu a tuan le tlai a sim duh mi hnak in Judas ih cang vaihdaan a khih hmuh sawn. Hnatha tuan mi cu sunvang ah tuan a si. (Mt 5:16) nan tleunak cu mi dang hmai ah tleu ter in hnattha nan ttuan mi cu hmu hai seh" a ti. (Jn 9:4) khalah "sun a si sung ahcun ii thlahtu ih hna ka ttuan rero a ttul. Zan a ra thleng cing dingih zo hman hna an ttua thei nawn lo ding" ti in kan hmu. (Jn 11:10) " zokhal sunvangih a fehtu cu a bah dah lo. Sikhal sehla khawthim sungih a feh ahcun a bah. ziangah tile tleunak a nei lo" a ti.

• Jesuh in "(Jn 8:12; 9:5) Keimah cu tleunak ka si. Zo khal keimah ii thluntu cu a nunnak ah tleunak a nei dingih khawthim sungah a feh dah lo ding" a ti.

• Judas cun tleunak a simi Jesuh hnen ihsin a feh tikah tleunak a nein awn lo, a bah thlang. Cu ti-ih a bah ruangah a bawipa cu a zuar thlai.

• Jesuh thawn naihniam awzet ih um tlang rero zo hmu, a kukum ih um tlang rero zo hnu, Bawipa amah rori ih rak hril mi Judas hman in rinlo ah a phat san.

• Ralring aw, Jesuh hnen ihsin hmundang ah na feh a si ahcun tleunak na neilo ding ih na bah ding. Cui ti-ih na bah tikah Jesuh kha Thinglamtah parih kheng rerotu na si pang ding.

•  

• Na hrangah thih khal ka ngam a ti tu Peter khal cun "ka thei lo" a ti leh lala. Himi kan zoh tikah zocio khal mah le mah zumawktuk a theihlo ti a fiang. Bawipa Jesuh in Peter hnen ah "Na thlarau cun na duh nan na taksa cu thazaang a mal" a rak ti. Paul khal in "thil ttha tuah ka tum khal le ka tuah ngah ngaingai mi cu sualnak lawng a si ee" a ti. Kan minung sinak ah kan famkimlozet ti hi thei aw ringring in tangdor le ralring ih kan um thiam ding hi a ttul ngaingai.

•  

• Thil ziangkim ah a tawk le zawn te a um ttheu. Mah le mah rinsanawk hi tthansonak lam in pan pi cu a si nan a luarkai deuh ih kan mah le kan mah rinsan awktuk a si le kan nun ah midang ttul nawnlo ah kan ruat ding. Nan ralrinlo laiah, fifir bangin ka ra ding a tit u Jesuh cu kan ralrinlo lai ih a rat tikah Jesuh a si thei thiamlo in kan um ding, midang kan ttullo ruangah Jesuh khal kan rak hnong ngah ding. Jesuh kan hnong le kan hngilh pang a si le kan nunnak ih tleunak a hlo pang ding.

• Kan rinsan awktuk a si le Peter bangin "Jesuh eltu" ah kan cang thei. Kan nunnak ih tleunak a umlo a si le Judah bang in "Jesuh zuar thlaitu" ah kan cang thei.

• Cuti ding hnak cun "kei ka si pang pei maw?" ti ah ral ring te in um ringring uh si.