Duhdawtnak Lo Cun (sim tu - Rev. Fr. Peter Zin)

“Duhdawtnak Lo Cun”

Sim tu - Rev. Fr. Peter Zin (21 August 2020 - Friday)

Thuthangṭha a ngaitu Bawi Khrih ah duhdawtmi nu le pa, u le nau pawl, Bawipa ih pek mi hnangam daihnak le ruangpum, thlarau harhdamnak pawl cu nan zate hnenah um hram seh. Tuni August 21, 2020 (Tlawngkai ninga) ni ih kan siar ding mi Gospel thawn pehpar in “duhdawtnak lo cun” timi thulu thawn thlarau thazang kan lak tlang ding in ka lo sawm. Tuni kan siar ding mi Gospel cu Mt 22: 34-40 tiang a si. Thawhsalnak a zum lo tu Saddusi mi hrekkhat in Bawi Jesuh hnenah an ra ih thawhsalnak thu thawn pehpar in thu an sut ih Bawi Jesuh a sim fiang tikah Saddusi mi pawl cu ṭong ding thei nawn lo in an um. Cu mikha Farasi pawlin an theih tikah Bawi Jesuh hnenah an pan ve ih thu pakhat an sut ve. Tuni in kan siar ding mi Gospel cu cumi Farasi pawl ih an thu sut mi le Bawi Jesuh in a let sal mi kha a si.

An thu sut mi cu “Daan sungah khui thukham so a tum bik?” ti a si. Zangruangah an sut ti sile Bawi Jesuh kha a sual hawl an duh ruangah a si. An thusuhmi kan zoh a zoh a sile ziang hman thubuainak a suak thei lem lo ding tin kan hmu men thei. Asinan cu lai ih Jew miphun pawl ih thu hla le ruahnak kan zoh a si le khui mi thukham si a tumbik tihi sim ding a har zet. Jew pawl in thukham 600 tlun an nei ih khui mi si a thupibik asilole khui mi si a tumbik tiih zo hman in an sim ngam lo mi a si. Cumi zo hman ih an sim ngam lo mi kha Bawi Jesuh sual an hawl duh ruangah an sut nak a si. 

Bawi Jesuh cu mi in thu an sut tikah a ṭhabik in a let thei ringring tu a si vek in himi thusuhnak khal ah a ṭhabik in an thusuh a let sak a si. Bawi Jesuh ih a sim mi thukam lak ih a tumbik cu kan theiṭheu a si vekin, a pakhatnak ah, “Bawipa na Pathian cu na thinlung zate, na nunnak zate le na ruahnak zate in na duhdawt pei,” ti asi ih, a pahnihnak ah cu, “Na innhnen kha nangmah na duhdawt awk vekin na duhdawt ve pei,” ti hi a si. Hitin Pathian kha a pakhatnak ah retin le duhdawtnak nei dingin a sim tik ah a sualnak hawl duhtu pawl khal in ziang hman an ti thei nawn lo ih a sim mi ah an lung an kim pi asi.

Himi cu tuni kan siar mi Gospel ih a thuanthu ti si la, himi thu thawn pehpar in kan ruat tlang ding le thazang kan lak tlang ding ka duhmi thu lam ah kan feh hrih pei. Thukham kan ti tikah duh le tuah, duh lole tuah lo tivek hi angah lo ih tuah tengteng a ṭul ih hril ding dang a um lo mi a si. Pathian le milai duhdawtnak hi a tumbik,  thupibik mi a si ih, a dang ziangdang hnak in pakhatnak ah kan ret ṭul mi a si. Leitlun thilri le ziangdang cu um hrih sehla, a mah Pathian thu hla lam lala in kan zoh hrih pei. Kanmah khrihfa lak ah kan zumnak a bang lo mi tampi a um ih cu mi lakah pakhat cu zumnak kan nei le a tawk timi le zumnak lawng a tawk hrih lo, a fam kim hrih lo timi asi. Tuni kan siar mi Gospel zoh in a hmai sabikah pakhat kan ruat tlang ding ka duh mi cu, zumnak lawng a tawk, zumnak a thupibik a sile ziangruangah Pathian in thukham lakih a thupibik ah “Zumnak” a ret lo si pei ti hi ruat ding a um. Ziangruangah na thinlung zaten, na ruahnak zaten na zum ding a ti lo? Zumnak le duhdawtnak hi ṭhen thei lo mi thil pahnih asi. Asinan an bawng aw lo. 1 Kor 13:13 ah, “Atu ahcun a hmun ringringmi thil pathum an um ih zumnak, ruahsannak le duhdawtnak an si; himi lakah a tum bikmi cu duhdawtnak a si,” ati. Hitawk ah zumnak hnak in duhdawtnak hi a tum sawn, a sangsawn tihi fiang te in kan hmu kan thei thei a si. Pathian a duhdawttu cun zumnak hi a nei, khat lamah kan zoh asile mi pakhat in zumnak a nei nan duhdawtnak a nei lo khal a si thei. Thuṭhimnak in veikhat cu ka sim dah zo ih, ziang asi ti sile ‘duhdawtnak cu inn ṭha zet pakhat asile zumnak cu cumi inn pi ih foundation a si.’ Inn ṭha pakhat kan timi in foundation ṭha zet a nei a si. Asinan foundation lawng sak ih inn sak thei lo ti vek khal kan hum dah ṭheu ding. Zumnak lawng a tawk a ti tu cu foundation ka sak le a tawk ti tu thawn a bang asi. Duhdawtnak a nei tu cu foundation tlun ah inn tla a sak tu vek a si. Pathian in foundation lawng tuah ding, nei ding in duh sak lo ih innpi khal nei dingah in duh sak a si.

Duhdawtnak nei tu si dingah teh ziang kan ṭul lala ti si le, 1 Johan 2:3-4 _ “Pathian thupek kan thlun ahcun amah a theitu kan si, ti a fiang asi.  Mi pakhatkhat in Pathain ka thei tiah ati nain a thupek a thlun lo ahcun thuphanper a si ih a sungah thutak a um lo,” a ti si. Pathian ka thei vun ti ih thukham thlun a tul lo a ti tu cu Bible in thuphanper a ti. Cun Jn 14:15 ah, “Keimah in duhdawt ah cun ka thukham pawl nan thlun ding,” a ti asi. Curuangah tuni ih kan siarmi Pathian duhdawt ding le innhnen duhdawt ding ti hi thukham kan thlun ṭul tinak hi a si. Thukham thlun kan timi khal ih tuahnak timi tel lo in thukham thlun a theih lo lala fawn. Curuangah kan nih in zumnak lawng a tawk lo ih tuahnak khal a ṭul kan ti ṭheu nak a si. Kan theih ringring mi Jeim 2:17 khal ah “tuahnak a tel lo ahcun zumnak cu a thi a si,” a ti.

Bawi Khrih ah duhdawtmi nu le pa u le nau pawl, kan rundamnak hrangah teh thukham lakih a thupi bikmi duhdawtnak a tel lo cun a cang thei pei maw? Jesuh Khrih kan duhdawtnak cu a thukham kan thlunnak lawngin lang ter theih le a famkim thei mi a si. Duhdawtnak lo cun kan zumnak hi a lak ah a cang pang ding. Foundation a si mi Zumnak fek nei in inn mawi le inn ṭha zet a si mi duhdawtnak nei thei ding in zuam ringring um si.

Fr. Peter Lal Zin Thang (Hakha Diocese)