Mithianghlim khaisannak ih a tul mi ti daan pawl

Mithianghlim khaisannak ih a tul mi ti daan pawl

Pope Urban VIII nak le Pope a dotdot in mithianghlim (saints) dinhmun ah an rak ngamhnget. Pawlpi ih huham thilti theinak le mangbangza langnak pawl hrambun in a sual thei lo mi thu neihnak in ngamhnget in thla an rak cam theu. 1983 kumah Pope John Paul II in mithianghlim sinak ih ngamhnget daan a rak thleng. A tu Nu pawlpi sungah cohlang in  hman mi a sangsang in kan run sim ding.

Ahmaisa ah thianhlimnak thawn a nungtu Catholic Puithiam le Sister pawl, zumtu mi menmen pawl sungin mi pakhat a thih hnuah kiangkap mipi pawl in hi mi cu mithianghlim a cang ding, zumtu diktak a si ti ih an cohlan mi a si le, cu mi ih Parish Priest le kawhhran mipi pawl in diocese neitu Bishop hnenah dilnak ca an thlun lut dingih Bishop in Pathian thu lam ih thiam nal pawl le thuanthu lam thiamnal pawl hnenah tuanvo a pe dingih cui mithianghlim cangtu dingih thuanthu pawl a nepnawi in an zingzawi ter ding. An zingzawi mi thu pawl kha Bishop hnenah an fehpi sal ding. Ngaingai in mangbangza a lang maw lang lo, a si maw silo, dik zet in zinzawinak an nei ding asi. Fiangzet in an zingzawi theh a sile an mai Bishop hnenah an hmuh sal ding.

Cuihnuah Bishop in siseh, a mai aiawh in a fial mi in a tuvekih an kuat mi thu hla pawl, mangbangza langnak pawl pakhat hnu pakhat a check fel ding. A check fel hnuah Bishop in a dang bishop pawl, kawhhran mipi pawl, thiamnal pawl thawn an rel tlang dingih lungkim pi nak an lak dingih hmun ram neitu Bishop in hi mi thilthu um daan pawl a finkhawm dingih Rome khuapi ih Mithianghlim khaisang nak thawn pehpar mi zungah a thlen ding.

Hi mi tiang thaten tuah suak thei a sile Mithianghlim ih khaisan dingmi pa lole nu cu Servant of God ( Pathian ih riantuan tu) ti mi buaih kha a  hmaisabik ah pek a si ding. Cuihnuah a pahnihnak ah dinhmun ih khaisang dingah pehbet in tuah a si ding.  A pahnihnak sinak a si mi Blessed dinhmun kha thaten thleng thei dingah Mithianghlim dinhmun ih khaisan ding mi a thi zo tu ih mangbangza langnak pakhat a hmuh a tul.

A hmuh mi langnak cu fiangzet mi langnak a si a tul. Mithianghlim ih khaisan ding mi pa lole nu cu Pathian hrangah lole zumnak ah nunnak a pek tu, thah tuartu mi raltha si lo in si daan kel in a mai nunnak a cem tu pawl cu an thih hnuah vancung ramah a thlen thu langsarnak dingah mangbangza langnak tetti a hmuh a tul ta a si.

Mangbangza langnak a tul ti tikah thaten theihthiam theinak ding hrangah thahthimnak ih kan ti a sile Kolkata khuapi ih Mother Theresa kha mithianghlim cang ding ih mangbangza langnak a hmuh  mi  lak in pakhat cu Chirstian a silo mi nunau pakhat cu a pumah cancer nat nasa tak in a tuar ih siibawi pawl in an dam thei lo mi ruahsan nak neilo in a um mi cu Mother Theresa ih zuk kha a pumah daiter in a natnak damter dingah a thi zo thu Mother Theresa ih thlacamsak nak tuletu a dil tikah a tuar mi Cancer nat nak cu a hram in a hlo tiah siibawi pawl in an check salnak in an rak hmu thei ih an mang a bang nak khal hmuh a si.

Hi tivekih tidaan pawl thawn a sile Pope in Mithianghlim dinhmun ah official in a than tikah official in upat sunloihnak pek thei a si. Anetabik dinhmun a si mi Saint (mithianghlim) dinhmun khaisannak ah thuhman ruangih thah a tuar tu silo in mithianghlim ah khaisan ding mi khal thu hman ruangih thahnak tuartu khal hi mi din hmun ah mangbangza langnak  a tuah a tul a si.

Hi tivekin mangbangza langnak a hmuh theh hnuah mithianghlim (Saint) dinhmun ih khaisan a theih a si. Hi ti vekin mithianghlim ih khaisan asi tikah leiltlunpi thawn pehpar mi Catholic pawlpi zaten upat sunloihnak cu pek theih a si. Tiduhsan mi cu mithianghlim ih khaisan nak a ngah tu cu leitlun ih a nun laiah thianhlimnak ngaingai thawn a zuamih a nungtu a si ti mi duhsannak a nei a si. Mithianghlim ih a khaisang tu Nu Catholic pawlpi in a khaisan lawngah mithianghlim dinhmun ih a thlennak lawng a si lo.

A thi zo tu vancungram thleng zo tu pawl khal mithianghlim pawl an si ve a si. Nu Pawlpi in hitivek ih a danglam hleice in a rak nungtu zokhal zohthim dingah Pathian ah zumnak fek thawn nung in nunram bangaw mi minung pawl lakah duhdawtnak nei thei dingah Aamahkhan nak a um thu tetti ah langsar in tuah mi a si tiah kan run tarlang duh a si. Hi mi Fr Michael ih ngan mi sungin kan run tarlang mi asi.