Duhdawtnak a si (sim tu - Rev. Fr. Pius Cung)

“A hmun ringring mi thil pa (3)”

Sim tu - Rev. Fr. Pius Cung (September 16, 2020)

Siarding: 1Cor 12:31-13:13/ Saam 33/ Lk 7:31-35. 

            Tuisunni tiang nunnak le cantha in petu Bawipa a hmin thangthat si ko seh, Amen. Leitlun pek mi si lo Jesuh ih pek mi hnangam daihnak, Thuthangtha ngaitu nan zate par ah a thar in thleng hram seh.  Sep 16 ni ih Bible cathiang siarmi 1Cor 13:13, ih, “A hmun ringring mi thil pathum an um ih zumnak, ruahsannak le duhdawtnak an si; himi lak ah a tumbik mi cu duhdawtnak a si” timi thuhi ruat khawm tlang u si.

             Thlarau thulam sim hrih loin, lei tisa nunnak men hmanah zumnak, ruahsannak le duhdawtnak cu kan neih ringring mi le kan hman ringring mi a si. Thuthimnak ah ruah a sur ding ti kan zumih vainim kan tuh, a vuiding, a pum ding, fang an nei ding timi ruahsan nak tumpi thawn kan thlo, kan vur. Vainimpum le rawl thar sungkimten duhdawt aw zet in ka ei tlang. Nufa le unau sungkhat duhdawtnak ruangah bangzet in hna kan tuan. Sumpai sinpi deuh cun kan nuam in, kan cangkang deuh ding ti ruahsannak, le zumnak khal kan nei. Duhdawtnak, zumnak le ruahsannak cu then theih lo in, an kop aw tlang ringring. Kan thlarau hrang tla ah cun zumnak, ruahsannak le duhdawtnak cu a thupi sisin. Ziangruangah a thupi tuk ti le kumkhua ih hmun ringring ding mi an si ruangah a si. 

1. Zumnak: Pa Pathian, Fapa Pathian Jesuh Krih, le Thiangthlarau Pathian ih pumkhat sinak le hnatuan tlangnak cu kan zumnak hrampi a si. Cun Catholic Pawlpi ih thuzirh mi pawl khal kan zum a si. Ziangruanah ti le Pathian in hna a tuan tik ah minung a hmang theu ti cu thukam hlun le thar, kan Bible sungah tampi kan hmu. Jesuh khri khal in a dungthlun tu pawl 12 hmang in Pawlpi hram a din a si. Sancem tiang hmunding khal in thu a kamta a si. Cu ruangah Catholic Pawlpi ih thuzirhnak cu Thiangthlarau ih umpinak thawn Pathian ih in zirhmi a si ih a dik, a hman, zum tlak le zumh rori dingmi a si. Kan zumnak cu, a za teih a thiamtu thlacamnak  sungih zumnak hrampi 12, le zumnak thla camnak sungah fiangte le famkim zet in kan hmu. Catholic krifa pakhat kan si cun zumnak hrampi 12 thlacamnak le zumnak thlacamnak cu cauk zohlo rori ih kan siar, kan sim thei rori a tul. Midang ih Catholic zumnak in suh khal a si le a hmaisa bik ih kan sim dingmi cu zumnak hrampi 12 hi a si. Baptism, tikholhnak kan ngah lai ih zumnak kan phuanlangh lai khalah himi 12 a tel thluh. Curuangah zumnak hrampi 12 hi, thlacam ih cam in simaw, tongfang le thu rel ih rel in simaw kan ngah, kan thiam tengteng dingah a thupi tuk.

2. Ruahsannak: leitlun tisa hrangih ruahsannak thawi kan nun bangtuk in thlarau lam khal ah ruahsannak tumpi le tampi kan neih a tul. Ruahsannak thlacamnak sungah thu pahnih in zirh. Leithlun kan nun sung ah Bawipa ih zangfahnak ka co ringring ding ti le leitlun kan nun a cem tik khal ah kumkhua nunnuamnak ka ngah ding ti mi a si. Pathian theilo tu pawl an beidong le an thinpih can hmanah zumtu pawl cu ruahsannak tum pi nei ringring tu ding kan si. Ziangruang ah ti le, in sersiam tu le kan nunnak a nei tu, thaw in pe tu kan Pathian cu, vate le saram phunkim khal rawl khop in a cawm ih thingkung, hrampi khal mawi zet le hmuizet in a kilkhawi. A mai hmuisam keng, a kutsuak a fa le kan hrangah uimi a nei lo, supmi a nei lo. Tisa hrang maw thlarau hrang maw ziangbik ha kan tul.  Bawipa in in zoh men lo. Harnak le vansan pittawp tlungko seh, Bawpa ih bawmban lo ding tiang in kan hla lo, in bawmthei lo ding tiang in kan phur a rit lo. In bawmthiam lo ding tiang khal in kannunnak a hnok thluh lo a harluan lo. Saam 23:6, ka nunsung hmuahhmuah ah, thatnak le duhdawtnak cun i thlun ringringding. Bawipa ih inn ah kumkhua in ka um ding in ti. Kan umnak ding leilungpi sersiamtu kan Pathian cu, kan umnakding inn khan rem ding in vancung ah a kai. Curuangah leithlun kan nunnak hrang siseh nehhnu san kan thlarau nunanak ding hrang khal siseh, ziangziangkim ah ruahsannak tumpi le ruahsannak nung nei ringring u si.

3. Duhdawtnak: zumnak le ruahsannak cu duhdawtnak parah a hmun, an thum aw. Duahdawtnak hi a hrampi bik a si. Duhdawtnak a um a si le zumnak le ruahsannak khal a fek vivo. Zumnak mal pawl le ruahsannak malpawl, ol tete ih beidong thin harmai le biaknak lam ih vaivuan hlotlau mai pawl cu duhdawtnak fek ten  a nei lo tinak a si. Jesuh krih le a thu le hla duhdawtzet phawt hi cun zumnak le ruahsannak cu a thang, a karh, a par vivo si mai. Pathian duhdawtnak le innhnen duhdawtnak cu thukham famkim nak a si ti khal Jesuh nih in zirh. Leitlun tisa lamih duhdawtnak co le pek kan duh, kan thiam vek in kan Bawipa kan Pathian hnen khal ah kan duhdawtnak hi tampin, napin langter sin u si. Kaa men ih duhdawt si lo in tuannak le nun zia in langter sin u si. 

            Paul nih “himi lak ah a tumbik mi cu duhdawtnak a si” a ti. Vancung kan thlen tikah kan zum rero mi thumkom Pathian cu kan tong kan hmu ding, kan ruahsan mi sankhuk nunnak khal ka co dingih duhdawtnak cu Pathian le kan lakah a nung ringring ding, a fek sinsin ding. Kan zumnak le kan ruahsannak cu a famkimnak kan co ding ih duhdawtnak cu a pehzom vivo bet ding. Tuini thuthanghtha Lk 7:31-35 ah, zumhtlak kan si lo zia, duhdawtnak kan neih lo zia a lang. Jesuh ih ruahsannak khal famkim ter thei lo lawnglawng kan si thu kan hmu. Raulpi pawl nih lungawi hla sak khal ih lam duh lo le riahsiatnak hla sak khal ih tap duh lo pawl, Jesuh san khalah an rak tam ih kan san khal ah cu vek thotho. Nang le kei kan tel lo ding a thupi tuk. Duhdawtnak a nei tu cun mi ih lungawinakah a lungawipi ih, mi ih tahnak ah a riahsiat pi ve. Tipil petu Johan dodal pawl cun Jesuh khri khal an hnong thotho. Ziang tivek zawngkhal ih nunsim theihlo, remh theih lo an rak si. Kan zumnak le ruahsan nak a fek, a karh sin theinak ding hi midang le thudang puhmawh rero a tul lo. Bible ca thiam le zirhtu tha le cabu tha tengteng a tul hran lo.  Duhdawtnak tumpi neih cun a dang khal a thanglian ter theh mai. Kan zumnak le ruahsannak thanglian ter in Bawipa kan duhdawtnak hi thuk vivo, na vivo hramseh. Bawipa kan duh dawtnak ruang in kanzumnak le kan ruahsannak khal hnetkhoh thei sin vivo hramseh. 

            “A hmun ringring mi thil pathum an um ih zumnak, ruahsannak le duhdawtnak an si; himi lak ah a tumbik mi cu duhdawtnak a si” Amen.