Jesuh ih unau diktak

"Jesuh ih unau diktak" timi thuluu thawn Rev. Fr. Dominic Hnin ih thuthangtha sim mi

Caantluang zarh (16) nak, tlawngkai nihnih ni (July 21, 2020)

Siarding: Micah 7:14-15, 18-20; Ps. 85:2-8; Mt 12:46-50

• Tuisun kan siarmi thuthangttha ahcun Bawipa Jesuh thawi pehtlaih awk daan thu kan hmu.
• Himi Bible catlang cu Luke ih nganmi thuthangttha sung in kan siar zo ih kan dung 2019 kum September thla ni 24 ni ah tawkfang kan rel rero zo. Tuisun ah Bible siar hmaisa, Prophet Micah sung ta thawn ruat tlang hrih uhsi.
• Himi kan siarmi Micah cu thlacamnak a si ih Israel mi pawl Egypt ram ihsin an ra kir sal hnuah an rak neih cia le luah cia mi ram zate in co nawnloin malte lawng an co sal. Cumi caan ih Israel mi hrang ih thlacamnak a rak si.
• Israel cu Pathian ih miphun a si ih cui an peh tlaihawknak cu Tuurun le tuukhal dinhmun in a tar lang. Israel cu Pathian ih tuurun a si ih Pathian cu Israel miphun neitu le khaltu a si.
• Israel miphun cu an rak tthekdarh awk thluh ruangah hmunkhat ih finkhawm sal dingah thlacam a si. Curuangah "na miphun Israel cu khal sal aw" a ti.
• Tuukhalttha cun a tuurun cu tlimno umnak le tidai umnak ramttha ah a hruai ih a cawm. Cumi cu ruahsan in "na kianghrol thawn kilkhawi aw" ti kan hmu. An rak tlanlennak hmun, an khua le ram ttha a simi Bashan le Gilead ah hruailut sal ding in thla an cam.
• A miphun Israel pawl tlensuak dingah Egypt ram ah mangbangza phun zakip tuah in Israel pawl cu a rak hruai suak. Himi thil umtudaan pawl an zoh tikah "kan sual le kan mawh ruangah kan parah hivek thil a thleng" ti an thei ih an phuhrung awaw.
• Curuangah ngaidam an dil "na miphun pawl an sualnak ngaidamtu Pathian na si, na thin a heng khal le thincin nei loin, na duhdawtnak cu kumkhua in a hmun" an ti.
• Nitin kan nun ah a sia a ttha hmunton kan nei ringring. Attha kan hmuhton mi in Pathian hnenah lungawithu sim kan thiam maw? A tthalo kan ton mi ruangah sualsir in Pathian hnen lam pan hna teh kan thiam maw? "Kan sual kan palhnak cu Tifinriat tawne ah in retsak in, in hngilhsak aw la a kumkhua na duhdawtnak thawn cerhno le hramhring lak ah ii hruai kir sal aw" ti hna kan thiam a ttul.
•  
• A miphun parah zangfahnak nei in le a mipi ih au-aw thei in, kan Bawipa le kan Pathian cun tu-ah "Vancungram thuthangttha" thawn cawmih kaih hruai sal in tum. Curuangah amah Bawipa Jesuh rori khaw tin ram tin tlawng in mi zapi hnenah Vancung ram thuthangtha sim in le phuang in a um. Mipi in cui thuthangtha an zum, an pom le an thlun nak thawng in, rundam an si ding a duh.
• Cuti ih Thuthangqha a sim lai ah a nu le unau sungkhat pawl an ra. Minung kan sinak ah kan innsang, unau sungkhat hnak ih thupi an um lo ti theih a si. Culaiah kan Bawipa Jesu cu a nu le a unau pawl an ra ti thu an sim tik ah "zoso ka nu cu a si, ka naule pawl cu an si" a rak ti.
• Himi Jesuh ih nu le ulenau thu hi tuisun kan siarmi Thuthangtha lawng si lo-in Bible sung hmun dang Lk. 8:19-21; Mk. 3:31-35 khal ah kan hmu thei.
• Pathian thawi kan pehtlaih awknak hri, a hleice in a miphun kan sinak hri a langter. Cucu Pathian ih thu kan ngai ih kan thlunnak in a si. Pathian ii hrangah ziangvek pehtlaih awknak a thupi ti kan hmuh rualrual in Mary cu Jesuh ih hrangah ziangvek dinhmun ah a ding ti khal a lang. Mary cu lei tisa sinak le zumtu sinak in Jesuh ih nu a si ti a fiang.
•  
• Himi Thuthangtha kan siar tikah mi hrek khat cun "Jesu hmanin a mai suahnak nu rori, ka nu a ti lo" ti ih a sullam la tu an um. A hleice in kan Christian nun le zumnak ah Mary hi a thupi lo titu pawl in cutizawng in an pom duh deuh.
• Hi leilungmi pawl rundam ding ih Pathian ih khua a khan tikah minung sinak la in leilungmi vek in rat ding hi a rak hrilmi lamzin a si. Curuangah vancungmi Gabriel cu Nazareth khuami falahim, tleirawl Maria ih hnen ah athlah hmaisa ii Maria ih lungkimpinak a hawl hmaisa. Cuticun milai sinak la in Mary sung in nau a sem (Lk. 1:26-38) ih Bethlehem khua ah Jesuh cu a suak ti ah kan Bible cun in sim (Lk. 2:1-7). Himi tiangah Maria le Jesu ih pehtlaih awk nak cu buai ding a um lo. Jesu cu Maria ih hrinmi fa a si ruangah Maria cu Jesu ih nu a si.
•  
• Jesu ih relmi a nu, a unau le a sungkhat pawl cu Pathian thu a ngai ih a thluntu pawl an si a ti. Kan Bible sungah zohqhimtlak nutling thatha hmuh ding an tampi. Asinan Maria vek ih "Na duhnak vek in ka parah thleng ko seh" ti theitu an um lo. Bible leng ih santhuanthu khalin Maria hnakih Pathian tihzahtu simding le rel ding kan thei lo, kan nei lo.
• Jesu in "Pathian thu a ngai ih a thluntu" a ti mi ah Maria cu hmaisabik a si sawn. Jesu ih hrang ahcun Maria cu a khuah rori in a nu a si ti a lang fiang.
•  
• Minung mit ih zoh ahcun Jesuh in amah hringtu a nu rori theilo vek ih a rak um san men cu a nu a phatsan khi a bang, ziaza tthatlo hna a bang. Asinan, Jesuh cu Pathian asinak ah amah le amah a kalh aw thei lo. Mi famkim a si ih a nuncan ziaza khalah baaksamnak a nei lo. Tlaksamnak nei pang sehla cu mi famkim a si thei lo ding. Curuangah Jesuh in a suahnak a nui' parah "nautatnak, ziang ih rel lonak" tivek a nei thei lo.
• A si le, ziang ruangah Jesuh in "zo ha ka nu le ka unau pawl cu" tivek tong a hman? Jesuh ih hrangah hi lei tisa sinak ih pehtlaihawk nak hnak in Pathian thu ih pehtlaihawk hi a thupi deuh. Mi tampi cun Pathian ka zum, Christian ka si kan ti aw nan kan nun ah hmuh ding ziang hman a um lo. Jesuh in "Pathian thu a thei ih a tuahtu pawl" a ti. A theih le a zum lawng tawk lo in "tuah" a tul, kan nun ih a lang a tul.
•  
• Jesuh in "ka tuurual nan si lo ruangah nan zumlo; ka tuu pawl cun ka aw an ngai; keimah in ka thei hai ii annih in in thlun (Jn 10:26-27)" a ti.
•  
• Jesuh ih khalmi tuurun ih telve dingah, Jesuh thawi pehtlaihnak neimi a nu le ulenau si dingah a thu simmi ngai aw, zum aw la thlun