Kan hnenah riak ve aw

April 15, 2020/  Lk 24:13-35

RVA Falam service in Pathian thuthangtha ngaitu u le nau pawl, Happy Easter, Alleluia, tiin cibai ka lo buk hai. Thosal Jesuh Krih ih hnangamnak, sunlawinak, nunnak le thawmhuham nan zate par ah thleng hramseh tiah thlazaa ka cam. Paska puai zarhkhatnak sungah kan um hrih ko ih, Paska thuthuk hi thuk deuh le fiang deuh ih kan theihsin thei ding hi duhsaknak tumpi ka nei. Curuangah simcia mi tete khal simnolhbet rero hi kaa a thaw zet. Christian pawl ih Pathian kan biaknak puai hmuahhmuah lakah Paska puai cu a thupibik puai a si. Asi le, tuikum hi Catholic Pawlpi in Paska puai kan tuah maw? Tuahtuk pan teh. Eiin le lehlam um lo khal le Missa thawinak, Bawipa thisa sumnak a um cun puai tumpi thotho a si. Biakinn ih misenpi kan khawm ngah lo khal le Pope, Bishop pawl le Fr pawl ih thawinak an tuah mi ah kan zaten kan tel ih puai sunglawi zet, ropi zet kan tuahngah thotho. 

Vansiat lak i, vantha i ka ruah mi cu, facebook le online in Catholic pawlpi ih Pathian kan biak dan zoh ding tampi a um ih, Christian silo pawl le Catholic asilo zumtu pawl khal in an rak zoh cio ding. Kumdang vek in cantha bang sehla kan khawmdaan le puai kan tuahdanpawl hi, hi zatpi in media ah kan thlah lo ding. Tucu tikcu caan that lo lam ah kan khawmdan tam zet le kau pi in zaapi hmai ah langhter theinak caan remcang kan hmu sawn ah a cang. Thukam hlunih Pathian miphun Israel pawl cun tuufano that in lantak puai an raktuah. Pathian an biaknak puai tampi lak ih puai thupi bik a si. Thukam thar ih Pathian miphun Israel thar zumtu kan nih cun tuufano Jesuh ih thi le sa in lantak puai kan tuah. Bawi Jesuh nih netabik zanriah einak ih Lantak puai a tuah mi cu calvary thlang ih a thihnak ah a pehzom vivo ih a thawhsal nak ah a famkim. Thukam hlunih Pathian sunlawihnak ih ulhni ih an hmanmi Sabbath nikhal thukamthar ah cun Jesuh ih thawhsalni Sunday, Nipi, zarhpi, colhni ah a thleng awaw zo. 

Zarhpi ni ih kan khawm tinten Bawipa ih thawhsal ni puai lantak puai kan nolh rero a si ih, cui puai ah cun Jesuh amah sawn in rawl in do. Vancung in a tum mi sangnungin in cawm. Paska tuuno Jesuh ruangpum einak in thlarau rawl kan eikhawm. Eden hmuanih Adam le Eve nih an rak ei ngah lo mi, Pathian nih ei a sian lo mi nunnak thingkung ih a rah cu, rundamfa kan nih in lungawi ten, sunglawi ten kan ei ngah. Nunnak thingkung cu calvary tlang ih Thainglamtah a si ih, a rah cu thinglamtah parih thlai a simi Jesuh ih ruangpum a si. Thukam hlun ih Pathian ih eihlah uh nan thi ding a rak ti mi cu thukam thar ah cun Jesuh nih ei uh nan nung ding in ti. Nunnak thingrah Jesuh pumsa ei cu kan hrangah puai sunglawi bik le rawl thaw bik a si thlang. Himi thuthawn pehpar in tuisun ih kan siar mi Lk 24:13-35 sungah kan zoh bet pei. Himi siarnak sungin thu pali zir tlang u si. 

1 nak, Emmaus khua panih tlungmi dungthluntu pahnih thu:  Dungthluntu pa 2 cu beidong le mithmai sia te thawn Emmaus khua lam an pan. Jesuh parih ruahsannak tumpi an rak neih cu a ziam, a cem cuahco. Asinan thiltha pakhat te an hnenah a tang. Cucu a riasiat can le beidong laican khalah Jesuh thuhla lawnglawng lamthluan ah a ruahawton rero. Tulai kan tik cu can khalah natsia ruangah beidong thinphang le vavai in kan um rero nain, Jesuh thuhla hi ruat theu in rel khawm thlang theu hram usi. Ziangthuhla kan rel can ah kan tong kaa a thaw bik theu, cek aw hnik u si. Pathian thuhla relkhawm hi kan kaathawtzet mi sihram seh. Harnak le vaivuannak lak khal ah Jesuh hmin sal hi a thlum in a thaw bik ringring ko e.

2 nak, An hnenah Jesuh in a feh pi ih thuhla tampi a zirh thu: Cu tiih an tong laiah Jesuh cun a hun fuuk hai ih an feh tlang ti asi. Amai thuhla kan rel canah Jesuh nih in fuuk, in pan. An theih fiang lo mi pawl khal a simfiang bet, a zirhbet hai asi. Simfiangtu, zirhtu dingin Jesuh nih in feh pi. Zozo khal  Jesuh ih zirhbetnak kan tul thluh. Pathianthu lam zirnak nei le zuamaw thei pawl khal in zirkim le theitluh ti a um lo. Kumthumsung Jesuh thawi tlangtlang le a tuah mi mangbang za hmurereo tu dungthluntu pahnih hi, zirhbet lo cun an zumhnak le ruahsan nak a cem mai hi. A tawk zo, ka thehzo ti  a um lo. Theih cia hman thlun cawk loah, theihbet tul lo titu tla kan um. Pathianthu ka theih tam le thluntul a tam vivo ih theihlo lawlaw a nuamsawm titu santhar mino tete tla kan tongngah theu. Kan zirbet, kan hawl bet rero le cu Jesuh nih thuthuk le thutak in simfiang ding. Kan ruahnak a vang ter vivo ding. Jesuh hnenin Pathianthuhla siseh nundanziaza siseh zir sin u sih. 

3 nak, rawl an ei nak ah Jesuh ti an theihthiamnakthu: “Kan hnenah riak ve aw” tiah dungthluntu pahnih cun Jesuh cu an sawm. Khuathim hnuih Jesuh a mah lawng fehter ding an siang lo. Minung in Pathian kan khel dah lo, A mah sawn in in khelh ringring. Kan seherh hnak in amah nih in seherh sawn ih, riahding kan sawm mi hnak in kan hnen ih caam ding duh zettu asi sawn. In um pi aw kan ti hlan in, “Sancem tiang, Nan hnenah ka um ringring ding” tiah Mt. 28:20 ah in ti. An sawm mi mikhaul Jesuh sawn nih zanriah a do. Cuveten Bawipa a si ti an thei. Jeuh nih lamzin tluanih a zirh rero mi thuhla ih cem net, le duhsan cu sangphelnak ih Jesuh hmuh ding hi a si. A va thupi ve. Bible kan siar le thuthangtha kan sim rero mi hmuahhmuah hi Jesuh ih pumsa, Missa sumnak thawn pehzomaw ringring seh tihi in zirh mi a si. Sangphelnak ih Jesuh tongngah tu Catholic zumtu pawl kan comi thluasuah hi a tumtuk so khaw. Missa sumnak le san nak hi Lungawi zet in, sunlawihnak, upatnak pe sin usih.

4. Jerusalem ih an kirsal thu.

Thosal nun neihngah lo cun nun hlun ih kirsal a ol te ih, nunhlun ih kirsal theu pawl khal in thosal nun co ngah a har zet ve. Dungthluntu pahnih cu thosal Jesuh an neih ngah lo ruangah mai nun kel, tuan kel ah kirsal an tum. Jesuh an ton ngah hnu cun an thutum cu an thleng ih, Jerusalem ah an kir. An hmuhton mi an phuangsuak ih, midangih hmuhton mi khal tampi a thei ngahsin asi. Jesuh thawi ton awk hi nun thlengawk nak a si. Tumtahmi le nunzia le ruahnak ziang kim a thar ah a thleng awaw. Jesuh ih umpi mi cun maih fehduhnak hnak  in Jesuh ih fialnak hmunah a feh sawn. Mai duhnak hnak in Jesuh duhnak a thupit sawn. Kan nun in mawng tu in khal tu hi Jesuh si. 

In um pi aw Bawipa, “Kan hnen ah riak ve aw” ti in Jesuh sawm usi. A thlarau, a tongkam le a ruangpum thawn kumkhua ih in umpi ringring tu, Thihnak ihsin a thosal mi Jesuh krih a hmin thangthat si ko seh. Alleluia, Amen.