“Bawipa Na Duh Ahcun” 26 June 2020

Friday                                                                                                                   26 June 2020 

“Bawipa Na Duh Ahcun”

RVA Falam Service a ngaitu Bawi Khrih ah duhdawtmi nu le pa, u le nau pawl, Bawipa ih pek mi hnangam daihnak cu nan zate hnenah um ringring hram seh. Tuni  2020 June 26, Tlawngkai ninga ni ih kan siar ding mi Gospel thawn pehpar in thla kan cam tikah Pathian duhnak maw, kan mah duhnak hi a thupi sawn in kan ret timi kan ruat tlang ding in ka lo sawm. Kan siar dingmi Gospel cu Matthai 8:1-4 tiang a si ih, tlangpar ih thuzirhnak tiih kawh mi Matthai 5 -7 a ṭheh in Bawi Jesuh cu tlangpar ih sin a ṭum ih miphaar pakhat a dam ter nak thu asi. Pathian ṭongkam Gospel kan ngai ta hrih pei.

Mt 8:1-4,

1. Jesuh cu tlangpar ihsin a rung ṭum ih mitami in an thlun. 

2. Cule miphaar pakhat a hnenah a ra ih a hmaiah a khukbil in a kun ih, “Bawipa, na duh ahcun i damter thei a si,” tiah a ti.

3. Jesuh cun a hei dawh ih a tham hnuah, “Ka lo damter ding, atu ihsin thiang thlang aw,” tiah a ti. Hmakhat teah cupa cu a dam. 

4. Cule Jesuh in, “Ngai aw, hi thu hi zohman sim hlah; asinain puithiam hnenah va feh vurvo awla amah in rak lo zoh seh. Cun na dam zo a si, tiih mizapi theih dingah Moses thupekmi vekin thawinak va pe aw,” tiah a ti.

Bawipa ih Thuthangṭha a si.

      A hmaisa ah miphaar pa ih zangfah dilnak asilole a thlacamnak kan zoh hmai sa ta hrih pei. Pathian hnen ih  kan duh mi kan dil tik ah, thla kan cam tikah a thupi zet mi cu thinlung tang dornak le zumnak hi a si. Bawi Jesuh hnen ah damnak duh ih a pan tu pawl kan zoh tik ah zumnak le tangdornak thawn an pan ṭheu ti hi kan hmu ṭheu. Himi miphar pa tla cu Jesuh a zum ruangah a pan ih, tangdornak thawn a hmai ah khuk a bil in a kun ti kan hmu. Cumi lawng si lo in miphaar pa ih ṭongfang hi ka duh zet mi pakhat a si. Cumi cu ziang a si tile Bawipa na duh ahcun i dam ter thei a si a ti. Himi thu hi Marka le Luka sung khalah a um ih cu nah pawl ah cu, “na duh ahcun i thiang ter thei,” a ti. Miphaar pa a dam le a thiang zo ti cu a bang aw mi si ko ih. Hitawk ah a cuangce ih ka duh zet ka timi cu “Bawipa na duh ah cun” timi ṭong fang te hi a si. Siangbawi Ordination ka ngah lai khal ah “keimah duhnak vek si lo in nangmah duh nak vek siseh,” ti ih Bawi Jesuh ih a thlacamnak te kha ka motto ah ka hril asi. Ziangruangah tile keimah duhnak vek in ka feh le, keimah duhnak vek in thil a cang a si le thil ṭha lo tam pi a suak thei ti ka thei ih Bawipa ih duhnak hi a ṭha sawn ringring ti ka zum ruangah a si. Thla kan cam tik ah mah i duhnak lawng kha ruat si lo in Bawipa ih duhnak kha pakhat nak ah kan ret thei ding hi a thupi zet mi a si. Bawi Jesuh ih in zirhnak pawl khal ah kan zoh a si le Pathian duhnak kha pakhat nak ah ret ding ah in zirh ringring a si. Thlacamnak in zirh tik khalah “Vancung ih na duhnak a kim ban tuk in hi leitlun khal ah run kim ter aw,” tiah cam dingin in zirh. Cun a mah rori in Gesmani hmuan sungah a  Pa hnenah thla acam tikah a mah duhnak a sim hmaisa ih a net nak ah cu ‘keimah ih duhnak vek in si lo in nangmah ih duhnak vek in si ko seh” tiah a cem ter a si. Tuni kan siar mi Gospel sungih miphaar pa khal in “Bawipa, na duh ahcun i dam ter thei a si,” a ti. Kan nih in thla kan cam tikah le ziangziang kan tuah tik khalah Bawipa duhnak vek in si seh kan ti thei dingah a thupi zet mi cu: ka ruat mi, ka duh mi hnak in Bawipa duh mi a ṭha dueh, Bawipa duhnak hi a ṭhabik ti kan zum taktak cu a ṭul ding a si. Hiti ih ka ti tikah kan dil mi vek ih linglet in a cang ringring ding ti nak a si lo. Nangmah in na u nau pa hell ram ih a tlak lo ding na duhnak hnak in Pathian in na u nau pa hell ram ih a tlak lo ding kha a duh sawn a si. Mi sual pakhat sual sir ding na duh nak hnak in Pathian in a mah sual sir ding kha a duh sawn a si. Cu vek thotho in thil ṭha kan duh kan ruat mi pawl hnak in Pathian in ṭha sawn in a duh, a ruat a si. Himi pawl ṭha te in kan thei kan zum lawng ah “Bawipa na duh a si ah cun” kan ti thei ve ding asi. Bawipa in ‘dil uh’ in ti ruangah kan thiam tawk le kan thei tawk in cu dil ding ṭuanvo le a-khuinh-a-yi cu kan nei ve a si.

  Cun miphaar pa ih a dil vek in Bawi Jesuh khal in ka lo dam ter ding, ka lo thiangter duh a si, thiangthlang aw a ti ih a dam ta. Hitawk ah Bawi Jesuh ih thinlung le ruahnak thawn peh par in mal lai sim bet ka duh. Miphaar pa hnen ah ‘zo hman va sim hlah’ ati. Hiti ih a ti tikah thukham pek mi vek ih a simmi si lo in Jesuh in a thilṭha tuahmi, mangbangza a tuah mi kha tu san ih thilṭha kan tuah mi kan lang ter ṭheu mi vek kha a duh lo sawn ruangah a si. Ziangruangah tile mitam pi in thinglamtah phurin a mah thlun le a zirhmi pawl thlun hnak in mangbangza a tuah mi hmu duh le ngah duh ruangah a mah thlun an duh thei ruangah asi. Bawi Jesuh cuh mangbangza hmu duh le dam duh men ruang ih a mah thlun hnak in thinglamtah phur in le dingfelnak hawl in a mah thlun kha a duh sawn a si. Bawipa ih duhnak a hawl thiam tu le a thlun thei tu si thei dingin Bawipa in in thluasuah cio hram seh.

Fr. Peter Lal Zin Thang (Hakha Diocese)

https://bit.ly/2BKQ9dQ