Zo hnenah Siah na pek?

Zo hnenah Siah na pek?

Caantluang zarhkuanak, tlawngkai nihnih ni (June 02, 2020)

Siarding: 2Peter 3:11-15, 17-18; Ps. 89:2-4, 10, 14, 16; Mk 12:13-17

• Tuisun kan siarmi Thuthangttha ah Pharisee pawl le Herodians pawl in Bawipa Jesuh ih hnenah ra in thu an ra sut. Thusuhnak kan titikah thil pakhatkhat, thuhla pakhatkhat theih kan duh ruangah thu suhnak kan tuah. Cucu thu fehdan tlangpi a si. Asinan tui kan siarmi Bible sungih Bawipa Jesuh hnenih thusuhnak an tuahmi cu thutheihduh ruangah siloin in thang kamnak a rak si. Himi thangkamnak cu Bawipa Jesuh parih an neihmi thinlung: "huatnak le engtainak thinlung" ihsin a ra pawt.
• Thusuhnak an tuah hlan ah amah Bawipa cu an lawm ih an porh hmaisa, "minung mithmai na zohlo, mi thleidan neilo in thudik na phuang" an ti. Himi hi an hmuhton zomi parah thu ruat in Bawipa cu an porhnak a si. Mk. 11:27-33 sungah Bawipa ih thuneihnak cu khui tawk in a ra ti ih an thusuhnak cu Bawipa in direct ih a simlo ruangah tucu khavek in kian lo dingin amah kha an porh ta.
• Kan nitin nun ah kan kiang kan kap zoh sehla a hlir ih in hlir rero tu an um ding, in porh rero tu an um ding. Cupawl kha in duhdawttuk ruangah a si lemlo men ding, ralrin ttul pawl an si thei. Ralring aw.
• Thu an ra suhmi kan zoh a si le "Caesar hnen ih ngunkhuai pek hi kan Daan ih a thlah maw thlah lo?" an ti. Kan Lai Bible ahcun Caesar ti lo in Rome Siangpahrang tiah tlang vuahvi in an ngan mai. Himi ngunkhuai pek ih sullam cu "Jew pawl cu Rome kuthnuai ah an um" tinak a si. Curuangah miphun thu le ramkhel thu a tel cih, a cok polh aw.
• Bawipa hnenih a ra tu pawl ih dinhmun kan zoh ta ding. Pharisee pawl le Herodian pawl an si. An zate in Jew miphun an si. Pharisee pawl cu zo an si, ziangvek an si ti rel dang ttul loin kan thei thluh cia. Herodians pawl teh? Herodians pawl cu Gailee le Perea ram uktu Herod Antipas a ttantu pawl an si. Jesuh phiar nak ding ah Pharisee pawl ih Herodians pawlih ttanpi an ttul theu (Mt. 3:6). Cun Pharisee pawl cu Zealot pawl vekih "a luarkai le hleifuan tukih miphun ttan an si lo" ruangah Herodians pawl thawn rualrem in an um tlang thei. Asinan siah pek ding thu, ngunkhuai thu ah cun an pom dan a kalh aw. Pharisee pawl cun ngunkhuai pek duhlo lamah an ttang, Herodian pawl lehthung cun ngunkhuai pek a ttul an ti.
• Curuangah an thusuhmi "Caesar hnenah ngunkhua kan pe ding maw pelo ding?" timi cu "pe ding, pelo ding" tiah felfukfi in rak sawn sehla cu lamttang nei abang ding. Pharisee pawl lam a si ding maw Herodians pawl lam a si deuh pei maw.
• Pe ding ti pang sehla Herodians pawl cu an lung a awi ding nan Pharisee pawl in an phiar ding, Miphun le rampi phatsantu tiah an ti ding. Pelo ding ti sehla Pharisee pawl an lung a awi ding ih Herodians pawl in an phiar ding, Rome cozah dodaltu a si an ti ding. Cuticun khui ti zawng khal in pial theinak a um lo.
•  
• Bawipa Jesuh in siah a pek thu kan hmu (Mt. 17:24-27; Rom 13:1-7) vekin tuanvo neitu pawl upat hna thiam ding a ttul zia khal a rel (1Peter 2:13-17) khal kan hmu.
•  
• Cun a ra suttu pawl ih an sirhsan mi Daan cu Rome dan siloin anmah Jew pawl ih daan a si. Jew pawl lehthung cun Daan dang nei lo in Moses ih a rak pekmi daan lawng an neih ruangah himi daan cu Pathian ih daan khi a khihhmuh a si.
•  
• Asinan Bawipa cun an thinlung a rak thei cia. Thang an kam ti khal a thei. Curuangah siah thawi pehparmi tangka cu "ii hmuh uh" a ti. An hmuh tikah cui tangka parih a cuangmi cu a zoh. Rome Siangpahrang Caesar ih zuk a cuang.
• Himi ah thu a ra suttu pawl cun ngun tangka cu an rak keng cia. Bawipa in "ii hmuh uh" a ti ve ten an hmuh thei lohli. Himi kan zoh tikah Jesuh phiar theinak dingah ziang titluk in tim an tuah aw cia ti ruah theih a si.
• Ngun tangka parih a cuangmi cu Rome Siangpahrang a si. Kan Bible sung kan zoh a si le Jerusalem cu Pathian umnak khuapi ti ih kan hmuh vek in Rome cu Leilung tlun khuapi in kan hmu. A kah ral aw in hmuh a si. Tu-ah Rome siangpahrang zuk a cuang ti cu lei tisa sinak thawn a peh par aw.
• Curuangah Bawipa in "Caesar ta cu amah Caesar pe uh la Pathian ta cu Pathian pe uh" a ti, Leitlun thu cu leitlun thu in feh sehla Pathian thu cu Pathian thu vekin feh seh.
• An thangkam mi thusuhnak cu Bawipa in "siah pek ding" ti ah, a nemhnget zawng in a let. Amah lawngte, kan mai neihmi, kan ta sung ihsin pek ding tihnak in amai ta a si ruangah amah pek kir ding ti zawng in a rel tikah "ttanbul" a neilo ti in an hmu. Cuticun zokhalin an phiar in an kai thei lo. 
• Bawipa cun an thusuhnak lawng sawn men lo in hmaiah karkhat a feh bet.
• An thusuhnak cu "Caesar hnenih siah pek hi Pathian ih daan thawn a kalhaw maw kalh aw lo" ti a si. Lei tisa daan cu Pathian ih daan in an ngerhtar tum. Cumi thusuhnak cu Bawipa in "Caesar ih ta cu Caesar hnenah peksal ding, Pathian ih ta cu Pathian pek ding" ti ah a sawn ih Lei tisa ihsin thlarau thu ah a fehpi. Cucu Caesar ihsin Pathian ah, ramkhelnak le miphun thuhla ihsin thlarau thu ah a fehpi. Rampi parih kan neihmi ttuanvo ihsin Pathian hnenih kan neihmi ttuanvo ah in fehpi ih cui ttuanvo cu felfai te ih ttuan dingah in forhfial. Pathian ih covo a simi "a tha mi kan nuncan ziaza" cu amah Pathian kan peksal ding a si.
•  
• Kan Bible cun "mipi pawl an mang a bang" a ti. Hiti ih mipi an mang a bang nak cu "thu ra suttu pawl ttongding neinawnlo khop ih a rak sawn thiam'' milawng siloin lei tisa thu ihsin thlarau thu ih a hruailut ruang khalah a si.
•  
•  
• Milai cu Pathian ih hmuihmel keng ih sersiam kan si (Gen. 1:26), curuangah Pathian ih ta kan si. Asinan kan sinak thawi milhaw lo nun kan neih pang a si ahcun cui kan sinak cu kan hnen ihsin lak hlo a si ding.
• Curuangah Pathian ih hmuihmel keng na sinak, Pathian ih ta na sinak cu thei aw in Pathian hnenah siah pe aw.