A zangfahnak theithiam lo cun duhdawt a har (sim tu - Rev Fr David Kap Cin Mang)

A zangfahnak theithiam lo cun duhdawt a har (sim tu - Rev Fr David Kap Cin Mang),

September 17, 2020

RVA ihsin thuthangtha a rak ngaitu duhdawtmi nulepa ulenau pawl nan zaten nan umnak hmun cio ah kan Bawipaih umpinak thawngin hnangam daihnak le thatlonak phunkim lak ihsin humhimnak co hram uh law tiah thlaza ka run lo cam sak hai a si. Tui tum ih kan Myanmar ram sungih a voihnihnak a hrangmi Covid-19 natnak ih si khal in kan luat cio thei nak dingah ralrinnak thawn thlacam tlang ding khal in ka run lo sawm hai a si.

Tuini September 17 hrangih a voikhatnak ih kan siar mi Cathianghlim cu 1Kor 15:1-11 sungta a si ih Paul in Korin khuami pawl hnen ih a thuthangtha phuan mi fek teih kaihnget dingih ralrin peknak thu a si. Himi Paul ih cakuat kan siar mi sungin ka duh zet mi cu verses 3-4 sungta a si: “Ka pom ngahmi atu nan hnenah a thupi bik tiah ka phuan sinmi cu hitiin a si: Ca Thianghlim sungih nganmi vekin Khrih cu kan sualnak ruangah a thi; an phum ih, Ca Thianghlim sungih nganmi vekin, ni thumnak ah thawhtersal a si” ti’n Paul in a thupi tiih a phuan sinmi thuthangtha thuhla a rel. Cumi cu ziang dang si loin, Ca Thianghlim sungih nganmi vekin kan Bawipa cu kan sualnak ruangah a thi ih a thosal timi kha a si ta mai.

Thuthangtha lak ih thupi bik cu kan Bawipaih thihnak le thawhsalnak thu a si. Cule amah Paul thotho in 1Kor 11:26 sungah “Hi sang nan ei tin le hi hai nan in tinte Bawipa a ra kir lai hlan lo a thihnak thu nan phuang tinak a si” tiah kan Bawipaih thihnak phuan daan hi fiang zet in a rak sim fiang. Himi ruangah Pawlpi cun kan Bawipaih thihnak le thawhsalnak cu Missa raithawinak thawngin phuan a si ti’n a pom ih nitin Missa sumnak a tuah mi a si. Himi Bawipaih thi le sa thawinak umlo nak ah cun Paul ih thuthangtha lakih a thupi bik a timi hi famkim teih phuan a theih ngaingai pei maw timi tla hi kan ruah ding ah a thupi nasa. Kan ka hmangin Bawipaih thihnak le thawhsalnak thu naal zet ih kan phuan thiam lo hman ah Bawipaih thi le sa thawinak ah tel in Amah thawn pawlkomawknak kan neih tinte’n a thihnak le thawhsalnak thu phuang ve rero mi kan+ si ti khal thei aw in lungawi hna le thazang lak hna thiam dingin ka run lo sawm hai bet a si.

Tuini Gospel kan siarmi Lk 7:36-50 sungah Farasi mi pakhat a simi Simon in kan Bawipa rawl ei a sawm tikih a inn ih a cang mi thil thuhla kan thei. Himi Simon ih inn ih a cang mi thil thawngin Ca Thianghlim ngantu ih a lang ter duh mi cu sual ngaidamnak le duhdawtnak ih pehtlaih awknak a si bik. Simon ih inn ah kan Bawipa a thleng timi a theih veten nunau sual pakhat cu kan Bawipa ih kehram ah ra in a tap; a mitthli cu kan Bawipa ih ke par ih a for tikah a sam rori thawn a hnawt hul hnuah a hnam ih a rak ken mi zihmui a toih ti a si. Cumi a hmuh tikah inntek a simi Simon cun “Hipa hi prophet taktak a si ahcun a tham rero tu nunau hi zo a si ti a thei dingih ziang vek nuncan sual in a nung ti khal a thei ding” ti’n a thinlung tein a rak ruat. Himi kan zoh tikah kan Bawipa in misual pakhat a cohlan ruangah inntek a simi Simon in kan Bawipa parah zumhlelnak a nei ti a fiang.

Amah khal Farasi pakhat a si ve ruangah kan Bawipaih hrangah cun mitkem za zet a si nan, rawl ei a sawm tikah kan Bawipa in a el men lo; ziangruangah tile, kan Bawipa cun mi zo vek khal a duhdawtnak thawn in tuam thei theh a si. Cumi a theithiam lo tu cun, kan zumnak khal a mal ih a zangfahnak kan hmuh thiam lo tikah a duhdawt thul hna khal kan thiam ve lo. Hitawk zawn ah Bishop Fulton Sheen ih capoh sainak ih a rak sim dah mi run lo hlawm ve ka duh. “Simon in a thinlung te’n ‘hipa hi prophet taktak si sehla cu hi nunau nu hi zo vek nunau a si thei ding nan’ ti ih a ruah ruangah amah in teh khai nunau nu kha ziangtin a rak thei si pei ti ka ruat nasa” a rak ti dah. Simon ih a rak theih hngilh mi cu amah khal mi famkim le mi thianghlim a si ve lo nan, kan Bawipa in a cohlang thotho timi te hi a si.

Kan Bawipa cun Simon ih thinlung sungih ummi a hmuh ruangah “Tangka sawmnga cawitu le zanga cawitu an pahnih in a coihtu in a olh tikah zo in a duhdawt deuh ding?” ti’n a polh ih Simon in tam deuh olh mi in a duhdawt deuh ding ka zum a ti tikah kan Bawipa cun “na ruah mi hi a dik a si” a rak ti. Cule, nunau nu lamah hoi in ‘Hi nunau nu hi na hmu maw? Nang cun ka ke kholhnak ah tidai I pe lo, asinain hi nu in ka ke cu a mitthli in a kholh ih a sam in a hnawt hul a si. Nang cun hnamnak in I rak hmuak lo, asinain hi nu cun ka ra thlen ve tein cat lo in ka ke a hnam a si. Nang cun ka lu ih culh dingah alif hriak I pe lo, asinai  anih cun ka ke hi zihmui in a toih a si. Ka lo sim: a mi duhdawtnak tumpi a langtermi hin a sualnak tampi cu ngaithiam a si zo ti kha a langter a si. Sikhalsehla a sualnak malte lawng ngaithiam a simi cun duhdawtnak malte lawng a langter ve a si” tiah Simon hnen ah a rak sim.

Kan Bawipaih tong kan zoh tikah Simon in a mileng pawl hrangah a tuah dingmi tuanvo tha te’n a tuah lo ti a fiang. Ziangahtile an daan ah inn sung luh hlan ah ke kholh ta theu a si ruangah ke kholhnak ding tidai khal siah sak theu a si. Sihmansehla Simon cun a mileng pawl ziangih a rel lo ruangah, a silole, kan Bawipa par ih zumnak taktak a neih lo ruangah an ke kholh nak hman a rak ngaihtuah sak lo. Asinain, a sualnak a thei aw mi le kan Bawipa in I ngaidam thei ti a zumtu nunau pakhat in kan Bawipaih hnen ah ra in a ke pawl a kholh sak tikah a ningzah phen ah a sualnak sawn a rak hawl. Minung thinlung cu a mak theu ko. Kanmah le kanmah kan phuhrung awk tikah midang hnen ih mawhphurh hi a ol tuk theu. Midang hnen ih mawh kan phurh ruangah kan thinlung sungah daihnak a um maw kan ti le a um cuang fawn lo. A ngaingai ahcun kan maih sualnak le famkim lonak thei aw in le Pathian ih zangfahnak rinsan in zumnak le tangdornak thawn a hnen kan pan lawngah a hnen ihsin ngaidamnak kan ngah thei ih thinlung hnangam daihnak taktak khal kan co thei a si. 

Mahlemah mitha tiih ruahawknak le puarthau ih hngalnak hmun ah tangdornak le sualsirnak a karh thei lo. Cuih hlei ah zumnak khal a karh thei lo ih Pathian zangfahnak khal theihthiam le rinsan a har. Mai sualnak le sambaunak a thei aw tengteng tu cun, Pathian zangfahnak kan tul zia kan thei ih tangdornak le zumnak thawn a hnen pan a ol. Cutik ah sualngaithiamnak khal kan co ih hnangamnak khal kan ngah thei a si. 

Tuini kan siarmi Gospel sungin ka lung I khoih bet tu cu verse 48 sungih kan Bawipaih tongkam a si. Kan Bawipa in Simon hnen ih nunaunu le amah ih danglamnak pawl a sim theh hnuah nunaunu hnen ah “Na sualnak cu ngaithiam a si zo” ti ih a sim mi tongkam te hi mangbangza a si. Simon hnen ih a simmi pawl hi nunaunu khal in a thei theh ko; Pathian ih zangfahnak a rinsan ruangah a sualnak ngaidam a si zo ih Pathian khal a duhdawt hleice nak a si timi kan Bawipaih amah a porhnak tongkam pawl khal a thei theh ko. Curuangah a thinlung sungah ziangtluk in a lung a awi ding ti cu theih a si. A sinain, na sualnak cu ngaithiam a si zo ti’n kan Bawipa cun a vun sim bet thotho. Himi hin sualthlahnak Sacrament ih thupit nak a khihhmuh ti’n ka ruat. Minung in kan sualnak parah sualsir in Pathian hnen ih direct sual phuan le ngaidam dil hi a theih lo a si lo; a ngah tuk ko. Asinain, hmuh theihlo Pathian hnen in “Na sualnak cu ngaidam a si zo” timi tongkam hi ziangtin kan thei thei ding? Himi tongkam hi minung thinlung sungih hnangam daihnak thleng ter dingah a thupi tuk fawn. Minung thinlung umtu daan a theih tuk ruangah himi “na sualnak cu ngaidam a si zo” timi tongkam thawn midang hnen ih rundamnak thleng ter dingah kan Bawipa cun a thawhsal hnu ah a dungthluntu pawl hnen ah sual thlahsak theinak le hrensak theinak huham a rak pek ta a si lo maw! Ziangtluk lungawi za so a si. Himi thu cu Jn 20:23 ah fiang keokeo in kan hmu thei.

Rundamnak hi sualngaidamnak thawng ih comi a si zia khal Lk 2:77 sungah kan hmu bet. Cuih sualngaidamnak cu sual sirnak thawn lawngih ngah theih mi a si. Maih sualnak thei lo le tangdornak nei lo cun, ziangtin so kan sual kan sir thei ding? Pathian zangfahnak zum lo cun ziangtin so a hnen kan pan ngam ding? a zangfahnak theithiam lo cun, ziangtin so kan duhdawt thei ding?