“Pathian ih duhdawtnak parih milai pawlih lehrulnak”

“Pathian ih duhdawtnak parih milai pawlih lehrulnak” timi thu luu thawn Rev. Fr. Joseph Ro Nei Thang ih thuthangtha sim mi (July 23, 2020)

Vanrang thuai ih ummi Bawi Khrih sungih duhdawt zetmi nu le pa, u le nau pawl, cak le dam in nan rak um cio hai maw? “Thlarau Thianghlim in nan za teih parah hnangamnak thlawsuah lo toih hram seh” tiah thlaza ka run lo cam sak hai. Tuihni cu 2020, July thla ni 23, Tlawngkai nilini asi. Kan siar dingmi Cathianghlim pawl tla cu Jeremiah 2:1-3, 7-8, 12-13 tiang pawl tla an si pei. Saam ahcun Ps 35:6-7, 8-9, 10-11 tiang pawl tla an si peiih Saam a sawnnak cu “Maw Bawipa, nangmah cu nunnak ih hramttohnak na si” tiah asi. Thu thangttha ihsin cun Mt 13:10-17 tiang pawl tla an si pei. Tuihni ih kan ruah khawm dingmi cu “Pathian ih duhdawtnak parih milai pawlih lehrulnak” tiah asi pei.

Tuihni ih kan siarmi Cathianghlim a voikhatnak Jeremiah 2:2-3 le 7-8 tiangah “Jerusalem khaw sungih ummi pawl, tleirawl na si laiah rinsantlak na si zia le kan tthit awk pekte ih i duh zia kha ka ciing ringring. Nelrawn lakah i thlun ih zohman ih thlawh dahlomi lo ram khalah i thlun. Maw Israel, nang cu keimah lawngih ta nasi. Ka neimi mi thianghlim nasi. Nangmah a lo tuahmawhtu parah cun harsatnak le siatsuahnak ka thlenter asi; Keimah Bawipa in ka sim zo. Cule ram tthazet sungah ram sung suakmi thil ttha le a rah pawl eitu dingah ka thlenpi hai. Asinain ka ram an siatsuah riangri. Ka pekmi ram cu an borhhlawhter asi. Ka puithiam pawl hmanin in thei nawnlo. An hotu pawlin in dodalih an prophet pawl khalin baal khawzing hminin thu an simih zianghman silomi milem an biak” tiah i ti. 

Pathian in amah rian ding, biak ding le thangtthat ringring dingah vancungmi pawl amah vekin thlarau taktak in a serhsiam. Cule Pathian in amah biak dingah le a serhsiammi minung pawlih rundamnak an ngah theinak dingah bawm dingin vancungmi pawl a serhsiam asi tiah Hebru 1:14 ah in zirh bet. Asinain cumi a serhsiammi vancungmi pawl lak ihsin Lucifer hohatnak thawn serhsiamtu Pathian kha an dodal ih Pathian lamah ttang ttha tu pawl cu Michael hohatnak thawngin acuih Pathian dotu pawl cu an do sal ve asi. Ral an sungih vancung ihsin hlonnak an tuar asi tiah Thuphuan 12 ah kan hmu thei. Ti duhnak cu Pathian in duhdawtnak thawn a serhsiam nain a serhsiammi vancungmi pawlin an dodal tinak asi. 

Cun lei dip sung ihsin amaih hmuihmel vekin milai a serhsiam asi. A cuih milai cu  Adam tiah kawh asiih a nupi dingah a hnakruh pakhat a lak sakih a nupi ah a cang asi. Kan thei ttul zetmi cu Pathian in vancungmi a serhsiam tikah siseh, milai a serhsiam tikah siseh, free will timi maih duhnak vekin thil ti theinak a pek asi. Adam le Eva te in tla Pathian ih duhnak thlun lo in sualforhtu Satan lamah an feh sawnih Pathian dodaltu ah an cang ve asi. Pathian in duhdawtnak le zaangfahnak thawn milai pawl a serhsiam nain milai pawlih rehrul kirmi cu Pathian ih huatmi sual borhhlawhnak asi. Asinain Pathian in milai pawl parah a hmunmi a duhdawtnak le zaangfahnak thawn a milai pawl nun sim dingah le Pathian an dungtunnak sualnak pawl kha tlansan in Pathian rinsan thiam dingin le Pathian ben thiam dingah a prophet pawl a run thlah hai. Cumi cu milai pawl thawn kan bang aw lo mi Pathian ih zaangfah lainatnak asi. Curuangah Saam 130:3 “Maw Bawipa, kan sualnak pawl na ciing ringring ahcun zo in so a tuar thei ding? Asinain Nang cun kan sualnak pawl in ngaidam” tiah kan hmu thei. Kan sualnak vekin Pathian in in cawhlo, kan sualnak vekin Pathian nih thu in tthen lo, a zaangfah lainatnak thawn in tuam hlawm sal, in rundam sal, in bawm salih thluasuahnak in run pek sal asi. Kanmah lam ihsin Pathian hnenah kir salin sual ngaidam dil ding le nuncan ziaza thleng ding kan si asi. Ezekiel 18:31-32 “Thil tthalo nan tuah ringring mi hi tlansan thlang uhla thinlung thar le ruahnak thar nei thlang uh. Zo hman nan thi ding cu ka duhlo. Nan sualnak sir uhla nung thlang uh” tiah cungnungbik Bawipa in a ti” tiah Pathian ih thinfualnak kan hmu thei. Tuihni ih kan siarmi Cathianghlim a voikhatnak ah tla Pathian in milai pawl ziang tlukin a duhdawt ti thu in theiter. Baptism kan ngah lai ih Pathian thawn kan kan pehzomnak cu a ciing ringring asi. Tuihni ih Bible ahcun “kan tthit awk lai ih kan duh awk zia cu ka ciing ringring asi” tiah asi. Kannih hrang ahcun cumi ni cu baptism kan ngah ni hi asi. Baptism kan ngah ni ah Satan le a hnattuan pawl ka tlansan zo kan ti ih Pathian pakhat Bawi pathum ka zum, cun Catholic Kohhran ih zirhmi hmuah hmuah ka zum kan ti ih baptism kan ngah asi. Cumi thukamnak pawl cu Pathian lungawitertu a rak si asi. Cumi cu a rei deuhdeuh tikah vun mang nawn lo in tuihni kan siarmi Jeremiah 2:7-8 ta vekin “ka ram an siatsuah riangri. Ka pekmi ram cu an borhhlawhter asi. Ka puithiam pawl hmanin in thei nawnlo. An hotu pawlin in dodalih an prophet pawl khalin baal khawzing hminin thu an simih zianghman a silomi milem an biak” tiah Pathian kan tlansannak/kan phatsannak pawl in sim asi. Asinain Pathian in in duhdawtih in zaangfah thotho ruangah amah thawn pehzom sal theinak dingin “Sual thlahnak sacrament” in run tuah sak asi. Cumi cu amah thawn pehzomnak kan nei sal theinak dingah asi. Pathian thawn kan pehzomnak a fek sinsin theinak dingah tla Bawipa ih thi le sa in run pek lala hi Pathian ih duhdawtnak a thuk zia le amak zia hi kan hmu thei/ kan tep thei asi u le nau pawl. Tuihni ih Saam a sawnnak ah “Maw Bawipa nangmah cu nunnak ih hramttohnak na si” tiah kan hmu thei. Kannih cu Jesuh Khrih ih thisen thawn leimi, man pek ih leimi kan si zo ruangah kanmah ta asi nawnlo. Kan nunnak cu kanmah ta a si nawnlo. Bawipa ih ta asi tiah tuihni saam ah kan hmu kha! Mah ih ta silo mi cu kan duhduh in kan tuah thei maw? Kan tuah ahcun kan nunnak a neitu Pathian cu a thin a heng lo ding maw? Hna kan nei ahcun thei thlang uhsi. Fel dingah zuam thlang uhsi. Cutin kan si lo ahcun tuihni Thuthang Ttha sung ta vekin “an ngai rero nain an thei theilo, an zoh rero nain an hmu theilo” timi cekci kan cang ding asi. Pathian ih thu siseh, a duhdawtnak siseh kan thei thei, kan hmu thei, kan tep thei hi ziang tlukin so lungawi ding a um? Kan hmumi, kan tepmi, kan theimi pawl cu khuahlan lai ih Prophet pawl le miding pawlin an tep ngahlo, an hmu ngahlo, an thei ngahlo. Minung in “Bawipa, kan duhdawt kan ti ahcun a thukham kan thlun a ttul tinak asi” tiah 1Jn 5:3 ah in run zirh. Amah Pathian kan duhdawt ahcun milai pawl hmuahhmuah kan duhdawt pei ih a serhsiammi hmuahhmuah tla ttha tein kilkhawi ding kan si asi.

Nan zateih parah Pathian ih a hmunmi duhdawtnak cu um ringring hram seh. Amen.