Daan ih hmui hmel cu Zangfah nak (August 25, 2020)

Daan ih hmuihmel cu "zangfahnak" (Simtu - Rev. Fr. Dominic Hnin)

Caantluang zarh kulhluan khat nak, tlawngkai nihnih ni (August 25, 2020)

Siarding: 2Thess 2:1-3, 14-17; Ps. 96:10-13; Mt 23:23-26

• Tuisun kan siarmi Thuthangttha ah kan Bawipa Jesuh in daan thiam pawl le Pharisee pawl cu a cam siat. A cam siat kan ti tikah "an par ah thil thu sia thleng seh" ti ih cam siat si lo-in anmah pawl ih an nuncan ziaza le um tu daan ruangah thluasuah an ngah lo ding ti thu - an sinak cu an sinak vek in- a pho lang a si sawn.

• Ziang ruangah a camsiat ti a si le annih daanthiam pawl le Pharisee pawl cun thil thupi cu ngaisak lo-in thil tenau tu sawn kha thupizet vek in an thlun ruangah a si.

• Bible hlun sung kan zoh asile, "Kum tinte nan Lo le nan hmuan in a suakmi rawl sungin tthenhra ih tthenkhat cu a dang tein nan ret pei." (Deut 14:22) ti ih kan hmuh vekin; "Nan lo ihsin a suakmi rawl le thingrah sungin tthenhra tthenkhat cu Bawipa ih ta a si. Bawipa ih hrangah a thianghlimmi a si. (Lev 27:30)" tiah kan hmu. Cu ruangah Lei sung suak thairah pawl sungin tthenhra tthen ih tthenkhat cu Bawipa hnenih pek ding a si.

• Asinan daanthiam pawl le hruaitu pawl cu luar ah kai in a fatebik thlaihnah tiang ih pek ttul in an zirh. Cule thil thupi deuh lam cu an mit an sin san, an dung an tun san.

• Bawipa in a mawhthluk tikah himi thil fate tiangih tthenhra tthenkhat an pekmi ruangah a mawh thluk lo, thil picang le thil thupi sawn tu ih an daitlan ruangah a mawh thluk a si.

•  

• Lev 11: 4 ah "Kalauk, tlang zubui le sabek pawl cu nan ei lo pei, ketin tek an nei lo" a ti. Cun Lev. 11:41-45 sungah "lei parih a vak murhmi mi ramsa, a pum leilung rawt ih a vakmi siseh, keli ih a vakmi le ke tampi a neimi siseh nan ei hrimhrim lo pei." a ti.

• "Nan inmi tidai sungih thothe le thilnung fate cu nan hap, asinan Kalauk riangri nan dolh fawn" tiah a ti.

• Himi kan zohkawm tikah Daan ih khammi ciocio ah mit hmuh thamlo thil fate ahcun an ralringzet a bang na-in mit hmuh theih, langhnan mi thil thupi ahcun daan buar hi an poi sa lo. Cumi ci Bawipa in a mawh thluk. Thil fate ih rin an um vek in thil thupi khal ah rin um si dingah a fial.

•  

• Daan thlun kan ti tikah cui daan an ngandan a canfang hnak in cui daan ih a sung muril, a ti duhsan khal thlun ding a thupi sawn.

• Daan cu minung bawmtu ding ah tuah a si ih dawnkhamtu dingah hmuitin a si lo. Curuangah kan Bible hlun khalah siseh, Bible thar khalah siseh daan thlun ih me-ur thawinak hnak in zangfah lainatnak thinlung ka duh deuh ti ah kan hmu.

•  

• Zachariah 7:9 ah "Khuahlan ah hi thukham pawl cu ka minung hnenah k arak pek: Ding te-in thu nan rel pei ih pakhat le pakhaat parah zangfahnak le lainatnaak nan nei pei." a rak ti.

• Cun Micah 6: 8 khalah "Bawipa amah in a tthami le tuahter in duhmi cu 'a dingmi tuah le zangfahnak tlaihsan le tangdorte in Pathian thawn feh tlang khi a si." a ti. Daan thlun cu Pathian thawi in naihtertu a si.

• Himi pawl kan zoh tikah "daan kan thlun" kan ti rero mi ah midang parih nekrawknak thinlung kan neih ahcun Pathian lam ah in hruailut thei pei maw, Pathian thawn in naihniam awter thei pei maw? daan kan thlunmi cu a tthahnem pei maw? Amah Bawipa in "mei-ur thawinak hnak in zaangfahnak ka duh (Hosea 6:6; Mt. 9:13; 12:7)" a timi kha thei uhsi.

•  

• Daanthiam pawl le Pharisee pawl ih lungput langter sinsin dingah mawhthluknak dang a tuah bet. Cumi cu an khukheng kholh thu ah a si. A pawnleng langnak cu fai te in an kholh na'n a sunglam, ei le in thawi a dai awknak lam tu cu kholh fai ti a um lo. Hitawk zawn ciah ah, daanthiam pawl le Pharisee pawl cu himi khukheng thawn nan bang aw ti ah a ti. Midang ih rak zohnak le hmuhnak ahcun thiangfaizet an bang, ziangah ti le midang ih hmuh theinak a pawn leng cu kholh fai a si. Hmanseh, an sunglam thu ahcun ningsinza le fihnung za an si, ten an um.

•  

• Khat lamah hivek ih a fatebik an thlun vek in a tumbik khal thlun a ttul ti ih a simnak thawng in Daan cauk - Torah - sung ih um daan hmuahhmuah cu thlun thluh ding a si. Amah lawngte, daanthiam pawl ih an zirh vek si lo-in amah Bawipa ih zirh vek ih thlun ding a si sawn.

• Bawipa cun Mt 5:17-20 "Moses ih daan pawl le Prophet pawl ih zirhmi pawl siatsuah dingah ka ra lo, kimter dingah ka ra sawn. Hihi cing ringring uh: Lei le Van a um sung cu Daan sungih daanterek bik pakhat hman a hlo lo ding, ziang hmuahhmuah a kim ttheh hlan cu pakhat te hman a hlo lo ding." a ti.

•  

• Zangfah lainaatnak tello ih daan thluntu kan si pang ahcun Bawipa ih mawhthlukmi ah kan tel pang thei. Mawhthluk mi si lo nak dingah, minung sawmdawltu dingah daan thlun zuam uhsi, thinlung tak le kan nuncan ziaza ah zangfah lainatnak neitu si zuam uhsi. Midang liang parah phurit phurter lo-in zangfah lainatnak thawi an phurrit sawngtu si zuam uhsi.