Kan Rinsan mi hi Zoso a Si?

"Kan rinsan mi hi Zoso a si?" timi thu luu thawn Rev. Fr. Pius Cung ih thuthangtha sim mi (June 3, 2020 - Nithum Ni)

Siarding: 2Tim 1:1-3,6-12; Saam 123; Mk 12:18-27.

          Pathian mi le fa, zumtu u le nau pawl, Kan Bawipa Jesuh Krih ih zangfahnak, Pa Pathian ih duhdawtnak le Thlarau Thianghlim ih pawlkomnak cu nan zate parah a thar in thleng hram seh tiin thlaza ka cam. June thla ni 3, tlawngkaini 3, ih Bible kan siarmi 3 sung in, thu pa 3 kan ruat thlang pei uh. Kan thulu dingah “Kan rinsan mi hi zoso a si?’’ tin ka hril. Minung siseh, saram pawl khal siseh, ttihnak  le ral kan ton tikah humhim nak kan hawl theu. Rinsan ding pakhat khat kan pan.  Vokte aarte pawlkhi tihphannak an neih le vokpi, arrpi, an nu hnenah zamrang ten an tlan. An nu an rinsan ti a lang. Kan nauhak laiah minih in zomtai si le ka pa, ka u ka sim ding, kan rak ti theu. Nitin kan nunnak khal ah thuhla buaibainak a um cun khawtlang, zungsang le palik le cozah upadi pawl rinsan in humhimnak kan hawl theu. 

          Krihfa, zumtu pawlih kan rinsan dingmi teh zo so a si? Ziangruangah kan rinsan? timi hi, tuisun siarmi bible sungin kan zoh tlang pei uh. 2Tim 1: 12 ah “Ka rinsan mi hi zo a si ti ka theih ngah ih ruangah hnangam, lunghmuinak ka nei, Himte in amah in i kilkhawi ding tiah fiang tein ka thei” tiah, Paul in a ti. Tuisun siarmi Saam 123: 2 ah “Bawipa kan Pathian, nangmah lawng kan lo rinsan” ti kan siar. Himte ih in kil khawi tu ding hi: Pa Pathian, Fapa Pathian, Thiang thlarau Pathian, ‘Thumkom Pathian’ a si ti hi theifiang in hnangam u si, lunghmui tein um u si.. Ziangruangah kan rinsan tile rinsan a tlak ruangah asi. Ziangruangah rinsan a tlak tile Kumkhua a nungmi Pathian a si, Cahnak huham a nei ih, Duhdawttu Bawi a si. 

          (1) A nung Pathian a si. Thuthangtha Mk 12:26 sungih kan siarmi ah “Keimah cu Abraham ih Pathian, Isaak ih Pathian, Jacob ih Pathian ka si” titu a si thu Jesuh in in sim. Minung hin kan pa le kan pu tiang hi kan ciing ban ih, kan pu ih pa (Pusin) tiang cu kan ciing ban lo. Abraham ih  Pathian cu Abraham a thih hnu khal ah a nungmi Pathian a siih, Abraham ih fa Isaak san khalah, Isaak ih fa Jacob san khalah, a nung ringring tu Pathian a si tithu in sim duhnak a si. Tuini siarmi 2Tim 1:3 khal ah Paul in “Ka pu le ka pa ih an rak rianmi le thinlung thiangte ih ka rian vemi Pathian hnenah lungawi thu ka sim” a ti. Curuangah Paul khal in a pu le a pa sanih nung rero tu Pathian cu a tu a mai san khalah a nungmi Pathian a si tithu in simfiang a si. Kumkhua ih nung Pathian a si ruangah rinsan a tlak. Kan pumsa hrang thla2/1 le kum 2/1 nunnak ding hmanah siibawi pawl kan rin a  sisi. Kumkhua nunnak kan neihtheinak ding cun kumkhua ih nung Pathian rinsan tengteng a ttul. Leithlun fimnak, thiamnak, lennak, nomhnak a saang vivo ih Pathian rinsannak  a mal vivo, a tumsuk vivo titla hi ralring fimkhur tein thei usi. Pathian hnakin minung thilti theinak rinsan hi  a leng, a lar vivo. Eiin le dinhmun kan thangso vivo kan ti mihin  Pathian rinsanak, tihzahnak, thangthat theinak le Amah naih sinsin theinak lamah in hruai hram seh. Kumkhua nunnak hman in pektheitu Pathian cun Leipar kum 100 thluk nunnak khal in pek, in kilkhawi ih, in humhim ringring. Kumkhua ih nung Pathian cu, tuisan le nehhnu san hrang tiang, rinsan u si. 

          (2) Cahnak huham neitu Pathian a si. Tuini siarmi 2Tim1:7 ah Pathian ih pek mi Thlarau cu tihhrutnak  petu a silo cahnak huham petu thlarau a si tithu kan hmu. Minung in harnak, phannak kan ton tikah, kanmah hnak ih caksawn, thiam sawm, nei sawn, le thil tithei sawn pawl khi kan pan, kan rinsan theu asi. Lei le van sersiamtu; thaw a neimi hmuahhmuah ih nunnak hramthawhnak a situ; sun le zaan, ni le khua, caan hmuahmuah uk thluh tu Pathian ih huham cahnak cu rinsan a tlak hrimhrim. Setan khuavaang hi, cahnak, thiltitheinak, siatsuah theinak, huham tampi a nei. Kan minung sinak men in kan neh thei lo. Pathian ih cahnak, ThiangThlarau ih huham kan rinsan lawngah kan neh thei a si.  Kan tisa ih tuar theumi natnak, farahnak, zonzaih retheihnak, mitthli tlaknak le thihhlohnak pawl khal hi a har fualfo ko ee kan ti can a um theu. Thiangthlarau ih cahnak huham lo cun a har zet ko. Asinan Thiangthlarau ih cahnak huham nei ngahtu cun Paul thawn hmunkhat tein ‘ka hna a ngam, ka lung a hmui’ kan ti thei ding. Paul ih nunah harnak, dodalnak hremnak phun kim lakah a hna a ngam , alung a hmui, ziangriungah? A rinsan mi a thei fiang. Cahnak petu Thlarua thawngin neh tu kan si. Thiangthlarau ih pek mi cahnak huham dil u si, rinsan u si, hmang u si. Nehnak, lungawinak, hnangamnak kan ta a si.

          (3) Duhdawt tu Bawi a si. Thuthangtha sung ah, thihnu ah thawsalnak a umlo titu pawl ih Jesuh thu an suh nak kan hmu. ‘Mi pakhat in nupi a nei. A mah a thih hnu ah a nau le pawl in a sangsang in  cu nu cu an nu pi ah an thit. Thawhsal ni ah an u nau pa7 lak ah zobik ih nupi so a si ding’ an ti. Thawhsal a um lo, Nehhnu san, a um lo anti duhmi a si. Jesuh cun; “Mithi pawl an thawhsal tikah, vanmi bangtuk an si ding, tthitawk ti a um nawn lo ding” a ti. Nehhnusan, thawhsal can a um ko ti a zirh a si. Minung hi kan duhdawt awk tikah hmunkhat teih umtlang kan duh. Lamhla le hmundang ih tthenawk kan siang lo. Thuhla a phunphun ruangah, siangaw lo cing teih thenawk can a um, hmundang lamhla ih um a ttul can a thleng. Thih ttian rori ih tthenawk sinsin tla cu mitthli le ttahnak in kan khat. Ziangruangah kan tap ti le kan tthen siangaw lo, hmunkhat teih um kan duh. Kumkhua in duhdawt tu kan Pathian khal in ziangtik hmanah tthen in siang lo. A mah thawi um tlang ringring dingin in duh, khua in khan sak. In duhdawtnak in in sersiam, in duhdawt nakin fapa Jesuh in pek, in duhdawtnak in Thiangthlarau in pek, in duhdawtnak in kan umnak hmun lei le van, tuisan hrang le nehhnu san hrang in remsak, in duhdawtnak in, rundamnak, thawhsalnak le kumkhua nunnak in pek. Thawhsalnak a um ti in simfiangnak thawng in leipar ih kan duhdawtawk nak hi thihnak ruang in a cemral lo, nehhnu san tiang a hmun mi duhdawtnak a si ti in zirh. Leitlun can tawite kan nun sung hmanih hi tluk thukzet, naa zet in kan duhdawt aw cio ah cun, kan suah hlan le kan thih hnu tiangih, in tuah tu, in hmutu, in nei tu amah Pathian in ziangtluk in in duhdawtnak a thuk in a saang pei. Saam 136; ah “A duhdawtnak cu kumkhua in a hmun” ti hi vei 26 rori nolhbet rero in in sim. Kumkhua nunnak kan ngahnak dingah a duhdawtnak ti lo bak ziangsaw kan rinsan ding. Nitin kan nunnak khal ah in kilveng, lam in hruai in umpi kan timi pawl, khal hi in duhdawt tuk ruangah so khaw. Kumkhua  ih a hmun mi a duhdawtnak cu rinsan a tlak. Lei le van sersiam mi thil hmuahhmuah parah a duhdawtnak kut neh a lang. Jesuh ih in duhdawtnak khal a ke in a lu tiang, a kekkuai mi a taksa le a thinlung ah a lang. Thiangthlarau khal in, duhdawtnak in nunnakhthar, lungawinak le hnemnak, thazaang in pekih nitin lam in hruai. Bawipaih in duhdawtnak rinsan in hnangam te le lunghmuiten tlangleng usi, lungawi thu sim in, thangthat u si.

Kumkhua ih a Nung mi Pathian, kan lo rinsan a si. Amen

Kumkhua ih Cahnak Huham neitu Bawipa, kan lo rinsan a si. Amen.

Kumkhua ih a hmunmi Duhdawtnak neitu kan Bawipa, kan Pathian, kan lo rinsan a si. Amen