Hawlmi hnakih thasawn tongtu

“Hawlmi hnakih thasawn tongtu” (Thuthangtha sim tu - Rev. Fr. Pius Kei Lian Cung)

Jn 20:1-2,11-18

Bawi Krih ah duhdawtmi u le nau pawl, Kan Bawipa Jesuh ih hnangam daihnak nan parah a thar in thleng hram seh. July 22 cu Mithianghlim Mary Magdalene ih puaini a si ih, Magdalena hminnei tu pawl hnenah Happy feastday, ti in Puai nisunglawi cibai ka lo buk hai. Mary Magdalene sunlawihni ah, a maih nun ihsin kan cawn, kan lak dingmi thlarau rothil kan hlawmawk tlang ding ka duh. Magdalene ih Hawl mi hawl ve in, a ton mi khal tong thei ve ding in kan thinlung sangka ong cio u si. Kan thulu ah  “Hawlmi hnakih tha sawn tongtu” ti ka hril. Tui ni siarmi Jn 20:1-2,11-18, a tawinak in langhter ta kaduh. Khua a vang hrih lo, Mary Magdalene cu thlanah a feh. Thlankhar a ongaw cia in a hmu. Peter le Johan hnenah thu a than. Thlan lengah dingin a tap. Hmuan kiltu ih aruah mi Jesuh in “zoso na hawl?” tiah a sut. Jesuh in “Mary” tiah  ko. Mary in “Rabboni” tiah ako ve. Bawipa a hmuhnak thu le a hnenih a tongmi pawl cu dungthluntu pawl hnenah a va sim.   

 Mary Magdalene ih hawlmi pa (3)                                    

1)nak; damnak a hawl. Lk 8:2 ah khawsia pa(7) ih polh mi a si thu kan hmu. Khawsia ih polh ti mi cu zaangfak za le tihnung za zet a si. A lung fim can ah cun damnak ziangthluk in a duh pei. Unau sungkhat le khawpi pawl khal in a damcahnak ding an duhsak zet ding. Dam ka duh a ti theu ko ding, a kaa ih a tong suak lo hmanah, a nunnak hrimhrim in damnak a ttul ih, damnak a haal ti cu a fiang.                                                    

2)nak; Thuthangtha a hawl. Khawsia pa (7) cu Jesuh nih a dawitlan sak tikah Jesuh ih khualtlawnnak hmunza kipah, a tlun vivo. Jesuh ih zirhmi thuthangtha ngai hi nuam a ti ih, Jesuh ih tuahmi mangbangza damnak phunkim hmuh hi a lungawinak a si. Thuthangtha le Jesuhih thawmsunlawinak a hawl bet vingvo.                                     

3)nak; Jesuh ih ruak a hawl. Jesuh thinglamtah parih a thih lai khal a hmu tu, thlaan ih an phum lai khalah a tel tu Madalene cu khawvang hlan thimlak ah, Jesuh ruak a pan, thlankua  a lawngih a hmuh tikah kirsal men lo in Jesuh ruak a hawl, a sut hlam. Kiangkap khua a vangtha hrih lo, Magdalene ih thinlung khal beidong le thinpit in a thim. Lungkuai ih a ttahnak mitthli a mit sungah a khat, fiangte le hliahfel in zianghman a hmuthei lo. A thinlung le a mitthlam ih a cuang mi, a hawl rero mi le hmuh a tum mi cu; a pumpuluk ih thisen le thihnai thawi khathuh mi Jesuh ih ruak, a ke ih sin a luu tiang puanrang ih tuamthluh mi,  Jesuhih ruakluang a si.  “zoso na hawl” ti ih sut tu hi Jesuh a si ti hmakhat tei a theihthiam lo cu a mawh ve lo.               

Mary Magdalene ih ton mi pa (3)                                   

1)nak; Taksa, thinlung le Thlarau damnak a ngah; Khawsia ih polh mipawl, an harzia le ttih an nun zia Bible sungih kan hmuh mi cu, an mah le an mah lungto hriam thaw in an aat awaw, tisung le meialhsung tlaah an dawp, an paihaw mai, thirhri ih tem mi khal an botcat hluahhlomai ih thlanrop kuasung vekmen ah rawllo puanlo in an khawsa. Madalene polh tu khawsia sinsin tla cu pa (7) an si tikah ziangtluk in tih anung, zaangfak zazet a si. Jesuh nih khawsia a dawitlan sak hnu ah cun a thlarau, a thinlung le a taksa a dam ngah vuarvi a si. Natnak phunkhat damter vek mai kha a si loih, a sung, a leng, a thlarau le a pumpaluk ih dam ter a si ruangah a maiduh mi le midang ih an duhsak mi hnak ih tamsawn in damnak, thianhlimnak a ngah. Mi dang hnakin let(7) lenglo in a rak tuar ko nan, thluasuah khal midanghnakih let (7) lenglo in a co ngah ve.        

2)nak; Thutak le thunung Jesuh a tong ngah; Jesuh ih, simmi thuthangtha ngai in le Jesuh ih tuahmi mangbangza damnak phunkim zoh in Jesuh dung a rak thlun rero. Anetnak ah cun Jesuh Khrih a ruangpum hrim2 hi Pathian ih in pekmi laksawngthabik a si ti a hmu ngah. Jesuh thuhla theih le ngai lawngah alungasi men nawn lo, Jesuh ih ruangpum hrimhrim khal duhdawtnak le upatak thawn neih le co a duh. Farise pawl, le Judah mipi pawl in Jesuh ih thu zirhmi pawl le damnak a pek mi pawl hi, thutha le hna tuantha a si ti cu an cohlang ve ko. Asinain an palh an thelh mi cu Jesuh a ruangpum, a minung hrim2 hi Pathian fapa a si ti an pom thei lo. Cumi thu thup te cu dungthluntu pawl le zumtu pawl hnenah cun fiangten a phuang aw ih, Magdalene nih a co ngahmi laksawng  a si ve. “Na lak a siah cun na retnak i sim aw, ka feh dingih ka va la ding” tiih Magdalene ih tongkaa kan ruah tikah, Jesuh ih ruangpum ziangtluk in a duhdawt, a upat ti a lang. Liamhma le thi thawi khatthluh, thumen, tawtmen ding Jesuh ih ruak cu, ka la duh ka nei duh a ti thotho. Mi tampiih tihmi le fihmi, cu a duhdawtnak a tumtuk ruangah duhnungza in a hmu thei. Jesuh parih duhdawtnak tumzet neitu Magdalene, thluasuah cuanghleice co tlak hrim2 a si.

3)nak; A thosal mi, a nung Jesuh a tong ngah. Magdalene cu a thimi Jesuh ih ruak a hawl nain a thosal mi Jesuh nung a tong ngah. Jesuh in Magdalene hnenah ‘zoso na hawl?’ tiah a sut. Kan hawl rero mihi Ziang a si ti hnakin Zo a si tihi a thu pi sawn. A hawl rero mi, damnak siseh, thuthangtha siseh, Jesuh ih ruangpum khal siseh a tongngah ih, a hawl mi hnakih thasin “thosal Jesuh nung” khal a tong ngah bet a si. Bawipa a hmin thangthat si ko seh! Amen. Leipar ih nung, leidip ih sersiammi milai kan sisung cu leithilri ziangkim, sumpai, hlawnthil, inn lo, damcahnak le hnatuan le dinhmun phunphun hawl hrih ding, khawl hrih ding kan si ko. A sinan, Thlarau le taksa kopaw, minung kan si ruangah, kan thlarau ih a tul zet mi, Zo ti mi khal kan hawl tengteng a tul. “Ziang” hnak in “Zo” hawl thlang u si. Pathian fapa Jesuh cu minung sinak la ih lei parih a rat ruangah Zo timi cu a si. Jesuh in a mah le a mah khal ‘Minung fapa cu’ tiin voi tampi a ko aw theu. Curuangah kan hawl taktak dingmi ‘Zo’ timi cu Minung sitho Pathian sitho Jesuh Khih, rundam tu a si.  U le nau le nuh, Ziang timi kan hawlnak ah Zo timi kan hlo ter pang kei. Zo timi Jesuh tongngah tu cun ziang timi a dang hmuahhmauh khal pekcih kan si. 

Mary Magdalene ih:  *Lungkuai riahsiat nak mithli hmuahhmuah cu, lungawinak mithli ah a thleng aw aw. *A thin thanaunak, a beidongnak pawl cu, thuthangtha phuansuahnak thazaang thar ah a cang.  *Amah te lawng rualpi lo ih a um laiah, nunsungdaih kilkhawi tutha Bawi (Rabboni) a tong ngah. *Hmailam nunnak ziangtin ka pehbet ding ti ruahsannak apih, a thim thluh laifang ah, zirhtu, hruaitu Saya tha (Rabboni) a co ngah.                                                                                        *Ziang, timi mithi ruak a hawl nain, Zo timi a nung Jesuh a tong. *Jesuh thluntu a rak si nain, Jesuh ih thlahmi thuthangtha simtu ‘Evangelist’ hmaisabik  ah a cang.                                                                                                                                          *Khawsia pa(7) in a nun an rak siatsuah ko nain, let (7) hnak ih tam in Jesuh in sunlawinak a pek.  *Jesuh ih remhthei lo le hman thei lo tiangih, nunsiatral le sia pittawp, zohman kan umlo ti in zirh,   *Thihnak ihsin a thosal mi, kumkhua ih nung Jesuh tongngah tu cun, Mary Magdalene thawn hmunkhat in, kan hawlmi khal kan tongih kan hawlmi hnak ih tha sinsin khal tong bet tu kan si. “Mithiang Mary Magdalene, na hawlmi hawl in, na tonmi tong ngahtu kan si theinak dingah, Kanmaih hrangah thla in camsak aw, Amen. “Mithiang Mary Magdalene, thosal Jesuh ih thuthang tha phuangsuaktu kan si theivenak dingah, Kanmaih hrangah thla in camsak aw, Amen.